कञ्चनपुर ३ मा नेता लेखक अगाडि, पालले पछ्याउनुहुँदै

लक्ष्मणदत्त पन्त 

महेन्द्रनगर, मङ्सिर ६ गते । कञ्चनपुर क्षेत्र नं. ३ को प्रतिनिधिसभा निर्वाचमा नेपाली कांग्रेसका उम्मेदवार पूर्वमन्त्री रमेश लेखकले नेकपा (एमाले) की पोलिटब्युरो सदस्य नेत्री निरुदेवी पाललाई झण्डै दोब्बर मतले पछाडि पार्नुभएको छ । नेता लेखकले १० हजार १६४ मत पाउँदा नेत्री पालले ५ हजार ९०४ मत पाउनुभएको छ । 

९७ हजार ८२२ मतदाता रहेको यस क्षेत्रमा प्रतिनिधिसभा तथा प्रदेशसभाको निर्वाचनमा ५७ हजार ९५५ मत खसेको थियो । चार जना स्वत्रन्त्रसहित १२ जना उम्मेदवार रहेको यस क्षेत्रमा अरु उम्मेदवारले अहिलेसम्म १ हजार मत कटाउन सक्नुभएको छैन । क्षेत्र नं. ३ मा राप्रपासँग तालमेल गरी निर्वाचनमा होमिएको एमालेलाई नै काँग्रेसले पनि मुख्य प्रतिस्पर्धीका रुपमा हेरेको थियो ।