अम्रिसो खेतीबाट एकै वर्षमा तीन पटक आम्दानी !

रेखीराम राना

पाल्पा, जेठ ९ गते । बारीको डिलमा लगाएको अम्रिसोले एकै वर्षमा तीन पटक आम्दानी दिन थालेपछि पाल्पाका किसान दङ्ग परेका छन् । बारीको छेउमा भूक्षय रोक्न रोपिएको अम्रिसोको फुल, घाँस र बिरुवाले एकै वर्षमा तीन पटकसम्म आम्दानी दिन थालेपछि यहाँका किसान खुसीले गद्गद् भएका छन् ।
जिल्लाको पश्चिम भेगका बासिन्दाले आफ्नो चार÷पाँच रोपनी बारीमा लगाएको अम्रिसोबाट फुलको कुचो बनाएर सबैभन्दा बढी आम्दानी लिएका छन् । यस्तै जेठ र असार महिनामा बिरुवा बिक्री गरेर कमाई भएको छ भने फागुन चैत महिनामा अम्रिसोको घाँस बिक्रीबाट आम्दानी गरिरहेका छन् ।
जिल्लाको पश्चिम भेगमा रहेका पालुङ्मैनादी, भुवनपोखरी, फेक, कचल, जुठापौवा गाविसका बासिन्दाले अम्रिसोबाट वर्षमा तीन पटकसम्म फाइदा लिन सफल छन् । पालुङ्मैनादी–५,का रामबहादुर कुँवरले यो वर्ष मात्र अम्रिसोको फुल र बिरुवा, घाँस बिक्री गरेर दुई लाख रुपियाँ आम्दानी गरेको बताउनुभयो । वर्षका तीन पटक कम मिहिनेतमा राम्रो फाइदा लिएको बताउँदै उहाँले प्रति कुचो ४० रुपियाँ, प्रति बिरुवाको तीन रुपियाँ र प्रति भारी घाँसको एक सय रुपियाँमा बिक्री गरेको सुनाउनुभयो ।
अम्रिसोको फुलबाट बनेको कुचाबाट सबैभन्दा बढी आम्दानी लिन सकिने यहाँका किसानको भनाई छ । यस्तै अम्रिसोको बिरुवा पाल्पा, अर्घाखाँची र तनहुँ जिल्लामा जाने गरेको छ । अम्रिसोको बिरुवा पाल्पा, अर्घाखाँची र तनहुँ जिल्लामा माग बढी माग छ भन फुलको माग पाल्पा, रुपन्देही, भैरहवामा अत्याधिक रहेको किसानको भनाई छ ।
पहिले अम्रिसो रोप्ने बेलामा आम्दानी हुने विश्वास नभएपनि पछि आम्दानी राम्रो हुँदा आफू निकै हर्षित ् भएको फेकका किसान नमकुमारी बगालेले बताउनुभयो , के आम्दानी होला र भनेर रोपेको अम्रिसोले यो वर्ष डेढ लाख रुपियाँ आम्दानी दियो उहाँले भन्नुभयो मिहिनेत गर्न खासै नपर्ने यसबाट घरमै बसेर आम्दानी लिएकी छु ।
वर्षात्को समयमा विरुवा बिक्री हुन्छ, हिउँदमा अम्रिसोको फुल र घाँस बिक्री हुन्छ, त्यसैले गाउँमा अम्रिसो खेती गर्न कुनै अप्ठेरो नभएको किसानको भनाई छ । अम्रिसाको विरुवाबाट जिल्लाको पश्चिम भेगका केही १० बढी गाउँबाट मात्र वार्षिक ५० लाख देखि एक करोडसम्म आम्दानी भित्रिने गरेको स्थानीय बासिन्दा बताउँछन् ।
अम्रिसोबाट राम्रो आम्दानीले यहाँका बासिन्दाले घरको दैनिक खर्च, छोराछोरीको पढाईमा खर्चेका बताउँछन् । यस्तै भुकम्पबाट चर्किएको घर मर्मतमा समेत अम्रिसो बिक्री गरेको पैसा खर्च गरेको फेक–१, यमकला रायमाझीले बताउनुभयो । अम्रिसो खेती यस भेगका बासिन्दाका लागि आम्दानी गर्ने र घरको भैरपरी आउने खर्च टार्न सहयोगी बनेको उहाँले बताउनुभयो ।
सात वर्षअघि जिल्ला वन कार्यालय पाल्पाले थालेको अम्रिसो रोपण अभियान यतिबेला आम्दानीको स्रोत बनेको छ । पाल्पाका किसानले कवुलियती वन कार्यक्रम मार्फत तथा अन्य सामुदायिक वनमा समेत अम्रिसोको खेती गर्दै आएका छन् ।

थप समाचार
प्रतिकृया
नाम

ईमेल

ठेगना