कृषि विकास हाकिमद्धारा मरेका कुखुरा वितरण

गोकर्ण दयाल


बैतडी, जेठ ८ गते । कहिले मकैमा घोगा नलाग्ने, धानमा बाला नै नलाग्ने र वितरण गरेका माहुरीको घारमा माुहुरी नभेटिने गरी पटक पटक विवादमा आउँदै गरेको विश्व खाद्य संगठन ( एफएओ ) को सहयोगमा जिल्ला कृषि विकास कार्यालय बैतडीका हाकिमले किसानरुलाई वितरण गरेका आठ हप्ताका पाँचसय कुखुराका चल्ला घर नपुग्दै  बाटोमै मरेका छन् ।
 
एफएओको आर्थिक  सहयोगमा जेठ पहिलो साता बैतडीको देउलेक, गोकुलेश्वर, कोटपेटरा, न्वाली, श्रीकेदार, पाटन, हटैराज, हाट, गाल्लेक र कैलपाल गाविसमा सचालित कृषि तथा खाद्य सुरक्षा कार्यक्रम अन्तरगत जिल्ला कृषि विकास कार्यालयले किसानलाई मरेका कुखरा वितरण गरेको हो ।

जिल्ला कृषि विकास कार्यालय बैतडीका प्रमुख कमलेश तिवारीले आफु चढ्ने गाडी प्रयोग गरि  नेपालगंजबाट असुरक्षित तरिकाले ल्याईएका पाँचसय कुखुरा बैतडी नपुग्दै बाटोमै मरेका हुन् ।  

कुखुरा विकास फार्म नेपालगंजबाट ल्याएका आठ हप्ताका पाँचसय चल्ला बेहोस अवस्थामै सडक छेउका किसानलाई वितरण गरेको देउलेकका महिला किसान हिरा धामीले बताउनु भयो , “ कुखुरा बेहोस मात्रै भएका हुन्, घरमा लैजाने बित्तिकै होसमा आउँछन् भनियो तर, घरमा लैजाँदा कुखुरा होसमा नआएपछि फालिदियौं । ”  
    
कुखुरा मरेका  विषयमा बुझ्दा  जिल्ला कृषि विकास कार्यालयका प्रमुख तिवारीले हावाहुरीले गर्दा बाटोमा कुखुरा मरेको र वितरण गरेको स्वीकार गर्नुभएको छ । यता किसानहरुले भने कार्यालय प्रमुख तिवारीले ढुवानी भाडा बचाउन कार्यालयको गाडी प्रयो गरी असुरक्षित तरिकाले कुखुरा ल्याउँदा बाटोमै मरेको आरोप लगाएका छन् ।

कृषि विकास कार्यालय प्रमुख तिवारीले यस अघि पनि किसानलाई माहुरी वितरण गर्ने भन्दै प्राविधिक दृष्टिले उपयुक्त नभएका घारमा माहुरी राखेर जिल्लाको श्रीकेदार, न्वाली र गोकुलेश्वरमा माहुरी वितरण गर्दा दुई दिनमै माहुरी उडेर गएका थिए । माहुरी निरीक्षण गर्दा घारमा एउटा पनि माहुरी नदेखिएको नागरिक समाज बैतडीका अगुवा गणेश ठकुराठीले बताउनुभयो । यो विषयमा अख्तियारमा उजुरी दिएको ठगुन्नाले बताउनुभयो ।

थप समाचार
प्रतिकृया
नाम

ईमेल

ठेगना