चाडपर्वका बेला खाद्यान्न अभाव नहुने

धनगढी, भदौ २६ गते । प्रदेश नम्बर ७ स्थित भोकमरी हुने पहाडी जिल्लाका बासिन्दाले यसवर्ष चाडपर्व ढुक्कसँग मनाउन पाउने भएका छन् ।  सम्बन्धित जिल्लामा खाद्यान्न मौज्दात पर्याप्त रहेकाले चाडपर्वको बेला अभाव नहुने बताइएको छ । भोकमरी हुने जिल्लामा वर्षातका बेला चामल ढुवानी गर्न नपाइए पनि पहिल्यै गएको चामल डिपोमा पर्याप्त मात्रामा मौज्दात रहेको नेपाल खाद्य संस्थान क्षेत्रीय कार्यालय, धनगढीले जानकारी दिएको छ । 

भोकमरी हुने पहाडी जिल्लामा यो वर्ष अहिलेसम्म खाद्यान्न अभाव नभएको र चाडपर्वको बेला पनि त्यस्तो समस्या नआउने संस्थानका सहायक प्रमुख जगतबहादुर कुँवरले बताउनुभयो । यो वर्ष अहिलेसम्म खाद्यान्न अभाव समस्या उत्पन्न भएको छैन । चाडपर्वका बेला पनि अभाव हुँदैन, उहाँले भन्नुभयो, पहाडका जिल्लावासीले ढुक्कसँग पर्व मनाउन पाउनेछन् ।
विगतमा दसैँ, दिपावलीको बेला कतिपय जिल्लामा खाद्यान्न अभावको समस्या सिर्जना भए पनि यो वर्ष त्यस्तो समस्या नहुने बताइएको छ । संस्थानले गत साउनमा अछामको लागि चार सय क्वीन्टल र बैतडीको कुलाउ डिपोमा १८६ क्वीन्टल ४० किलो तथा पुरचौडी हाटको लागि ३९२ क्वीन्टल ५० किलो चामल पठाएको छ ।
यी दुई जिल्लाबाहेक बझाङ, बाजुरामा बर्खाका बेला चामल ढुवानी गर्न नपाए पनि पहिल्यै ढुवानी गरिएको चामल मौज्दात पर्याप्त मात्रामा रहेको जनाइएको छ । संस्थानले बर्खा अगाडि बैतडीमा चार हजार क्वीन्टल, बझाङमा चार हजार क्वीन्टल र दार्चुलामा चार हजार पाँच सय क्वीन्टल चामल पठाएको थियो । पठाइएको चामलमध्ये केहीमात्रै बिक्री भएको संस्थानले जानकारी दिएको छ ।
प्रदेशमा सबैभन्दा बढी भोकमरी रहेको जिल्ला बाजुरामा अत्यधिक चामल मौज्दात रहेको जनाइएको छ । बाजुराको कोल्टी डिपोमा साढे छ हजार क्वीन्टल र मार्तडी वितरण केन्द्रमा दुई हजार पाँच सय क्वीन्टल चामल मौज्दात रहेको कोल्टी डिपो प्रमुख रमेशबहादुर सिंहले जानकारी दिनुभयो ।
उहाँले दसैँ, दीपावलीलाई पुग्ने गरी पर्याप्त मात्रामा चामल रहेको बताउनुभयो । हामीसँग मौज्दात चामल कहाँ बिक्री गर्ने भन्ने भइरहेको छ, उहाँले भन्नुभयो, चामल मौज्दात पर्याप्त छ । खाद्यान्न अभावको समस्या हुन पाउँदैन ।  एक वर्षको लागि बाजुरामा २२ हजार ३५० क्वीन्टल चामल पठाइएको थियो । पठाइएको मध्ये आधाभन्दा बढी चामल बिक्री भए पनि केहि महिनालाई पुग्ने गरी अझै पनि चामल मौज्दात रहेको संस्थानको कोल्टी डिपोले जानकारी दिएको छ ।
दसैँ लगत्तै थप चामल ढुवानी गर्छौ, डिपो प्रमुख सिंहले भन्नुभयो, यो जिल्लामा खाद्यान्नको अभाव हुन दिने छैनौ ।  खेतीपाती थोरै गर्ने र उब्जनी पनि कम हुने परिपाटीले बाजुरा, बझाङ, दार्चुला, बैतडी, अछामको खाद्यान्नपूर्ति तराईको उब्जनीबाट हुँदैआएको छ । वर्षभरिलाई पुग्ने गरी आवश्यक खाद्यान्न ढुवानी हुन नपाउँदा सो जिल्लामा भोकमरी समस्या उत्पन्न हुने गरेको छ ।
यसपटक वर्षायाममा बाटो अवरुद्ध भएपछि सबै जिल्लामा खाद्यान्न ढुवानी भएको छैन । ढुवानीका लागि ठेक्का भइसकेको नेपाल खाद्य संस्थान क्षेत्रीय कार्यालय धनगढी जानकारी दिएको छ । संस्थानले डिपो नभएको जिल्लामा ठेकेदार मार्फत खाद्यान्न आपूर्ति गर्दैआएको छ ।
खाद्यान्न ढुवानीका लागि टेन्डर स्वीकृत भइसकेको संस्थानका सहायक प्रमुख कुँवरले जानकारी दिनुभयो । उहाँले वर्षा लगत्तै चामल ढुवानी हुने बताउनुभयो । अहिलेसम्म कुनै जिल्लाबाट चामलको माग भएको छैन, कुँवरले भन्नुभयो, समस्या नभएका कारण माग नभएको हुन सक्छ ।
खाद्यान्न समस्या भएमा तुरुन्त खबर गर्नका लागि संस्थानले पहाडी जिल्लाका स्थानीय तहलाई चिठी पठाएको छ । माग भएमा आवश्यकताअनुसार चामल पठाउन सकिने सहायक प्रमुख कुँवरले जानकारी दिनुभयो । संस्थानको धनगढी गोदाममा २० हजार क्वीन्टल चामल मौज्दात रहेको छ ।

थप समाचार
प्रतिकृया
नाम

ईमेल

ठेगना


Copyright © 2014, Gorkhapatraonline.com. All rights reserved. | Developed by: Young Minds