नागार्जुन र गोकर्णेश्वर नगरपालिकामा काँग्रेस विजयी

काठमाडौँ, जेठ ५ गते । नागार्जुन नगरपालिकाको प्रमुखमा नेपाली काँग्रेसका मोहनबहादुर बस्नेत विजयी हुनुभएको छ ।

बस्नेतले छ हजार ९६१ मत प्राप्त गरी विजयी हुनुभएको निर्वाचन अधिकृत सुदर्शन लामिछानेले जानकारी गराउनुभयो । उहाँका प्रतिद्वन्द्वी नेकपा (एमाले)का कृष्णहरि खत्रीले छ हजार ७२६ मत प्राप्त गर्नुभएको छ ।

यसैगरी उपप्रमुखमा एमालेका सुशीला अधिकारीले छ हजार ८७१ मत प्राप्त गरी विजय हुनुभएको छ । उहाँका निकटतम प्रतिद्वन्द्वी काँग्रेसका कल्याणी खड्काले छ हजार ७९१ मत प्राप्त गर्नुभएको छ ।

वडा नं १० को वडाअध्यक्षमा काँग्रेसका सुन्दरबहादुर केसी विजय हुनुभएको छ । नागार्जुनमा २६ हजार २४५ मतदाता रहेकामा २० हजार ८९७ मत खसेको थियो ।

यसैगरी गोकर्णेश्वर नगरपालिकाको प्रमुखमा नेपाली काँग्रेसका उम्मेद्वार सन्तोष चालिसे निर्वाचित हुनुभएको छ ।

आज दिउँसो सम्पन्न मतगणनाअनुसार काँग्रेसका चालिसेले नौ हजार नौ मत ल्याई विजयी हुनुभएको हो । उहाँका प्रतिद्धन्द्धी नेकपा (एमाले)का उम्मेद्वार पुण्यप्रसाद चौलागाइँले सात हजार ५९५ मत प्राप्त गर्नुभएको मुख्य निर्वाचन अधिकृत निर्मला सुवेदीले जानकारी दिनुभयो ।

यस्तै उपप्रमुखमा पनि काँग्रेसकै उम्मेद्वार शान्ति नेपाल निर्वाचित हुनुभएको छ ।

नेपालले आठ हजार ५९८ मत प्राप्त गरी विजयी हुनुभएको हो भने नेकपा (एमाले)की उम्मेद्वार शान्ति श्रेष्ठले आठ हजार ६२ मत प्राप्त गर्नुभएको सुवेदीले बताउनुभयो ।

गोकर्णेश्वरमा कुल २१ हजार ८५९ मत खसेको थियो । रासस

थप समाचार
प्रतिकृया
नाम

ईमेल

ठेगना


Copyright © 2014, Gorkhapatraonline.com. All rights reserved. | Developed by: Young Minds