उद्धारमा खट्न प्रधानमन्त्रीको निर्देशन

काठमाडौँ साउन २९ गते  ।  प्रधानमन्त्री शेरबहादुर देउवाले देशका विभिन्न क्षेत्रमा अविरल वर्षाका कारण डुबानमा परेकाको तत्काल उद्दार गर्न निर्देशन दिनुभएको छ ।  शनिबार साँझ प्रधानमन्त्री निवास बालुवाटारमा गृहमन्त्री, रक्षामन्त्री, प्रधानसेनापति, नेपाल प्रहरी र सशस्त्र प्रहरीका प्रमुख, राष्ट्रिय अनुसन्धान विभागका प्रमुखलगायतका अधिकारीलाई बोलाएर उहाँले तदारुकताका साथ उद्दारमा आफंै उपस्थित हुन निर्देशन दिनुभएको हो ।  
प्रधानमन्त्रीले निर्देशन दिँदै भन्नुभयो, ‘बाढीले तराईमा ठूलो धनजनको क्षतिपुगेको छ, तपाईहरू अब काठमाडौँ बस्ने होइन, प्रभावित क्षेत्र पुग्नुहोस्, उद्दारमा एकीकृत भएर काम गर्नुहोस् । ’ प्रधानमन्त्रीले बाढीका कारण थप डुबानमा पर्न सक्ने क्षेत्रको पहिचान गरेर उक्त क्षेत्रमा उच्च सतर्कता उपनाउन पनि निर्देशन दिनुभएको जानकारी प्रधानमन्त्रीको निजी सचिवालयले दिएको छ ।  बाढी पीडितहरूको उद्दार, राहत र स्थानान्त्रणमा सरकारले जुनसुकै पनि सहयोग गर्न तयार रहेको बताउँदै प्रधानमन्त्रीले नागरिक समाजलाई समेत अपिल गरेर अघि बढ्न सुरक्षा निकायका प्रमुखलाई निर्देशन दिनुभयो ।  बैठकमा गृहमन्त्री जनार्दन शर्माले मौसमका कारण हेलिकप्टरबाट उद्दार गर्ने कार्य अघि बढाउन नसकिएको जानकारी दिनुभएको थियो ।  बैठकमा नेपाली सेनामा प्रधान सेनापति राजेन्द्र क्षेत्रीले नेपाली सेना फिल्डमा खटिइसकेको बताउँदै मौसमका कारण हेलिकप्टरबाट उद्दार गर्न नसकिए पनि सबै विमानस्थलमा तैनाथका साथ उद्दार टोली खटाइएको जानकारी दिनुभएको थियो ।  
त्यसअघि शनिबार बिहानैदेखि प्रधानमन्त्री देउवाले देशका विभिन्न भागमा बाढी, पहिरो र डुबानको चपेटामा परेका नागरिकलाई तत्काल सुरक्षित स्थानमा स्थानान्तरण गर्न र राहत उपलब्ध गराउन सम्बन्धित जिल्लाका स्थानीय प्रशासनलाई निर्देशन दिनुभएको थियो ।  प्रधानमन्त्री देउवाले बाढी–पहिरो प्रभावित जिल्लाका प्रमुखलाई सम्पर्क गरी विपत्को चपेटामा परेका नागरिकलाई उद्धार, राहत र सुरक्षित स्थानमा स्थानान्तरणलगायत सहयोग प्रदान गर्न निर्देशन दिनुभएको प्रधानमन्त्रीको निजी सचिवालयले जानकारी दिएको छ ।  बाढी र पहिरोमा परी ज्यान गुमाएकाप्रति श्रद्धाञ्जलि र उनीहरूका परिवारप्रति समवेदना प्रकट गर्दै प्रधानमन्त्री देउवाले विपत्को घडीमा एक ढिक्का हुन सम्पूर्ण देशवासीलाई आग्रह गर्नुभएको प्रधानमन्त्रीको निजी सचिवालयले जनाएको छ ।  
यसैगरी, गहृमन्त्री जनार्दन शर्माले पनि उद्धार कार्य तीव्र पार्न सम्बन्धित निकायलाई निर्देशन दिनुभएको छ ।  गृहमन्त्री शर्माले बाढी प्रभावित क्षेत्रमा जान विमान स्थलमा खाद्य तथा उद्धार सामग्री तयारी अवस्थामा राखे पनि मौसम प्रतिकूल भएका कारणले आफू जान नसकेको बताउनुभयो ।  उहाँले मौसमले साथ दिनसाथ उद्दार सामग्रीसहित प्रभावितस्थलमा प्रस्थान गर्ने जानकारी दिनुभयो ।  त्यसैगरी, गृहमन्त्री शर्माले बाँकेको नरायनापुर गाउँपालिका र राप्ती सुनारी गाउँपालिकामा बाढीका कारणले गाउँहरू डुबानमा परेपछि, सुर्खेतबाट उद्धारका लागि टोली पठाउन निर्देशन दिनुभएको छ ।  उता बाँकेका प्रमुख जिल्ला अधिकारी रविलाल पन्तले पानीको सतह घट्दै गएकाले डुबानको समस्या बिस्तारी हट्ने आशामा रहेको जानकारी दिनुभयो ।
गृहमन्त्री शर्माले नेपाल प्रहरी तथा सशस्त्र प्रहरीका उद्धार कार्यका कुशल जवानलाई परिचालित गर्न निर्देशन दिइसक्नुभएको छ ।  उहाँले डुबानमा परेकाको उद्धारका लागि राजनीतिक दल, जिल्ला प्रशासनलगायत सम्बन्धित निकायसँग आफू प्रत्यक्ष सम्पर्कमा रहेको जानकारीसमेत दिनुभयो ।  

थप समाचार
प्रतिकृया
नाम

ईमेल

ठेगना


Copyright © 2014, Gorkhapatraonline.com. All rights reserved. | Developed by: Young Minds