अझै भरिएन कुलेखानीमा पानी

लक्ष्मीप्रसाद उपाध्याय

काठमाडौँ, असोज ६ गते । नेपालको विद्युत् आपूर्ति प्रणालीमा ‘ब्याक बोन’का रूपमा मानिने कुलेखानी जलाशयमा यस वर्ष औसत पानी भरिएको छ । राजधानी सहर काठमाडौँ उपत्यका लगायतका क्षेत्रमा नियमित विद्युत् आपूर्तिको स्रोतका रूपमा रहेको कुलेखानी जलाशयमा वर्षात् नसकिँदै औसत पानी जम्मा भएको हो । प्राधिकरणले यसलाई सुखद खबर भनेको छ ।
प्राधिकरण भार सम्प्रेषण केन्द्रका प्रमुख विष्णु श्रेष्ठका अनुसार बिहीबारसम्ममा एक हजार ५१९.५ मिटर पानी जलाशयमा भरिएको छ । एक हजार ५३० मिटरको गहिराइ भएको जलाशयमा गत वर्ष वर्षा सकिनैलाग्दा एक हजार ५२३ मिटरभन्दा बढी पानी भरिएको थियो । मनसुन सकिन अझै एक हप्ताभन्दा बढी समय बाँकी रहेकोले गत वर्षको भन्दा बढी पानी भरिने सक्ने सम्भावना रहेको छ ।
मौसम पूर्वानुमान महाशाखाका मौसमविद् विभूति पोखरेलले भन्नुभयो, मनसुन अझै कम्तिमा १० दिन टिक्छ होला, त्यसो भएकाले वर्षा हुन सक्दैन भन्न सकिन्न । वर्षा हुन सक्ने अझै निकै सम्भावना छ । बङ्गालको खाडीबाट मनसुनी वायु आउने क्रम अझै जारी रहेकाले वर्षा हुन सक्ने देखिएको छ । बुधबार पूर्वी नेपालबाट मौसम बदली भई पानी पर्न सुरु भएको र यो क्रम शनिबारसम्म नेपालभरि रहने अनुमान उहाँले गर्नुभयो ।
प्राधिकरण भार सम्प्रेषण केन्द्रका प्रमुख श्रेष्ठका भनाइमा पनि बिहीबारको स्थिति हेर्दा यो वर्ष गतको तुलनामा कुलेखानी जलाशयमा तीस सेन्टिमिटर पानी बढी भरिएको छ ।
उहाँले भन्नुभयो, मनसुन समाप्त नभइसकेको अवस्था र गत वर्षको भन्दा बढी पानी भरिएकोले अझै जलाशयमा पानी सङ्कलन हुने सम्भावना बढी रहेको छ । यो वर्ष एक हजार ५२५ मिटरसम्म पानी भरिन सक्ने अनुमान गर्न सकिन्छ । kulekhani
विगतका वर्षहरूमा भन्दा तुलनात्मक रूपमा जलाशयमा पानी बढी भरिएको र अझै मनसुन सक्रिय भइरहेकोले यो वर्ष हिउँदमा लोडसेडिङको समस्यालाई सम्बोधन गर्न सहज हुने पनि प्राधिकरणका अधिकारीहरूको दाबी छ ।
वर्षात्को पानी जम्मा पारेर सुख्खा याममा (हिउँद) मा सदुपयोग गर्नका लागि कुलेखानी जलविद्युत् आयोजनाको निर्माण गरिएको हो । हाल कुलेखानी प्रथम, कुलेखानी दोस्रोले गरी ९२ मेगावाट उत्पादन दिइरहेका छन् भने १४ मेगावाटको कुलेखानी तेस्रो निर्माणका क्रममा रहेको छ ।
कुलेखानी जलाशय वरपर वनजङ्गल नाश हुँदैगएको र बाह्रैमास पानी आउने मूल पनि सुक्न थालेका छन् । कुलेखानी जलाशयमा आउने पानीको स्रोतको संरक्षण गर्न विशेष कार्यक्रम सञ्चालन गर्नुपर्नेमा जलवायु परिवर्तनविज्ञले राय सल्लाह दिएका छन् ।
प्राधिकरणका अनुसार वातावरणीय सेवाको भुक्तानीबापत कुलेखानी जलविद्युत् आयोजनाबाट स्थानीय बासिन्दालाई पानीको मूलको संरक्षण गरे वापत जीविकोपार्जनका विभिन्न कार्य सञ्चालन भइरहेको पनि बताइएको छ ।

 

थप समाचार
प्रतिकृया
नाम

ईमेल

ठेगना