कर्णालीमा भारीबर्षासँगै पहिरो,राजमार्ग अबरुद्ध एक महिलाको मृत्यु


बिस्नप्रसाद न्यौपाने


कालिकोट जेठ ३ गते । कर्णालीमा भारी बर्षासँगै कालिकोट र दैलेखको सिमानामा पर्ने दहीखोला बजारमा गएको पहिरोले एक महिलाको ज्यान गएको छ । पहिरोमा पुरिएर दैलेख पिपलकोट गाबिस ६ निवासी गीता थापा मगरको मृत्यु भएको हो ।
विगत लामो समयदेखी खडेरी परिरहेका बेला एक्कासी आएको भारी बर्षाले कर्णाली राजमार्ग पनि अबरुद्ध भएको छ, भने एक जना सडकमा काम गर्ने मजदुर बेपत्ता भएका छन्  । प्रहरीका अनुसार सडकमा काम गर्ने मजदुरको सनाखत हुन सकेको छैन् ।


पहिरोमा पुरिएकी थापाको शव नेपाली सेनाको कर्णाली करीडोर निर्माण कार्यदल, जिल्ला प्रहरी कार्यालय कालिकोट र प्रहरी चौकी दैलेख राकमका प्रहरीले उद्दार गरेका छन् । एक्कासी ठुलो मात्रामा परेको अविरल वर्षापछि गएको पहिरोमा दुई ट्याक्टर, एक मोटरसाईकल पनि पुरिएका छन् । छ वटा पसल पनि बगाएको प्रहरीले जनाएको छ । बर्षापछि एक्कासी आएको पहिरो ठुलो क्षति गरेको दहीखोलामा लोकश अर्डर सप्लायर्स चलाएर बसेका जवासिंह सुनारले बताउनुभयो ,‘एक्कासी पहिरो आयो , ठुलो धनजनको क्षति भएको छ ।’
पहिरो कालिकोटको सिमानादेखि दैलेखको घट्टेखोलासम्म ठाउँ ठाउँमा गएकाले सडक खुलाउन समय लाग्ने प्रहरी चौकी राकमका इन्चार्ज अर्जुन बमले बताउनुभयो । ‘कर्णालीको करिब तीन किलोमिटर सडक खण्डको ठाउँ ठाउँमा पहिरो गएको छ ।’ उहाँले भन्नुभयो, ‘धेरै ठाउँमा पहिरो गएकाले राजमार्ग खुल्न केही दिन लाग्न सक्छ ।’
पहिरो गएको दहीखोलामा सडक निर्माण कार्यमा संग्लन एक सय जना स्थानीयबासी गरि करिब दुई सय जना रहेको र पहिरो आउदा सबै जना भाग्न सफल भएको नरबहादुर बस्नेतले बताउनुभयो । ‘बेलुका सडकमा मजदुरहरु काम गरिरहेका थिए ।’ उहाँले भन्नुभयो, ‘पहिरो आउँदा करिब २ सयजना भन्दा बढी यो बजारमा रहेका थिए ।’ अबिरल बर्षाका कारणले कालिकोटमा टेलिफोन र मोवाईल सेवासमेत अबरुद्ध भएको छ ।

थप समाचार
प्रतिकृया
नाम

ईमेल

ठेगना