मधेस आन्दोलनको ११ वर्ष औपचारिकतामा सीमित बलिदानी दिवस

 सुरेशकुमार यादव

काठमाडौँ, माघ ६ गते । पहिलो मधेस आन्दोलन भएको ११ वर्ष पुगेको छ । २०६३ माघ ५ गतेको प्रारम्भिक मधेस आन्दोलनको दिनलाई मधेसवादी दलले बलिदानी दिवसको रूपमा मनाउँदै आए पनि यो वर्ष भने त्यति उत्साह देखिएन ।
मधेसवादी दलका अधिकांश नेताहरू काठमाडाँैमै पार्टीको आन्तरिक छलफलमा व्यस्त हुनुहुन्छ । हुन त राष्ट्रिय जनता पार्टी नेपाल र सङ्घीय समाजवादी फोरम नेपालले सिरहाको लहानमा औपचारिकताका लागि एक कार्यक्रमको आयोजना गरे । त्यस कार्यक्रममा मधेस आन्दोलनका सहिदको सम्झना गरियो ।
राजपा नेपालले शुक्रबार समानुपातिक प्रदेशसभा सदस्य र प्रदेश प्रमुखको स्वागतमा पार्टी कार्यालयमा कार्यक्रमको आयोजना गरे पनि बलिदानी दिवस भने मनाएन । फोरम नेपालले पनि शुक्रबार नै पार्टी कार्यसम्पादनको बैठक बोलाएको थियो, त्यसमा नेताहरू व्यस्त हुनुहुन्थ्यो । तर सहिदको सम्झना भने नगरिएको एक नेताले बताउनुभयो ।
सिरहाको लहानमा आयोजित कार्यक्रममा भने राजपा नेपालका अध्यक्ष मण्डलका सदस्य राजकिशोर यादव, सोही दलका सहमहामन्त्री सुरेश मण्डल र फोरम नेपालका केन्द्रीय सदस्य योगेन्द्र राय यादव लगायतको उपस्थिति थियो । नेताहरूको न्यून उपस्थितिले नै बलिदानी दिवसलाई मधेसवादी दल र केन्द्रीय नेतृत्वले महत्व नदिएको महसुस भएको मधेस आन्दोलनका अगुवा कृष्णदेव यादवले बताउनुभयो ।
यसअघिको बलिदान दिवसका दिन कार्यक्रम गर्न मधेसवादी दलहरूमा प्रतिस्पर्धा नै हुन्थ्यो । ती दलहरूले शक्ति प्रदर्शन गर्दै विभिन्न सदरमुकाममा कार्यक्रम गर्ने गर्र्थे तर यसपालि औपचारिकता मात्र निर्वाह गरेको छ । राजपा नेपालका महासचिव केशव झाले सिरहाको लहानमा राजपा नेपालले कार्यक्रम आयोजना गर्नुको साथै पार्टी कार्यालयमा पनि श्रद्धाञ्जलि कार्यक्रम गरेको बताउनुभयो ।
राजनीतिक विश्लेषक सीके लालले पनि मधेसवादी दलका नेताहरूले बलिदानी दिवसलाई महत्व नदिएको आरोप लगाउँदै आपत्ति प्रकट गर्नुभयो । तराई मधेस राष्ट्रिय परिषद्ले बलिदानी दिवसको अवसरमा माइतीघर मण्डलामा आयोजना गरेको कार्यक्रममा बोल्नुहुँदै लालले आन्दोलनबाट जन्मेका सबै मधेसवादी दलले आआफ्नो पार्टीबाट मधेस शब्द हटाएको प्रति पनि टिप्पणी गर्नुभयो ।
पूर्व राजदूत एवम् अधिकारकर्मी विजयकान्त कर्णले यस दिनलाई विशेष दिनको रूपमा मनाउनुपर्ने तर मधेसी नेताहरूले त्यति महत्व नदिएको भन्दै पहिलो मधेस आन्दोलनको निरन्तरता नै पछिल्लो मधेस आन्दोलन भएको टिप्पणी गर्नुभयो ।
उहाँले भन्नुभयो, ‘पहिलो मधेस आन्दोलनबाट प्राप्त उपलब्धिलाई राज्यले संस्थागत हुन नदिएको कारण पुनः अर्को आन्दोलन भएको हो र जबसम्म राज्यले प्राप्त उलब्धिलाई कार्यान्वयन नगर्दासम्म मधेसको आन्दोलन रोकिदैन । ’ मधेस आन्दोलनका कारण सङ्घीयता, गणतन्त्र, पहिचान, समावेशीको मुद्दा स्थापित भएको हो तर त्यसलाई राज्यले कार्यान्वयनमा अनाकानी गरिरहेको उहाँले आरोप लगाउनुभयो ।
राजपा नेपाल अध्यक्ष मण्डलका सदस्य राजकिशोर यादवले बलिदानी दिवसलाई भव्य रूपमा मनाउन सोचमा परिवर्तन आउनुपर्ने बताउनुभयो । दिवस मनाउन गाडीमा बोकेर ल्याउने अवस्था अन्त्य भएको छ तर अझै स्वतःस्फूर्त जनता आउन नसकेको उहाँले बताउनुभयो ।
फोरम नेपालका कोषाध्यक्ष विजय यादवले सिरहाको लहानमा बलिदानी दिवसको अवसरमा विशेष कार्यक्रम भएको दाबी गर्नुभयो । आफ्नो पार्टीको कार्य सम्पादनको बैठक बस्नुपर्ने आवश्यक नै भएको कारण त्यहाँ अन्य नेताहरू जान नपाएका बताउँदै उहाँले जिल्लाका नेताहरू कार्यक्रममा सहभागी भएको दाबी गर्नुभयो । यादव सिरहाबाट निर्वाचित प्रदेशसभाका सदस्य पनि हुनुहुन्छ ।

थप समाचार
प्रतिकृया
नाम

ईमेल

ठेगना


Copyright © 2014, Gorkhapatraonline.com. All rights reserved. | Developed by: Young Minds