रमेश विश्वकर्मा
गुल्मी, मङ्सिर १३ गते। मङ्सिर ४ गते सम्पन्न प्रतिनिधि सभा र प्रदेश सभा सदस्य निर्वाचनमा निर्वाचित जनप्रतिनिधि गाउँ–गाउँमा पुगेर खुसी साट्दै मतदातालाई धन्यवाद दिन व्यस्त देखिनुभएको छ। गुल्मी निर्वाचन क्षेत्र नम्बर-१ बाट प्रतिनिधि सभा सदस्यमा निर्वाचित नेपाली कांग्रेसका नेता डा.चन्द्र भण्डारी आफ्नो निर्वाचन क्षेत्रमा मतदातालाई धन्यवादसँगै बधाई दिन व्यस्त हुनुहुन्छ।
जिल्लाको सदरमुकाम तम्घासदेखि विजय र्यालीमार्फत मतदातालाई धन्यवाद दिन सुरु गर्नुभएका भण्डारीले कालीगण्डकीको हर्मीचौर, अर्बेनी, फोक्सिङ्ग, जयखानी, भुर्तुङ्ग, खड्गकोट पुग्नुभएको छ।
चन्द्रकोट गाउँपालिकाको ग्वाघा, शान्तिपुर, रुपाकोट, तुराङ्ग, सत्यवती गाउँपालिकाको जोहाङ्ग, जुनिय हुँदै रुरुक्षेत्र गाउँपालिकाको रिडी, छत्रकोट गाउँपालिकाको खज्र्याङ, दिगाम, दौंगाका मतदातालाई धन्यवाद दिनुभएको हो। उहाँले जित विकास पक्षधरको भएको बताउनुभएको छ।
नेता भण्डारीले गुल्मेली जनताले आशा र भरोसा गरेर दिएको एक÷एक मतको सम्मान गर्दै जिल्लाको विकास गरेर मूल्य तिर्ने बताउनुभयो। “अधुरा रहेका विकासका कामलाई अगाडि बढाउने छौँ”, उहाँले भन्नुभयो, “तीन जिल्लालाई जोड्ने एसियामै नमुना पुल रिडिमा बनाएकाछौं।” यो जित समग्र गुल्मेली जनताको विजयी भएको उल्लेख गर्नुभयो।
यस क्षेत्रको प्रदेश सभा (क) मा नेकपा एमालेका चिन्तामणि पाण्डे र प्रदेश सभा (ख) मा नेपाली कांग्रेसका धनेन्द्र कार्की विजयी हुनुभएको छ।
-(1)-original-thumb.jpg)
