ट्रेड युनियनको निर्वाचन पक्का

काठमाडौँ, जेठ ३ गते ।  आगामी जेठ १९ गते हुने आधिकारिक ट्रेड युनियनको निर्वाचन कार्यक्रम आइतबार सार्वजनिक गरिएको छ ।  निर्वाचन कार्यक्रम प्रकाशित गरिएपछि अब भने निर्धारित मितिमा चुनाव हुने पक्का भएको छ ।  
यसअघि क्रियाशील सात ट्रेड युनियनमध्ये दुई ट्रेड युनियनले चुनावी विधि र प्रक्रियामा असहमति जनाउँदै चुनावमा भाग नलिने भएपछि निर्वाचन कार्यक्रम सार्वजनिक भएर पनि वैशाख १० गतेका लागि तोकिएको चुनाव स्थगित भएको थियो ।  त्यसपछि सरकारले जेठ १९ का लागि अर्काे मिति तोकेको हो ।
निजामती सेवा नियमावलीमा रहेको २० प्रतिशत थ्रेसहोल्डको व्यवस्थामा पुनरावलोकन नगरिएसम्म चुनावमा भाग नलिने अडानमा केही ट्रेड युनियन उभिएपछि चुनाव सार्नु परेको थियो ।  सरकारले विद्यमान २० प्रतिशतको थ्रेसहोल्डलाई १० प्रतिशतमा झारेपछि सबै ट्रेड युनियन चुनावमा भाग लिन तयार भएका कारण अब भने चुनाव हुने सुनिश्चित भएको हो ।  
प्रमुख निर्वाचन अधिकृतको कार्यालयले प्रकाशित गरेको निर्वाचन कार्यतालिकाअनुसार जेठ ४ गते  मतदाता नामावली प्रकाशन, जेठ ६ गतेसम्म नामावलीउपर दाबी विरोध र जेठ ८ गते अन्तिम मतदाता नामावली प्रकाशन गरिनेछ ।  
यस्तै, प्रवक्ता गिरीले जेठ ९ गते दिनको १ बजेबाट अपराह्न ५ बजेसम्म उम्मेदवारी दर्ता, जेठ १० मा बिहान १० देखि मध्याह्न १२  बजेसम्म उम्मेदवारी फिर्ता र सोही दिन १ देखि अपराह्न ५ बजेसम्म उम्मेदवारको नाममा दाबी विरोधको कार्यक्रम रहेको जानकारी दिनुभयो ।
कार्यतालिकाअनुसार, जेठ ११ गते अपराह्न १ बजे उम्मेदवारको अन्तिम नामावली प्रकाशन र जेठ १९ गते बिहान ९ देखि साँझ ५ बजेसम्म मतदान हुनेछ ।  
आधिकारिक ट्रेड युनियनको निर्वाचनका दिन जेठ १९ लाई सरकारले सार्वजनिक बिदा दिने निर्णय यसअघि नै गरिसकेको छ ।  निजामती सेवामा करिब ८० हजार कर्मचारीमध्ये ५५ हजार जति मतदाता छन् ।  

थप समाचार
प्रतिकृया
नाम

ईमेल

ठेगना