कम हुन सकेन सवारी दुर्घटना

काठमाडौँ, जेठ २५ गते ।  ट्राफिक प्रहरीले विभिन्न जनचेतनामूलक कार्यक्रम सञ्चालन गरिरहे पनि दुर्घटनामा कमी आउन सकेको छैन ।
ट्राफिक प्रहरी महाशाखाका अनुसार आ. व. २०७२/७३ को ११ महिनाभित्र लगभग चार हजार ५०० सवारी साधन दुर्घटना भएका छन् ।  यी दुर्घटनामा १३६ जनाको मृत्यु भएको छ ।  
दुर्घटनामा कार, बस, माइक्रोबस, टेम्पो तथा बस लगायतका आठ हजार सवारी साधनको संलग्नता रहेको छ ।  गत वर्ष पाँच हजार सवारी साधन दुर्घटनामा पाँच हजार १३४ जनाले ज्यान गुमाए ।  २०६८ सालदेखि सवारी साधन दुर्घटना, मृत्यु हुने र घाइते हुनेको सङ्ख्या लगभग पाँच हजारकै हाराहारीमा छ ।  दुर्घटनामा मृत्यु हुने पैदलयात्रु र मोटरसाइकल तथा स्कुटर चालक बढी छन् ।
तीव्र गति, चालकको लापरबाही, मादकपदार्थ सेवन, पैदलयात्रुको असावधानी, सडकको अवस्था, चौपाया तथा मौसम सडकमा हुने सवारी साधन दुर्घटनाको मुख्य कारण भएको महाशाखाले जनाएको छ ।  पछिल्लो केही वर्षदेखि ट्राफिक प्रहरीले सवारी दुर्घटना कम गर्न विभिन्न जनचेतनामूलक अभियान सञ्चालन गरिरहेको जानकारी दिँदै ट्राफिक महाशाखा, सडक सुरक्षा समन्वय अधिकृत सविन प्रधानले बर्सेनि काठमाडौँमा सवारी साधन र मान्छेको चाप अनियन्त्रित ढङ्गले बढिरहेकाले दुर्घटनामा कमी आउन नसकेको बताउनुभयो ।  
काठमाडौँमा मात्र नौ लाखभन्दा बढी सवारी साधन तथा ५० लाखको हाराहारीमा जनसङ्ख्या रहेको बताउँदै उहाँले भन्नुभयो, “सडक फराकिलो हुँदैछ ।  सवारी साधन, सवारी चालक तथा सुरक्षित सडकसम्बन्धी विभिन्न पुराना ऐन तथा नियम संशोधनका क्रममा छन् ।  आगामी दिनमा नयाँ ढङ्गले ट्राफिक नियम व्यवस्थापन हुनेछ । ” सवारी साधन दुर्घटना कम गर्ने प्रयासलाई निरन्तरता दिइएको उहाँले बताउनुभयो ।  
सुरक्षित सडक बनाउने अभियान स्वरूप ट्राफिक प्रहरीले पछिल्ला केही वर्ष विद्यालयस्तरका बालबालिकादेखि सर्वसाधारणलाई लक्षित गरी ट्राफिक महाशाखाले निरन्तर कार्यक्रम सञ्चालन गरिरहेको छ ।  ट्राफिक नियम उल्लङ्घन गर्नेलाई चालक अनुमतिपत्र लिन जाँदा कार्यालयमा दैनिक प्रशिक्षण दिने गरेको छ भने जथाभाबी बाटो काट्नेलाई सडकमै दण्ड तथा जरिवाना लगाउने व्यवस्था गरिएको छ ।  

थप समाचार
प्रतिकृया
नाम

ईमेल

ठेगना