सिलवालको रिट खारेज

नारायण काफ्ले

 

काठमाडौँ, भदौ २८ गते । ‘आफूलाई प्रहरी महानिरीक्षकमा नियुक्त गर्न माग गर्दै डीआईजी नवराज सिलवालले दायर गर्नुभएको रिट निवेदन’ सर्वोच्च अदालतले खारेज गरेको छ । रिट खारेजसँगै प्रहरी महानिरीक्षक नियुक्ति विवादको ६ महिना लामो अदालती प्रक्रिया सकिएको छ ।
चैत ८ गतेको सर्वोच्चको पूर्ण इजलासको आदेशअनुसार आफूलाई आईजीपीमा नियुक्त नगरी डीआईजी प्रकाश अर्याललाई नियुक्त गरेको भन्दै निर्णय खारेजीको माग गर्दै सिलवालले सर्वोच्चमा दायर रिट मङ्गलबार खारेज गरेको हो । यसअघि सर्वोच्चकै पूर्ण इजलासले जारी गरेको आदेश नमिलेको भन्दै सर्वोच्चले कार्यसम्पादन मूल्याङ्कनमा सिलवालभन्दा अर्याल अघि रहेको समेत ठहर गरेको छ ।
प्रधानन्यायाधीश गोपाल पराजुली तथा न्यायाधीशहरू ओमप्रकाश मिश्र, केदारप्रसाद चालिसे, शारदाप्रसाद घिमिरे, मीरा खड्का, प्रकाशमानसिंह राउत र पुरुषोत्तम भण्डारीको बृहत् पूर्ण इजलासले सिलवालको रिट खारेज गरेको हो । बृहत् पूर्ण इजलासले यसअघि पूर्ण इजलासले जारी गरेको आदेशमा कार्यसम्पादनमा कसरी सिलवाल अगाडि रहेको भन्ने स्पष्ट आधार र कारण उल्लेख नभएको निष्कर्ष निकालेको छ । चैत ८ मा तत्कालीन प्रधानन्यायाधीश सुशीला कार्कीसहितको पाँच न्यायाधीशको इजलासले उक्त फैसला गरेको थियो । navaraj-silwal
सरकारले चैत ८ गतेको आदेशअनुसार नै उच्चतम अङ्क प्राप्त अर्याललाई आईजीपीमा नियुक्त गरेकाले सरकारको निर्णय संविधान, प्रचलित कानुन र प्रहरी नियमावलीअनुसार नै रहेको ठहर बृहत् पूर्ण इजलासले गरेको छ ।
सर्वोच्चको फैसलामा भनिएको छ, “प्रहरी नियमावलीको नियम ४१ को कानुनी व्यवस्था समेतलाई विचार गरी नेपाल सरकारले मिति २०७३÷१२÷२८ मा प्रहरी नायब महानिरीक्षक पदमा गरेको बढुवा निर्णयमा संविधान कानुन तथा प्रहरी नियमावली समेतको कुनै त्रुटि नभएकोले माग बमोजिमको आदेश जारी गरी निवेदक प्रहरी नायब महानिरीक्षक नवराज सिलवाललाई प्रहरी महानिरीक्षक पदमा नियुक्ति दिनु भनी विपक्षीहरूको नाममा आदेश जारी गर्न मिल्ने आधार कारण नदेखिँदा निवेदन माग बमोजिमको आदेश जारी गर्नुपर्ने देखिएन । प्रस्तुत रिट खारेज हुने ठहर्छ । ”
इजलासले प्रहरी महानिरीक्षकमा बढुवा अर्यालको कार्यसम्पादन मूल्याङ्कन नम्बर १५४ दशमलव २ र सिलवालको १५२ दशमलव ४ भएको फैसलामा उल्लेख गरेको छ । इजलासले लोकसेवा आयोग समेतमा रहेको सक्कल कार्यसम्पादन फाइलका आधारमा नम्बर यकिन गरेको फैसलामा उल्लेख गरेको छ ।
यस्तै अर्याल ज्येष्ठता, कार्यकुशलता, कार्यक्षमता र उत्तरदायित्व वहन गर्ने र आफूभन्दा मुनिका प्रहरीलाई परिचालन तथा प्रोत्साहन गर्नेमा पनि सामथ्र्य रहेको आधारमा सरकारले नियुक्ति गरेको देखिएको फैसलामा उल्लेख छ ।
राजीनामाको घोषणा
यसैबीच, प्रहरी नायब महानिरीक्षक (डीआईजी) नवराज सिलवालले पदबाट राजीनामा दिने घोषणा गर्नुभएको छ ।
मङ्गलबार प्रेस विज्ञप्ति जारी गरी सिलवालले मङ्गलबारबाटै प्रहरी सङ्गठनबाट अलग हुने घोषणा गर्नुभएको हो । आफू कानुनको रक्षकका रूपमा प्रहरीमा कार्यरत रहेको तर कानुनी र राजनीतिक निर्णयबाट आफूलाई अन्याय परेको उल्लेख गर्दै उहाँले सरकारले विश्वास नगरे पनि जनता र जवानहरूमाझ आफ्नो छवि कायम भएको दाबी पनि गर्नुभएको छ ।

थप समाचार
प्रतिकृया
नाम

ईमेल

ठेगना