भोकै बिद्यालय आएका विद्यार्थी कक्षामै बेहोस हुन्छन्


सन्तोष राउत
सोलुखुम्बु (छेस्काम), जेठ ३ गते । बालबालिकालाई विद्यालय जानुअघि विद्यालय पोसाक लगाइदिने, कपाल कोरिदिने, सरसफाई गरिदिने, गृहकार्य पूरा गरे नगरेको हेर्ने र सकेसम्म उनीहरुलाई विद्यालयसम्म पु¥याइदिने कुरा धेरै अभिभावकका लागि नौलो हुँदैन । तर सोलुखुम्बुको दुर्गम विकट गाविस बुङ, छेस्कामका बालबालिका विद्यालय जानुअघि अभिभावकको स्याहारको त के कुरा समयमा पेटभरी खान समेत पाउँदैनन् ।

सोलुखुम्बुको विकट गाविस छेस्काम माविमा प्राथना गर्दै रहेका यी विद्यार्थीमध्ये अधिकाँश भोकै विद्यालय आएका हुन्छन् ।

बिहान उज्यालो भुँईमा खस्नासाथ घाँस, दाउरा तथा गाईबस्तु चराउनका लागि घरबाट निस्कने बालबालिका विद्यालय जाने समय भएपछि हतारहतार घर आउँछन् तर घरमा अभिभावक पनि काममा व्यस्त भएकाले खाना पाकेकै हुँदैन । अनि उनीहरु विद्यालयको पोसाक लगाएर, पुस्तक भएको झोला टिपेर खानै नखाई विद्यालय दौडन्छन् । छेस्कामका एक अभिभावक सीता कुलुङ भन्नुहुन्छ, “कृषि मुख्य पेशा भएकाले हातमुख जोर्नका लागि खेती गर्नुपर्ने र खेतीको काम अभिभावकले मात्र गर्न नभ्याउने भएकाले छोराछोरीलाई पनि काममा लगाउनु पर्छ, कतिदिन भोकै विद्यालय जान्छन् त कति दिन विद्यालय जान समेत पाउँदैनन्”
भोकभोकै विद्यालय पुगेपछि पढ्नमा ध्यान दिन नसक्ने छेक्काम माध्यामिक विद्यालयमा कक्षा ९ मा अध्ययनरत साधना कुलुङले गुनासो गर्नुभयो  । “भोकभोकै विद्यालय आएको त कति हो कति, त्यस्ता दिन गनेर साध्य नै छैन, के गर्नु काम नगरी हुन्न, खान पकाउनै नभ्याएपछि, कोही बेला अघिल्लो दिनको बासी भात तथा मकै, रोटी खाँदै विद्यालय जान्छौँ, त्यो पनि बसेर खाँदा विद्यालय पुगिँदैन” उहाँले भन्नुभयो ।
साधना जस्तै गुदेल तथा बुङ माविमा अध्ययनरत अधिकांश विद्यार्थीको पनि बाध्यता यस्तै रहेको छ । विद्यालयबाट नजिकको बस्तीका बालबालिकालाई यस्तो समस्या कम परे पनि विद्यालयबाट टाढाको दूरीमा रहेका विद्यार्थीहरुले यस्तो समस्या बढी खेप्नु परेको छ । उनीहरुमध्ये धेरैजसोले बेलुकी नै विद्यालय जाने झोलामा खाजा राखिसक्छन् र दिउँसो विद्यालयमा खान्छन् तर धेरै साँझ घर फर्कदासम्म पनि भोकै हुन्छन् ।
बुङ माविको कक्षा १० मा अध्ययनरत नौमान कुलुङले भन्नुहुन्छ, “पेटमा जस्तोसुकै भोक भए पनि विद्यार्थी भएपछि भोक प्यासजस्ता समस्यालाई सामान्यरुपमा लिएर पढ्नुपर्छ” । बिहान विद्यार्थी भोकै विद्यालय आएपछि विद्यालयको पढाइमा समेत बाधा पुग्ने गरेको छ । छेस्काम माविका प्रधानाध्यापक गुरुप्रसाद राईकाअनुसार विद्यार्थी भोकै विद्यालय आएपछि भोक खप्न नसकेर दिउँसोको खाजा खाने छुट्टीमै घर जान्छन् । भोकै विद्यालय आएकाले बस भन्न पनि कठिन हुने भन्दै कतिपय विद्यार्थी भोकले गर्दा कक्षामै मुर्छासमेत पर्ने गरेको उहाँको भनाइ छ ।
विद्यार्थी भोकै विद्यालय आउने समस्या कोसीपारीका गुदेल तथा छेस्काममा चर्को रहेको शिक्षकहरु बताउँछन् । अभिभावकको कमजोर आर्थिक अवस्था, छोराछोरीको खानपिनका सम्बन्धमा चेतनाको अभावजस्ता कारण यो समस्या आएको छ भने यस समस्याबाट एकातिर बालबालिकाले क्षमता भएर पनि आफ्नो पढाइमा राम्रो गर्न सकिरहेका छैनन् ।

थप समाचार
प्रतिकृया
नाम

ईमेल

ठेगना