बजेटका सकारात्मक पक्षको काँग्रेसले स्वागत गर्ने

NCकाठमाडौँ, जेठ १७ गते ।  प्रमुख प्रतिपक्षी नेपाली काँग्रेसले सरकारले सपना बाँडेर राजनीतिक लाभ लिने गरी बजेट ल्याएको निष्कर्ष निकालेको छ ।  अर्थमन्त्री विष्णु पौडेलले शनिबार संसद्मा प्रस्तुत गर्नुभएको आ.व. २०७३।७४ को बजेटको समीक्षा गर्न आइतबार बसेको काँग्रेस संसदीय दल र केन्द्रीय कार्यसमितिको संयुक्त बैठकले यस्तो निष्कर्ष निकाले हो ।  बैठकले बजेटका सकारात्मक र राम्रा कुराको भने स्वागत गर्ने निर्णय गरेको छ ।  
काँग्रेस महामन्त्री र डा. शशाङ्क कोइरालाले सोमबारबाट संसद्मा सुरु हुने बजेटसम्बन्धी छलफलमा कसरी प्रस्तुत हुने भन्ने विषयमा बैठकमा विचार प्रस्तुत भएको जानकारी दिनुभयो ।  
‘बजेटका सकारात्मक र राम्रा पक्षको स्वागत गर्दै नकारात्मक र हावादारी कुरा जनतालाई बुझाउनुपर्छ भन्ने अधिकांशको भनाइ छ । ’ महामन्त्री कोइरालाले भन्नुभयो ।  उहाँले प्रस्तुत बजेटको कार्यान्वयन कसरी हुनसक्छ भन्ने चिन्ता पनि सबै साथीमा देखिएकाले संसद्मा हुने छलफलमा गम्भीर रूपमा कुरा उठाउने निष्कर्ष रहेको बताउनुभयो ।  
बैठकमा काँग्रेसका तर्फबाट विगतमा पटक पटक अर्थमन्त्री बन्नुभएका डा. रामशरण महत र महेश आचार्यलगायत नेताले प्रस्तुत बजेटले व्यापक मूल्यवृद्धि गराउने र त्यसको भार सर्वसाधारण जनताले बोक्न बाध्य हुनुपर्ने धारणा राख्नुभएको थियो ।  केन्द्रीय सदस्य डा. प्रकाशशरण महतले बजेटको आकार राष्ट्रिय योजना आयोगको सिफारिसलाई पनि लत्याउने गरी आएको उल्लेख गर्दै स्रोत जुट्न नसक्ने, महँगी वृद्धि हुने, ठूलाठूला आयोजना पूरा हुन नसक्ने अवस्था आउने भएकाले सरकारलाई सचेत गराइने बताउनुभयो ।  
‘जनतालाई एक हातले दिएर अर्को हातले जनताबाटै लिने ढङ्गबाट बजेट आएकोमा हाम्रो गम्भीर आपत्ति हो’, नेता महतले भन्नुभयो, ‘जनतालाई तत्काल सपना बाँडेर राजनीतिक लाभ लिने ढङ्गबाट बजेट ल्याइएको हो भन्ने हाम्रो निष्कर्ष छ । ’ बैठकमा सरकारले राजस्व कर र विदेशी सहयोगलगायतको लक्ष्य पनि पूरा गर्न सक्नेमा अधिकाङ्शले आशङ्का व्यक्त गरेका थिए ।  
बैठकमा संसद्मा बजेट प्रस्तुत हुनु अघिल्लो दिन नै राजस्वका दर र कुल आयव्ययको विवरण छापामाध्यममा हुबहु प्रकाशन भएको विषयसमेत गम्भीर रूपमा कुरा उठेको थियो ।  
केन्द्रीय सदस्य डा. महतले बजेटमा करका दरको कुरा पनि हुने भएकाले यसमा काँग्रेसले गम्भीर आशङ्का गरेको बताउनुभयो ।  बैठकको प्रारम्भमा काँग्रेस सभापति शेरबहादुर देउवाले बजेटमा भएका नकारात्मक र प्रचारमुखी कुरालाई संसद्मा र जनताबीचमा गएर स्पष्ट पार्न सांसद र केन्द्रीय सदस्यहरूलाई निर्देशन दिनुभएको थियो ।  


थप समाचार
प्रतिकृया
नाम

ईमेल

ठेगना