शैक्षिक संस्थाबाट नीति तथा कार्यक्रमको स्वागत

काठमाडौँ, वैशाख २९ गते । शिक्षाका लागि राष्ट्रिय अभियान (एनसिइ नेपाल)ले सरकारको नीति तथा कार्यक्रममा भएका शिक्षासम्बन्धी प्रावधानको स्वागत गरेको छ । राष्ट्रपति विद्यादेवी भण्डारीले यही जेठ २६ गते व्यवस्थापिका–संसद्मा प्रस्तुत गर्नुभएको आर्थिक वर्ष २०७३÷७४ को सरकारका नीति तथा कार्यक्रममा संविधानको व्यवस्थाबमोजिम माविसम्म निःशुल्क र अनिवार्यको प्रावधानसहित शिक्षालाई विद्यालय तहदेखि नै व्यावसायिक बनाउन विज्ञानलगायत प्राविधिक, व्यावसायिक तथा सीपमूलक शिक्षामा जोड दिने भनी आएको घोषणा सकारात्मक भएको सो सञ्जालले जनाएको छ ।

शिक्षामा काम गर्ने २८६ संस्थाको सञ्जाल रहेको सो अभियानले दलित तथा सीमान्तकृत समुदायका बालबालिकाका लागि सबै तहको शिक्षा निःशुल्क बनाउने नीति तथा विभिन्न कारणबाट विद्यालय आउन नसक्ने विद्यार्थीलाई लक्ष्य गरी प्रसारण गर्ने शैक्षिक च्यानल नेपाल सरकारको एक प्रगतिशील कदम हो भनेको छ ।

एनसिइ नेपालका अध्यक्ष राजकुमार गन्धर्वले भन्नुभयो, “विद्यालयबाहिर रहेका बालबालिकालाई शिक्षाको मूलधारमा ल्याउन विकल्पसहितको कार्यक्रम ल्याउन र घोषित कार्यक्रमको प्रभावकारी कार्यान्वयन गर्न पर्याप्त साधनस्रोतको व्यवस्था अबको बजेटले सुनिश्चित गर्न आवश्यक छ ।” रासस

थप समाचार
प्रतिकृया
नाम

ईमेल

ठेगना