इज्जतका लागि आफैं अदालत जान थाले फरार अपराधीहरु !


शशिधर पराजुली


विराटनगर, जेठ ११ गते । अदालतबाट अपराधी प्रमाणित भएर पनि लामो समयसम्म कैद तथा जरिवाना भुक्तान नगरी फरार भएका अपराधीहरु धमाधम पक्राउ पर्न थालेपछि मोरङमा फरार अपराधीहरु आफैं अदालत जाने क्रम बढेको छ ।

जिल्ला प्रहरी कार्यालय मोरङले जिल्ला, इलाका र प्रहरी चौकी तहमा विशेष संरचना निर्माण गरी फरार भएका अपराधीहरुको खोजीलाई तीब्र बनाएपछि ७५ दिनमा दुई सय ३७ जना फरार अपराधी पक्राउ गरेको थियो । धमाधम फरार अपराधीहरु पक्राउ पर्न थालेपछि फरार रहेका अपराधीहरु आफैं अदालतमा हाजिर भएर सजाय भुक्तानको प्रक्रियामा छन् ।  

अघिल्लो साता २७ जना फरार अपराधीहरु अदालतको सम्पर्कमा पुगेको जिल्ला प्रहरी कार्यालय मोरङका प्रहरी उपरीक्षक सन्दिप भण्डारीले जानकारी दिनुभयो । प्रहरी उपरीक्षक भण्डारीका अनुसार प्रहरीले पक्राउ गरेको खण्डमा सामाजिक रुपमा बदनाम हुने, बढी हल्ला हुने आदि डरले बर्षौंदेखि फरारको रुपमा समाजमा लुकेका व्यक्तिहरु अदालतमा पुगेर फैसला अनुसारको सजाय भोग्न तयार भएका हुन् ।

अदालतबाट ज्यान मार्ने उद्योग गरेको, हत्या गरेको, डकैती गरेको, जबरजस्ती करणी तथा मानव बेचविखन गरेको जस्ता जघन्य अपराधमा सजाय सुनाइएका व्यक्तिहरु फरार अपराधीको सुचिमा थिए । त्यस बाहेक देवानी मुद्दामा सजाय भएका, ठगी गरेका आदि मुद्दाका फरारहरुले पनि कैद वा जरिवाना नतिरी लुकेर बस्दै आएका सबैको विवरण तयार पारेर जिल्ला प्रहरी कार्यालय मोरङले पक्राउ अभियानलाई तिब्रता दिएको थियो ।
मोरङका प्रहरी उपरीक्षक भण्डारीले दुई महिनाको अवधिमा दुई सय ३७ जनालाई पक्राउ गरेर अपराध गरेर छुट पाउन सकिदैन भन्ने सन्देश दिन सफल भएको जानकारी दिनुभयो । लामो समयदेखि फरार रहेर समाजमा स्थापित भइसकेका व्यक्ति पक्राउ पर्दा समाजले पनि सहजरुपमा नपत्याउने गरेको उहाँको अनुभव छ । त्यस वाहेक अदालतले चुस्त दुरुस्त तथ्यांक नराखिदिदाँ पनि समस्या भएको उहाँ बताउनुहुन्छ ।

फरार अपराधी पक्राउ गर्ने क्रममा ४० जना सजाय काटिसकेका व्यक्तिलाई पनि पक्राउ गरिएको थियो । पछि उनीहरुलाई छोडिएको थियो । एसपी भण्डारीले अदालतले सजाय भुक्तान गरेको पुर्जी दिएपनि आफ्नो तथ्यांक अपडेट नराख्दा उनीहरुलाई पक्राउ गर्नुपरेको बताउनुभयो ।
फरार अपराधी पक्राउ गर्ने अभियान सफलतापूर्वक संचालन गरिरहेको मोरङ प्रहरीले अब पुराना मुद्दाहरुको अनुसंन्धान सुरु गर्ने जानकारी दिइएको छ ।

थप समाचार
प्रतिकृया
नाम

ईमेल

ठेगना