तिहारका लागि फूलको व्यावसायिक खेती

flower_3देउखुरी, असोज २६ गते । भारतबाट आउने फूलको आयात घटाउन लमहीका युवाले व्यावसायिक फूल खेतीलाई निरन्तरता दिएका छन् । दस कट्ठा जग्गा भाडामा लिएर सयपत्री फूलको व्यावसायिक खेती गरिएको छ । 

देउखुरी उद्योग वाणिज्य सङ्घका सचिवसमेत रहनुभएका युवा व्यवसायी कृष्ण घिमिरे, मुकेश अधिकारी र दिवाकर पण्डितले संयुक्त रूपमा फूलखेती गर्नुभएको हो । हरेक वर्ष तिहारमा भारतबाट करोडौँ मूल्य बरावरको फूल नेपाल भित्रदै आएको छ, भारतबाट भित्रने फूलको प्रयोग घटाउँदै स्वदेशमै उत्पादन भएको फूललाई उपभोक्ता माझ पु¥याउन यसको सुरुवात गरेका हौं, फूलखेती गर्दै आउनुभएका कृष्ण घिमिरेले भन्नुभयो, नाफा कमाउने भन्दा सेवाभावले हामीले फूलको खेती गरेका हौं ।
तिहारलाई लक्षित गरेर फूलको खेती गरिएको हुँदा अहिले ढकमक्क सयपत्री फूल्न थालेको छ । यस अघिको वर्षमा दुई लाख ५० हजारको फूल बिक्री गर्न सफल युवाले अहिले स्थानीय बजारमै फूलको बिक्री गर्ने जनाएका छन् । काठमाडौँसम्म फूल बिक्री गर्न लग्यौं तर यस पाली भने आफ्नै ठाउँमा बिक्री गर्ने योजना छ, मुकेश अधिकारीले भन्नुभयो, फूल खेती गर्न पनि सजिलो भने छैन, चाहिएको समयमा फूलाउन रोपेदेखि नै हेरचाह गर्नुपर्छ ।
कुखुरा फार्मका लागि भाडामा लिएको जग्गा मध्ये केही जग्गामा फूलको खेती गरिएको छ । फूलमा रासायनिक मल हालेका छैनौं, कुखुरा फार्मबाट निस्किएको मल नै प्रयोग गरेका छौं, घिमिरेले भन्नुभयो, फूल खेती गर्न देउखुरीको माटो, हावा र पानी राम्रो छ । माला बनाएर फूलको बिक्री गरिने छ । एउटा मालाको मूल्य एक सय रुपियाँ पर्ने अनुमान व्यवसायीको रहेको छ । फूलको बेर्ना मकवानपुरको हेटौँडावाट ल्याइएको हो । पाँच हजार बिरुवा लगाइएको छ ।

थप समाचार
प्रतिकृया
नाम

ईमेल

ठेगना