नापीबाट प्रवाह हुने सेवा प्रविधियुक्त – मन्त्री सुब्बा

इटहरी, जेठ २४ गते । भूमिसुधार तथा व्यवस्थामन्त्री रामकुमार सुब्बाले नेपाल र नेपालीको सम्पत्तिको रक्षाका लागि कार्यरत प्राविधिक जनशक्तिले गर्ने सानो लापर्बाही वा कमजोरीले देश एवम् जनताको जिन्दगीभरको दुस्मन भइने अनि देशकै अस्तित्वमाथि प्रश्न चिह्न खडा गर्ने कार्य हुन नदिन सचेत हुनुपर्दछ भन्नुभएको छ ।

मन्त्री सुब्बाले आज सुनसरी जिल्लाको इटहरीमा नापी विभागले आयोजना गरेको पूर्वाञ्चल क्षेत्री तालिम गोष्ठीको उद्घाटनपछि बोल्नुहुँदै देशको भूगोलको ३५ प्रतिशत जमिनको मात्र स्रेस्ता व्यवस्थित रहेको बताउनुभएको छ ।

मन्त्री सुब्बाले देशलाई सुकुम्बासी हलिया, कमलरी, हरुवाचारुवा मुक्त बनाउन जरुरी रहेको उल्लेख गर्नुहुँदै यस विषयमा भूमिसुधार मन्त्रालयले नीति तयार पारेर मन्त्रिपरिषद्मा पु¥याइसकिएको जानकारी गराउनुहुँदै उहाँले जग्गा जमिनका क्षेत्रमा देखिएका समस्याको दीर्घकालीन निकास निकाल्ने विषयमा यो तालिम गोष्ठीले महत्वपूर्ण निचोड निकाल्ने विश्वाससमेत व्यक्त गर्नुभएको छ ।

मन्त्री सुब्बाले देशको भविष्यसँग गाँसिएको नापी विभाग वा नापी कार्यालयहरुसँग जग्गाको चुस्त र दुरुस्त गरी स्रेस्ता राख्ने प्रणालीलाई कम्प्युटर प्रणालीमा लैजान अति आवश्यक रहेको कुरामा पनि मन्त्री सुब्बाले जोड दिनुभएको छ ।

सोही अवसरमा नापी विभागका महानिर्देशक कृष्णराज बिसीले नापी विभाग र यसअन्तर्गत कार्यरत प्रविधिक कर्मचारीलाई राज्यले फिल्ड जाने फिल्ड भत्ता उपलब्ध गराउन नसक्दा बदनामी भइरहेको सत्य भएको उल्लेख गर्नुभएको छ ।

महानिर्देशक बिसीले सातवटा प्रदेशमा चाँडै नै प्रदेश विभाग स्थापना गर्ने तयारी भइरहेको बताउनुभयो ।

नापीको प्रादेशिक कार्यालयमा स्रोत र साधन सम्पन्न कार्यालय रहने र ती कार्यालयमा नापीसम्बन्धी हुने काम सबै प्रविधियुक्त रहने थप जानकारी दिनुहुँदै महानिर्देशक बिसीले यो विषयलाई सरकारले पनि संवेदनशील भएर व्यवस्थापनमा सघाउन जरुरी रहेको बताउनुभयो ।

कार्यक्रममा विभागका उपमहानिर्देशक गणेशप्रसाद भट्ट र विभागका प्रमुख नापी अधिकृत अनिल मरासिनीले गोष्ठी र तालिमको महत्वका विषयमा प्रकाश पार्नुहुँदै यस प्रकारका तालिमले जग्गाको नापी कार्यमा उच्च दक्ष सीपयुक्त जनशक्ति तयार हुने विश्वास व्यक्त गर्नुभयो ।

तालिम तथा गोष्ठीमा पूर्वाञ्चलका ३५ वटा नापी कार्यालयका प्रमुखहरु र ३५ जना नापीसम्बन्धी प्रविधिको ज्ञान प्राप्त गर्ने कर्मचारीलाई सहभागिता गराएको बताइएको छ । गोष्ठी दुई दिनसम्म चल्नेछ भने तालिम चार दिनसम्म चल्ने बताइएको छ । रासस

थप समाचार
प्रतिकृया
नाम

ईमेल

ठेगना