बाख्रापालनबाटै दसैँको जोहो

सिन्धुलीमाढी, असोज ६ गते । तीन वर्षअघिसम्म आफ्नो कमाइले बिहान–बेलुका छाक टार्न पनि धौ–धौ पर्ने दूधौली नगरपालिका–११, धनसरीका बुर्जबहादुर बुढाथोकी यतिखेर वर्षको ५० हजार रुपियाँसम्म कमाइ गर्न थाल्नुभएको छ । 

गाउँमा लागू भएको गरिबी निवारण कार्यक्रमबाट ३५ हजार रुपियाँ ऋण लिएर बाख्रापालन सुरु गरेपछि उहाँको जीवनमा परिवर्तन आउन थालेको हो । ‘चाडवाड टार्न ऋणको जोहो गर्नुपथ्र्यो, उहाँले भन्नुभयो, यतिखेर आफैँले भनेजति खर्च गर्न पुग्न थालेको छ ।
गरिबी निवारण कार्यक्रमबाट वार्षिक १२ प्रतिशत व्याजदरमा ऋण लिएर बुढाथोकीले छवटा बाख्रा किनेर व्यवसाय सुरु गर्नुभयो । अहिले भर्खर जन्मिएका पाठासमेत गरी खोरमा ३० वटा खसीबाख्रा रहेको उहाँले जानकारी दिनुभयो ।
बाख्राकै आम्दानीबाट ऋणसमेत चुक्ता गरिसकेको र यो वर्ष झण्डै ५० हजारको हाराहारीमा खसीबोकाको विक्रीबाट आम्दानी उहाँले लिनुभएको छ । त्यसो त बुर्जबहादुरको तीनजनाको परिवारका लागि जग्गाको नाममा दुई कट्ठा पाखो बारी मात्रै छ । उक्त जग्गाको उब्जनीले वर्ष दिनमा मुस्किलले तीन महिना मात्रै धान्दथ्यो, उहाँको परिवारलाई । बाख्रापालन व्यवसाय सुरु गरेपछि खान लाउनको कुनै समस्या नभएको र उल्टै बचत हुन थालेको उहाँको भनाइ छ ।
दूधौली नगरपालिका–१० कर्थाका दले सार्कीलाई पनि बाख्रापालन व्यवसाय फापेको छ । अहिले उहाँको परिवार चलाउने व्यवसाय नै त्यही हो । १५ हजार गरिबी निवारण कार्यक्रमबाट ऋण लिएर दुईवटा बाख्रा किनेर व्यवसाय सुरु गरेको र अहिले खोरमा खसीबाख्राको सङ्ख्या तीनदर्जन नाघेको उहाँले बताउनुभयो ।
ऋण फिर्ता गरेर ६० हजार रुपियाँ आम्दानी लिइसकेको बाख्रापालक कृषक सार्कीको भनाइ छ । उहाँका अनुसार लगानी गरेको केही महिनामा नै आम्दानी लिन पाइने भएकाले अधिकांश विपन्न परिवार बाख्रापालन व्यवसायप्रति आकर्षित भएका छन् । लगानी गर्ने पुँजीको अभावमा व्यवसाय गर्न नपाई रहेका कृषकहरू गाउ“मा गरिबी निवारण कार्यक्रम लागू भएपछि उक्त कार्यक्रममा आबद्ध भई ऋण लिएर बाख्रापालन व्यवसाय गर्न थालेका हुन् ।
गरिबी निवारण कार्यक्रम लागू भएपछि धेरै आफूजस्तै धेरै कृषकलाई व्यवसाय गर्न सजिलो भएको दूधौली नगरपालिका–६, हर्षाही निवासी कृषक मागिया फनेत बताउनुभयो । गरिबी निवारणबाट ऋण लिएर अधिकांश विपन्न परिवारले कुनै न कुनै व्यवसाय गरेका छन् । त्यसमध्ये पनि बाख्रापालन व्यवसाय गर्नेको सङ्ख्या धेरै छ, उहाँले भन्नुभयो ।
गाउँघरमा गरिबको गाई भनेर बाख्रापालन व्यवसाय चिनिने गरेको पनि उहाँले जानकारी दिनुभयो ।

 

थप समाचार
प्रतिकृया
नाम

ईमेल

ठेगना


Copyright © 2014, Gorkhapatraonline.com. All rights reserved. | Developed by: Young Minds