भव्य कार्यक्रमका साथ बुद्धजयन्ती मनाइँदै

buddhaलुम्बिनी (रूपन्देही), जेठ ८ गते ।  विश्व शान्तिको मुहान, भगवान् शाक्यमुनि गौतम बुद्धको जन्मस्थल लुम्बिनीमा शनिबार आयोजना गर्न लागिएको २५६०औँ बुद्धजयन्ती तथा लुम्बिनी दिवसमा सहभागी हुन विदेशी तथा स्वदेशी पाहुना आउने क्रम सुरु भएको छ ।
बुद्धजयन्तीमा भाग लिन चीन, श्रीलङ्का, भारत, थाइल्यान्ड, अमेरिका, अस्ट्रेलिया, बर्मा, मङ्गोलियालगायतका देशबाट बौद्धमार्गी भिक्षु, भिक्षुणी, लामा गुरु, बज्रयानी बौद्ध गुरु, उपासक र उपासिका लुम्बिनी आइपुग्नुभएको छ ।
लुम्बिनी आइपुग्नुभएका अधिकांश विदेशी पाहुना हवाईमार्ग हुँदै लुम्बिनी आउनुभएको हो ।  कतिपय पाहुना सडकमार्गबाट लुम्बिनी आउनुभएको लुम्बिनी विकास कोषले जानकारी
दिएको छ ।
राष्ट्रपति भण्डारी लुम्बिनीमा
२५६०औँ बुद्धजयन्तीको औपचारिक कार्यक्रममा सहभागी हुन राष्ट्रपति विद्यादेवी भण्डारी लुम्बिनी आइपुग्नुभएको छ ।  बिहान १० बजेदेखि सुरु हुने बुद्धजयन्तीको औपचारिक कार्यक्रममा उहाँ प्रमुख अतिथिका रूपमा सहभागी हुनुहुनेछ ।  उहाँलाई कोषका पदाधिकारीले मायादेवी मन्दिरको प्रवेशद्वारअगाडि स्वागत  गरेका थिए ।  
विशेष हेलिकोप्टरबाट बिहान ११ बजे लुम्बिनी आइपुग्नुभएका राष्ट्रपति भण्डारीले झन्डै ४५ मिनेट लुम्बिनीस्थित मायादेवी मन्दिरमा बिताउनुभएको  थियो ।  उहाँले मायादेवी मन्दिरमा पूजाआजा पनि गर्नुभयो ।  
त्यसपछि उहाँ मायादेवी परिसरमा आयोजित अनौपचारिक कार्यक्रममा सहभागी हुनुभएको थियो ।  सो कार्यक्रममा रूपन्देहीका प्रमुख जिल्ला अधिकारी विष्णुप्रसाद ढकालले लुम्बिनीको पुराताŒिवक महŒवका बारेमा राष्ट्रपति भण्डारीलाई जानकारी गराउनुभएको थियो भने कोषका सदस्यसचिव अजितमान तामाङले लुम्बिनी गुरुयोजनाका विषयमा जानकारी गराउनुभएको थियो ।  राष्ट्रपति भण्डारीका साथमा पर्यटन तथा संस्कृति सचिव प्रेम राई र क्षेत्रीय प्रशासक शङ्कर कोइराला हुनुहुन्थ्यो ।  लुम्बिनीमा भएको कार्यक्रमपछि राष्ट्रपति भण्डारी कपिलवस्तुको
तिलौराकोट र नवलपरासीको रामग्राम पुग्नुभएको थियो ।  
कोषले दिएको जानकारीअनुसार भुटान, रसिया, संयुक्त राष्ट्रसङ्घका प्रतिनिधि तथा अन्य मुलुकका मन्त्री तथा पाहुना आउने क्रम जारी रहेको कोषका सदस्यसचिव अजितमान तामाङले जानकारी दिनुभयो ।  उहाँका अनुसार कार्यक्रममा सहभागी हुन गृहमन्त्री, संस्कृति, पर्यटन तथा नागरिक उड्डयन मन्त्री र मुख्य सचिव साँझ लुम्बिनी आइपुग्नुभएको छ ।  
कार्यक्रममा सहभागी हुन थाइल्यान्डका पर्यटन मन्त्री लुम्बिनी आउने पक्का भएको कोषका सदस्यसचिव तामाङले जानकारी दिनुभयो ।  शनिबार बिहानसम्म पनि पाहुना आउने क्रम जारी रहने उहाँले
उल्लेख गर्नुभयो ।
बुद्धजयन्तीको तयारी पूरा
लुम्बिनीमा आयोजना गर्न लागिएको २५६०औँ बुद्धजयन्ती एवं लुम्बिनी दिवस २०७३ को तयारी पूरा भएको छ ।
‘लुम्बिनी नेपाल ः भगवान् बुद्धको जन्मस्थल एवं बुद्ध धर्मको उद्गमस्थल’ भन्ने मूल नाराका साथ मनाउन लागिएको बुद्धजयन्ती तथा लुम्बिनी दिवसको तयारी पूरा भएको कोषले जानकारी दिएको छ ।
लुम्बिनीस्थित लुम्बिनी सङ्ग्रहालय नजिक आयोजना गरिने धार्मिक कार्यक्रममा एक हजार जना लामा गुरु सहभागी हुने क्रम सुरु भएको लुम्बिनी विकास कोषका सदस्यसचिव तामाङले जानकारी दिनुभयो ।
शनिबार आयोजना हुने कार्यक्रमका लागि लुम्बिनीलाई निकै आकर्षक ढङ्गले सजाइएको छ ।  विगतको भन्दा निकै महŒवका साथ हेरिएको यस पटकको बुद्धजयन्तीलाई भव्य रूपमा सफल पार्न लुम्बिनीको सरसफाइदेखि सुरक्षासम्म निकै ध्यान दिइएको छ ।  लुम्बिनी जाने बाटोमा विभिन्न ठाउँमा स्वागत द्वार निर्माण गरिएको छ भने विभिन्न स्थानमा नेपालको राष्ट्रिया झण्डा र बौद्ध झण्डा फहराइएका छन् ।  लुुम्बिनीस्थित मायादेवी मन्दिर, शान्ति दीप, कार्यक्रम स्थललाई बेहुलीजस्तै
सजाइएको छ ।
सुरक्षा व्यवस्था कडा
कार्यक्रमलाई ध्यानमा राखेर सरकारले दरिलो सुरक्षा व्यवस्था मिलाएको छ ।  राष्ट्रप्रमुख सहभागी हुने कार्यक्रमलाई भव्य रूपमा सम्पन्न गर्न आवश्यक सम्पूर्ण सुरक्षा प्रबन्ध मिलाइएको क्षेत्रीय प्रशासक कोइरालाले जानकारी दिनुभयो ।  कार्यक्रम अवधिभर नेपाल प्रहरी, नेपाली सेना, सशस्त्र प्रहरी, राष्ट्रिय अनुसन्धान तथा ट्राफिक प्रहरीले सुरक्षा दिने उहाँले जानकारी दिनुभयो ।  विदेशी पाहुनाका लागि पनि सुरक्षा प्रबन्ध मिलाइएको छ ।

थप समाचार
प्रतिकृया
नाम

ईमेल

ठेगना