नेपालगञ्जमा ठूला व्यक्तिको घर अगाडिको फोहोर मात्र दैनिक उठाउइने प्रवृति , दैनिक १० टन फोहोर सडकमा

सिराज खान
नेपालगञ्ज, जेठ १९ गते । नेपालगञ्ज उपमहानगरपालिकाले घरबाट दैनिक निस्किने फोहोर व्यवस्थापनमा भने खासै चासो देखाएको पाइएको छैन । ३२ टन निस्कने फोहोरमध्ये दैनिक २२ टन उठाउने र १० टन सडकमै छाड्ने गरिएको छ ।

वर्षौदेखि नै नगरमा  १० देखि १२ टनसम्म फोहोर सडकमै छरपष्ट हुँदै आएको छ । फोहोर व्यवस्थापन गर्न नसकेकै कारण उपहानगरपालिका केन्द्रीय मापदण्डमा सधैंजसो फेल हुने गर्दछ, जसले गर्दा अनुदान कटौती भएर आउने गरेको छ ।

वर्षेनी नेपालगञ्जको जनसंख्या र घरसंख्या बढिरहेको छ । केही समय पहिलेसम्म दैनिक २८ टन निस्किने फोहोर अहिले ३२ टन निस्किने गरेपछि फोहोर व्यवस्थापनका लागि उपमहानगरपालिकाले आवश्यक स्रोतसाधन बढाउन सकेको छैन । चारवटा ट्याक्टरले २० हजारभन्दा बढी घरधुरी र पसलको फोहोर एकै दिन उठाउन सम्भव नै नभएको उपहानगरपालिकाले जनाएको छ ।

उपमहानगरपालिका भएपछि थपिएका ११ वटा गाविसको फोहोर संकलन र व्यवस्थापन त अझै अस्तब्यस्त रहेको छ । साबिकका १७ वटा वडामै दैनिक निस्किने फोहोर उठाउन उपमहानगरपालिकालाई हम्मे–हम्मे छ ।

उपमहानगरपालिकाका सूचना अधिकारी ओबीराज आचार्यका अनुुसार, १७ वटा वडाबाट अहिले ३२ टनसम्म दैनिक फोहोर निस्किने गरेको छ । त्यसमध्ये २१÷२२ टनमात्रै उही दिन उठाएर व्यवस्थापन गरिन्छ, अरु फोहोर सडकमै त्यत्तिकै हुन्छन् । नगरको फोहोरलाई आलोपालो  लगाएर फाल्ने गरिएको छ ।

मध्य र सुदूरपश्चिमको केन्द्रविन्दु, व्यापारिक शहर नेपालगञ्ज बजारमा छरपष्ट देखिने फोहोरले शहरकै कुरुपता झल्काउने गरेको छ । सडकका बीचमै फालिएको फोहोरमा छाडा गाईगोरु, गधादेखि सुंगुरसम्म झुम्मिरहेका हुन्छन् । कतिपय क्षेत्रमा पशु झुम्मिएर वाहन आवागमनसमेत प्रभावित हुने गरेको देखिन्छ । फोहोरबाट निस्किने गन्धले रोगको संक्रमण बढाइरहेको छ ।

दिउँसो ४५-४६ डिग्रीसम्म तापक्रम हुने नेपालगञ्जमा सडकमा छताछुल्ल रहने फोहोरबाट आएको गन्धले स्वास्थ्यमा नराम्रो असर पु¥याउने स्वास्थ्यविद्को भनाइ छ । नेता या ठूलो व्यक्तिको घर अगाडिको फोहोर दैनिक उठाउने र अरु ठाउँको नउठाउने संस्कृतिको अन्त्य गर्नुपर्ने सहभागिता विकास समाजका अध्यक्ष दिवाकर शर्मा लम्सालले सुझाव दिनुभयो । ‘नगरको फोहोर उठाएर पनि फाल्ने ठाउँ व्यवस्थित भैनसकेकाले मसानघाट छेउ व्यक्तिगत जग्गामा उपमहानगरपालिकाले फोहोर फाल्दै आएको छ, यसलाई पनि छिट्टै ‘डम्पिङ्ग साइट’ व्यस्थित गरिनु पर्दछ,–‘उहाँले भन्नुभयो ।
घरबाट निस्किने फोहोर राख्न विभिन्न स्थानमा रिङहरु राखिने सूचना अधिकारी आचार्यले जानकारी दिनुभयो ।

थप समाचार
प्रतिकृया
नाम

ईमेल

ठेगना