खुम्बुमा पर्यटकहरूको आगमन

सन्तोष राउत

सोलुखुम्बु, असोज २५ गते । वर्षाद् हट्दै गएपछि सोलुखुम्बुको माथिल्लो क्षेत्रमा पर्यटकहरूको आगमन हुन थालेको छ । विश्वको सर्वोच्च शिखर सगरमाथालगायत अन्य मनोरम दृश्यको अवलोकन गर्न आउने पर्यटकहरूको आगमन दिन प्रतिदिन बढ्न थालेको हो ।
भदौको अन्त्यसम्म प्रायः सुनसान जस्तै देखिने यहाँका पदमार्गमा बाह्य पर्यटकहरूको आवातजावत हुन थालेको छ । हवाईमार्ग प्रयोग गरी आउने पर्यटकहरूका कारण तेञ्जिङ हिलारी विमानस्थलमा उडान संख्या दिन प्रतिदिन बढिरहेको नेपाल नागरिक उड्डयन कार्यालय लुक्लाले जनाएको छ । दैनिक उडान भर्दै आएका सीता, तारा, सिम्रिक र नेपाल एयरलायन्सले दैनिक उडान गरिरहेका छन् ।
सेप्टेम्बर १ देखि अहिलेसम्ममा करिब तीन हजारभन्दा बढी पर्यटक खुम्बु भित्रिसकेका छन् । एकै दिनमा तीन सय पचास जनासम्म पर्यटक नाम्चे प्रवेश गरेको इलाका प्रहरी कार्यालय नाम्चेका प्रहरी निरीक्षक नवराज न्यौपानेले जानकारी दिनुभयो । पर्यटकीय सिजन सुरु भएसँगै सुरक्षालाई मजबुद बनाउन थप १० जना प्रहरी गस्तीमा खटाइएको न्यौपानेले बताउनुभयो ।
पर्यटक त्रिभुवन अन्तर्राष्ट्रिय विमानस्थल काठमाडौँ हुँदै तेन्जिङ हिलारी विमानस्थल लुक्ला आएका छन् भने कतिपय पर्यटक पैदलबाट फाप्लुहुँदै नाम्चे पुगेका छन् । भदौको अन्तिम सातादेखि नै पर्यटक खुम्बु प्रवेश गर्न थालेका हुन् । भदौको मध्यदेखि कात्तिक महिनाभर खुम्बुमा पर्यटकको बाक्लो उपस्थिति हुने गर्दछ ।
सगरमाथा क्षेत्रमा वर्षभरिमा यही मौसममा सबैभन्दा बढी विदेशी पर्यटक आउने गर्दछन् । प्राकृतिक सुन्दरता देखिने यो मौसममा लेकसमेत कम लाग्ने स्थानीयको भनाइ छ ।

 

थप समाचार
प्रतिकृया
नाम

ईमेल

ठेगना


Copyright © 2014, Gorkhapatraonline.com. All rights reserved. | Developed by: Young Minds