हरियो–पहेँलो चुरापोते

नवीनराज कुइँकेल

बेसीसहर । मस्र्याङ्दी गाउँपालिका–६ बाहुनडाँडाकी कामना घिमिरेले साउनको पहिलो दिन दुवै हातमा हरियो चुरा लगाउनुभयो ।  बेसीसहर–१० पासाचौरकी श्रीकला भण्डारी र बेसीसहर शेराकुनाकी अनिशा श्रेष्ठले चुरासँगै हातमा मेहन्दी लगाएर सजिनुभयो ।  
यतिबेला सबैको नाडीमा काँचका हरिया चुरा सजिएको देख्न पाइन्छ ।  साउन लागेलगत्तै हिन्दु महिलामा छुट्टै उत्साह र उमङ्ग छाएको छ ।  रातो, पहेँलो र हरियो चुरापोते तथा कपडामा सजिएका महिलाको मन्दिर र बाटोघाटोमा चहल–पहल देखिन्छ ।  पछिल्ला वर्षमा किशोरीमा समेत मेहन्दी र हरियो चुरा लगाउने ‘क्रेज’ बढ्दो छ ।  धेरैले धार्मिक विश्वासमा यसो गरेका छन् भने कतिले चाहिँ फेसनका रूपमा ।  खासगरी साउनको सोमबार शिवजीको व्रत र पूजा गर्ने चलन भएकाले साउनका सबै दिनलाई उत्तिकै महìवका रूपमा लिइन्छ ।  बेसीसहरको एक चुरा पसलमा भेटिएकी कामनाले हरियो चुरा लगाउँदा यही हुन्छ भन्ने थाहा नभएको बताउनुभयो ।  आफ्नो नाडीको चुरा खेलाउँदै उहाँले खै साउनमा हरियो चुरा लगाउँदा चिताएको पुग्छ भन्छन्, मैले पनि लगाएँ भन्नुभयो ।
उहाँले हरियो चुरा लगाउँदा जीवनमा हरियाली छाउने विश्वास रहेको बताउनुभयो ।  कतिपयले हरियो चुरा लगाइसकेपछि चुकाउनु या फुटाउनु हुँदैन भनेर यो महिनाभर होसियारी अपनाउने गर्दछन् ।  कहिल्यै हरियो चुरा नलगाउने युवतीले समेत चुरा लगाएर बजाउँदै हिँड्दा खुब सुहाएको र रमाइलो लागेको बताएका छन् ।  नारीमा यो महिना चुरा लगाउने सोख र होड चलेपछि चुरा पसले पनि मख्ख छन् ।  बेसीसहरस्थित सवनम फेन्सी एन्ड होससेलका प्रोप्राइटर सवनम मियाले मध्य असारदेखि नै हरियो चुराको बिक्री बढेको बताउनुभयो ।   hariyo chura 
साउनमा हरियो, पहेँलो र रातो चुरापोते एवम् कपडा लगाउनुको पनि आफ्नै अर्थ छ । हरियोलाई प्रेम र वातावरणको, रातोलाई शौभाग्यको एवम् पहेँलोलाई पवित्रताको प्रतीकका रूपमा लिइन्छ ।  यसकारण पनि साउन महिनामा हरियो, पहेँलो रातो सम्मिश्रण गरी लगाउने चलन बसेको संस्कृतिविद् बताउँछन् ।  चुरापोते र कपडासँगै साउन महिनामा हातभरि मेहन्दी लगाउने चलन पनि छ ।  हत्केलामा जति बढी गाढा मेहन्दीको रङ राख्यो, उति नै बढी श्रीमान्को माया पाइन्छ भन्ने धार्मिक विश्वास छ ।  मेहन्दी लगाउने चलन चाहिँ छिमेकी देश भारतबाट भित्रिएको बताइन्छ ।

थप समाचार
प्रतिकृया
नाम

ईमेल

ठेगना