‘जलवायु परिवर्तन चुनौतीपूर्ण’

Prakash-saran-mahatकाठमाडौँ, असोज ५ गते । संयुक्त राष्ट्रसङ्घको ७१औँ महासभामा भाग लिने सिलसिलामा अमेरिकाको न्युयोर्कमा रहनुभएका परराष्ट्रमन्त्री डा. प्रकाशशरण महतले मङ्गलबार राष्ट्रसङ्घको प्रधान कार्यालयमा आयोजित शरणार्थी तथा आप्रवासीसम्बन्धी उच्चस्तरीय बैठकमा भाग लिनुभयो ।
साथै उहाँले दिगो विकास प्राप्तिसम्बन्धी सन् २०३० का दिगो विकासका लक्ष्य हासिल गर्न राष्ट्रका आआफ्ना नीति प्राथमिकतामा जोड दिनुपर्ने बताउनुभयो ।
बहुआयामिक समस्याका रूपमा रहेको शरणार्थी समस्यालाई प्रभावकारी रूपमा त्यसको समग्रतामा पुगेर समाधान गर्नुपर्नेमा मन्त्री महतले जोड दिनुभएको संयुक्त राष्ट्रसङ्घका लागि न्युयोर्कस्थित स्थायी नेपाली नियोगले जनाएको छ । सबै आप्रवासी शरणार्थी होइनन् भन्दै उहाँले स्पष्ट पहिचान गरेर मात्र सम्बन्धित व्यक्तिलाई आप्रवासी वा शरणार्थी भनेर छुट्याउनुपर्ने बताउनुभयो । मङ्गलबारै मन्त्री डा. महत जलवायु परिवर्तनसम्बन्धी उच्चस्तरीय बैठकमा पनि सहभागी हुनुभयो ।
अल्पविकसित, भूपरिवेष्टित विकासोन्मुख तथा टापु राष्ट्रहरूले संयुक्तरूपमा आयोजना गरेको उक्त बैठकमा उहाँले जलवायु परिवर्तनका कारण उत्पन्न चुनौतीको सामना गर्न आन्तरिक स्रोत र साधनले नभ्याउने भएकाले त्यसमा अन्तर्राष्ट्रिय सहयोग र साझेदारीको आवश्यकता रहेको बताउनुभयो ।
मन्त्री महतसँग कोलम्बियाका विदेशमन्त्री मारिया एन्जेला होल्गुइन स्विलारले भेटवार्ता गर्नुभयो । त्यस अवसरमा उहाँहरूबीच कोलम्बिया र नेपालको शान्ति प्रक्रियाबारे छलफल भएको उक्त नियोगले जनाएको छ । कोलम्बियाली विदेशमन्त्रीले नेपालको शान्ति प्रक्रियाको सफलताबारे चासोपूर्वक जिज्ञासा राख्नुभएको थियो ।
कोलम्बियाको कफी उत्पादन तथा प्रशोधनको अनुभव नेपालका निम्ति उपयोगी हुने भएकाले त्यस दिशामा आवश्यक कार्य गर्न मन्त्री महतसमक्ष गर्नुभएको प्रस्तावको नेपालले सकारात्मक जवाफ दिएको थियो । सोमबार न्युयोर्क पुग्नुभएका मन्त्री महतलाई जेएफके अन्तर्राष्ट्रिय विमानस्थलमा संयुक्त राष्ट्रसङ्घका लागि स्थायी नेपाली प्रतिनिधि दुर्गाप्रसाद भट्टराईलगायतले स्वागत गर्नुभएको थियो ।

थप समाचार
प्रतिकृया
नाम

ईमेल

ठेगना