हिंसा नियन्त्रण गर्न उद्धार समूह गठन गरिने

शिवा तामाङ

काठमाडौंँ, साउन २८ गते ।  महिला, बालबालिका तथा समाजकल्याणमन्त्री आशा कोइरालाले मन्त्रालयको तत्कालीन र दीर्घकालीन नीति र कार्यक्रमलाई समेट्दै कार्ययोजना सार्वजनिक गर्नुभएको छ ।  आफ्नो कार्यकालमा गरिने कामलाई प्राथमिकता दिई शुक्रबार पत्रकारका सामुन्ने ३७ बुँदे कार्यक्रम सार्वजनिक गर्नुभएको हो ।  
कार्यक्रममा उहाँले समाजमा छाउपडी, बोक्सीलगायतका रुढिवादी सोचका आधारमा गरिने भेदभाव, महिला, बालबालिका, अपाङ्गता भएका व्यक्ति, ज्येष्ठ नागरिकविरुद्ध हुने हिंसाको नियन्त्रण गर्न तत्कालै उद्धार समूह (¥यापिड रेस्पोन्स टिम) गठन गर्ने जानकारी दिनुभयो ।  ७४४ स्थानीय तहमै गठन गरिने त्यस्ता समूहमा निर्वाचित स्थानीय जनप्रतिनिधि, नागरिक समाज, शिक्षक, पत्रकार, सुरक्षा निकायका प्रतिनिधि सहभागी रहनेछन् ।  
त्यसैगरी बालबालिकासम्बन्धी ऐनलाई प्रतिस्थापन गर्ने विधेयक, राष्ट्रिय महिला आयोग विधेयक, ज्येष्ठ नागरिकसम्बन्धी विधेयक, समाजकल्याण ऐनलाई प्रतिस्थापन गर्ने विधेयक व्यवस्थापिका संसद्बाट पारित गराई विधेयक ऐनका रूपमा कार्यान्वयन हुनेबित्तिकै नियमावली बनाइने, अपाङ्गता भएका व्यक्तिको अधिकार प्रवद्र्धनसम्बन्धी ऐन संसद्बाट पारित भइसकेकाले त्यसको नियमावली तर्जुमा छिट्टै गरिने, सबै प्रदेशमा ज्येष्ठ नागरिकका लागि आश्रम खोलिने, सार्वजनिक यातायातमा महिला हिंसालाई शून्य बनाउन साझा यातायातलगायतका सार्वजनिक यातायातका संस्थासँग सहकार्य गरिनेछन् ।  
मन्त्री कोइरालाले राष्ट्रपति महिला उत्थान कार्यक्रममार्फत आर्थिक सबलीकरणको कार्यक्रमलाई देशव्यापी बनाइने, कार्यस्थलमा हुने यौनजन्य हिंसालगायत विभिन्न क्षेत्र, विज्ञापन र रियालिटी शो आदिमा हुने हिंसा रोकथाम गर्नका लागि आचारसंहिता बनाई कार्यान्वयनमा ल्याइने, महिला सहभागिता बढाउन एवं उत्पादकत्व वृद्धिका लागि कार्यस्थलमै शिशु स्याहार केन्द्र खोल्न प्रोत्साहित गरिनेछ ।  यसैगरी उद्योग, कलकारखाना, निर्माणलगायतका क्षेत्रमा विद्यमान असमान ज्याला हटाउन समन्वयात्मक कार्यक्रम सञ्चालन गरिने, यौनिक अल्पसङ्ख्यकको हित प्रवद्र्धनका लागि सञ्चालित कार्यक्रमको निरन्तरता दिइने कार्यक्रम तय गरिएको जानकारी दिनुभयो ।  
त्यसैगरी महिला, बालबालिका, ज्येष्ठ नागरिक, अपाङ्गता भएका व्यक्तिको हितलगायत समाजकल्याणका निम्ति सामाजिक सेवामा कार्य गर्ने विभिन्न अन्तर्राष्ट्रिय गैरसरकारी संस्थामार्फत देशभित्र खर्च गर्नका लागि परियोजना सम्झौतामा उल्लेख भएको रकममध्ये गाउँपालिकामा ३ प्रतिशत र अन्य क्षेत्रमा खर्च गर्न छुट्याइएको रकमको ५ प्रतिशत कट्टा गरी छुट्टै कोषको स्थापना गरिने कुरामा मन्त्री कोइरालाले जोड दिनुभएको छ ।  
प्रस्तुत योजनाहरू छिट्टै कार्यान्वयन गर्ने प्रयास गर्ने प्रतिबद्धता जनाउँदै उहाँले यस कार्यक्रममा सबैले सक्दो सहयोग गर्ने आशा पनि व्यक्त गर्नुभयो ।  

थप समाचार
प्रतिकृया
नाम

ईमेल

ठेगना


Copyright © 2014, Gorkhapatraonline.com. All rights reserved. | Developed by: Young Minds