आधिकारिक ट्रेड युनियनको चुनाव, कर्मचारी सङ्गठन अग्रस्थानमा

करुण अर्याल/शम्भु प्रसाई

 

काठमाडौँ, जेठ २० गते ।  आधिकारिक ट्रेड युनियनको निर्वाचनमा एमाले निकट नेपाल निजामती कर्मचारी सङ्गठनले ८० निकायमा पहिलो स्थान हासिल गरेको छ ।  बुधबार साँझ ११ बजेसम्मको मतपरिणामअनुसार ११७ निकायमा भएको निर्वाचनमा नेपाली काँग्रेस निकट नेपाल निजामती कर्मचारी युनियनले २७ निकायमा अग्रता पाएको छ ।  
चुनावको आधिकारिक नतिजा भने बुधबार रातिसम्म सार्वजनिक गरिएको छैन ।  प्रमुख निर्वाचन अधिकृत गीताप्रसाद तिम्सिनाले सबै निर्वाचन केन्द्रको मतपरिणाम आइनसकेकाले बिहीबार बिहानसम्ममा मात्र औपचारिक जानकारी दिन सकिने बताउनुभयो ।  उहाँका अनुसार १० वटा जिल्लाको मतपरिणाम बिहीबार बिहानसम्म आइपुग्छ ।  
नेपाल निजामती कर्मचारी सङ्गठनले ४९ जिल्ला, ३१ विभाग, युनियनले १८ जिल्ला, नौ विभाग, मधेसी मञ्चले सात जिल्ला, नेपाल राष्ट्रिय कर्मचारी सङ्गठनले दुई विभागमा जित हासिल गरेको छ ।  न्याय परिषद्मा भने सङ्गठन र युनियनको मत बराबरी छ ।  election employyee
उपत्यकाभित्र ४२ निकायमा (मन्त्रालय तथा संवैधानिक निकाय)मा निर्वाचन भएको थियो ।  ११७ निकायको १२९ मतदान केन्द्रमा भएको निर्वाचनमा ८५ प्रतिशत मत खसेको निर्वाचन अधिकृतको कार्यालयले जनाएको  छ ।  
कर्मचारी सङ्गठनका अध्यक्ष पुण्य ढकालले आधिकारिक ट्रेड युनियनले अब कर्मचारी प्रशानको विकृति नियन्त्रण गर्ने र मुलुकमा  सुशासन बहालीका लागि अहोरात्र खटिने प्रतिक्रिया दिनुभयो ।  
कर्मचारी युनियनका अध्यक्ष सुबोध देवकोटाले युनियन दोस्रो भएको र आफूले सङ्गठनका अध्यक्षलाई बधाई दिइसकेको बताउँदै अब आधिकारिक टे«ड युनियनले कर्मचारीको हकहित र राष्ट्रको हितमा काम गर्ने प्रतिक्रिया दिनुभयो ।  
निर्वाचनका लागि मुख्य सचिव सोमलाल सुवेदीको संयोजकत्वमा गठित पाँच सदस्यीय अनुगमन समितिले उपत्यकाभित्रका मतदान केन्द्रको स्थलगत अनुगमन गरेको थियो ।  यस्तै सदस्य पद पनि मतपरिणामकै आधारमा समानुपातिक रूपमा विभाजन गरिने व्यवस्था छ ।  केन्द्रमा १६ जनाको समिति बन्नेछ ।
ट्रेड युनियन निर्वाचनमा केन्द्रस्तरमा पहिलो मत प्राप्त गर्नेले अध्यक्ष र कोषाध्यक्ष, दोस्रो मत पाउनेले महासचिव, तेस्रो मत पाउनेले उपाध्यक्ष र चौथो मत पाउनेले सचिव पद पाउने नियम छ भने जिल्लास्तरमा पहिलो मत पाउनेले अध्यक्ष र कोषाध्यक्ष, दोस्रो मत पाउनेले उपाध्यक्ष, तेस्रोले सचिव र चौथोले सहसचिव पद पाउने प्रमुख निर्वाचन अधिकृतको कार्यालयले जानकारी दिएको छ ।  मतपरिणामका आधारमा सदस्यको समानुपातिक वितरण हुने पनि निर्वाचन कार्यालयले जनाएको छ ।  
निर्वाचनपछि मुख्य सचिव सोमलाल सुवेदीले टे«ड युनियनको निर्वाचन दक्षिण एसिया क्षेत्रका लागि नमुना भएको  प्रतिक्रिया दिनुभयो ।  

थप समाचार
प्रतिकृया
नाम

ईमेल

ठेगना