द्रूत मार्गको डीपीआर अझै टुङ्गो लागेन

भउचप्रसाद यादव

काठमाडौंँ, असोज ६ गते । बहुप्रतीक्षित काठमाडौँ–निजगढ द्रूत मार्ग निर्माणको जिम्मा नेपाली सेनाले पाएको पाँच महिना पुग्न लाग्दा पनि अहिलेसम्म विस्तृत आयोजना प्रतिवेदन (डीपीआर) बारे टुङ्गो लाग्न सकेको छैन । गत वैशाख १९ गते बसेको मन्त्रिपरिषद् बैठकले चार वर्षभित्र निर्माण कार्य सम्पन्न हुनेगरी द्रूत मार्ग निर्माणको काम पूरा गर्ने जिम्मेवारी सेनालाई दिने निर्णय गरेको थियो ।
काठमाडौँ–निजगढ द्रूत मार्गको निर्माणको क्रममा भारतीय कम्पनीले तयार पारेको डीपीआर खरिद गर्ने वा आफैँले नयाँ डीपीआर तयार गर्ने सम्बन्धमा सरकार र निर्माण जिम्मा पाएको नेपाली सेना अझै अन्योलमा छ । डीपीआरबारे टुङ्गो लाग्न नसक्दा द्रूत मार्ग निर्माण प्रक्रिया अगाडि बढ्न सकिरहेको छ्रैन ।
भारतीय कम्पनी ‘इन्फ्रास्ट्रक्चर लिजिङ एन्ड फिनानसियल सर्भिस (आइएलएन्डएफएस) ले द्रूत मार्गको डीपीआर तयार गरिसकेको छ । द्रूत मार्ग अधिकार सम्पन्न निर्देशन समितिले डीपीआरबारे अध्ययन र मूल्याङ्कनको काम गरिरहेको नेपाली सेनाका प्रवक्ता झङ्करबहादुर कडायतले जानकारी दिनुभयो । उहाँले डीपीआरबारे अध्ययन र मूल्याङ्कनको काम अन्तिम चरणमा पुगेको जानकारी समेत दिनुभयो ।
उहाँका अनुसार यो समितिले डीपीआरबारे सम्पूर्ण अध्ययन र मूल्याङ्कनको काम गरेर भौतिक पूर्वाधार तया यातायात मन्त्रालयमा बुझाउने छ । त्यसपछि सरकार र भौतिक पूर्वाधार तथा यातायात मन्त्रालयले डीपीआरबारे अन्तिम निर्णय लिनेछ । नेपलाी सेनाका रथी पूर्णचन्द्र थापाको संयोजकत्वमा द्रूत मार्ग अधिकार सम्पन्न निर्देशन समिति बनाइएको छ ।
यसअघि, व्यवस्थापिका–संसद् अन्तर्गतको विकास समितिले समेत काठमाडौँ–निजगढ द्रूत मार्गको निर्माणको क्रममा भारतीय कम्पनीले तयार पारेको विस्तृत आयोजना प्रतिवेदन (डिपीआर) खरिद गर्ने या नगर्ने भन्ने सम्बन्धमा तत्काल निष्कर्षमा पुग्न सरकार र नेपाली सेनालाई निर्देशन दिएको थियो ।
त्यसैगरी, समितिले भारतीय कम्पनीले तयार पारेको डिपीआरको मूल्य अस्वभाविक राखिएको भन्ने सुनिन आएकाले विस्तृत अध्ययनपछि वास्तविक मूल्याङ्कन गरेरमात्र डिपीआर खरिदबारे निष्कर्षमा पुग्न निर्देशन दिएको छ । त्यसैगरी समितिले अत्यावश्यक देखिएमा मात्र न्यूनतम लागत मूल्यमा डीपीआर खरिद गर्न अन्यथा वैकल्पिक पद्दतिबाट कार्यसम्पादन गर्न समेत सरकार र नेपाली सेनालाई निर्देशन दिएको छ ।
सैनिक प्रवक्ता कडायतले द्रूत मार्ग निर्माणबारे थप जानकारी दिँदै पाँच ठाउँमा निर्माण बेस क्याम स्थापना गरेर निर्माणको कामलाई अगाडि बढाइएको जानकरी दिनुभयो । निर्माण कार्यलाई थप सहज बनाउन अरु पाँच ठाउँमा निर्माण बेस क्याम राख्ने तयारी भइरहेको जानकारी उहाँले दिनुभयो । वर्षा र पहिरोका कारण निर्माण ट्रयाकमा आएका अवरोध हटाउने काम भइरहेको जानकारी दिँदै उहाँले थप निर्माण इक्वीपमेन्ट ल्याउने प्रक्रिया अगाडि बढाइएको बताउनुभयो ।

थप समाचार
प्रतिकृया
नाम

ईमेल

ठेगना


Copyright © 2014, Gorkhapatraonline.com. All rights reserved. | Developed by: Young Minds