ढाका टोपी नबिक्दा कैदीबन्दी चिन्तामा


चन्द्र पन्दाक
ताप्लेजुुङ, बैशाख २८ गते । आपूmहरुले बुनेको ढाका टोपीले बजार नपाउँदा जिल्ला कारागार ताप्लेजुङका कैदीबन्दी चिन्तित बनेका छन् । बजार नपाएका कारण लाखौं मूल्य बराबरको ढाका टोपी त्यसै थन्क्याएर राख्नु परेकाले उनीहरु चिन्तित बनेका हुन् ।
हाल जिल्ला कारगारभित्र बन्दी जीवन बिताइरहेका ६० कैदीबन्दीले ढाका कपडा बुन्ने सीप सिकेर दैनिक टोपी बुन्दै आएका छन् । कैदीहरुले बुनेका गुणस्तरीय ढाका टोपीले बाहिर बजारमा पाइने न्युन गुणस्तरको सस्तो टोपीसँग प्रतिस्पर्धा गर्न नसक्दा बजार नपाएको उनीहरुले गुनासो छ । बजारका अधिकांश व्यापारीले अन्यत्रैबाट सस्तो मूल्यमा टोपी ल्याएर बेच्ने गरेका र ग्राहकले पनि गुणस्तरको ख्याल नगरी त्यही सस्तो मूल्यको टोपी खरिद गरेर लाउने हुँदा आपूmहरुले बुनेको गुणस्तरीय टोपीले बजार नपाएको कैदीहरुको भनाइ छ ।
कैदी बिशाल लिम्बूका अनुसार आपूmहरुले बुन्ने टोपीका लागि धागो लगायतका सामग्री जुटाउनलाई खर्च बढी लाग्ने हुँदा टोपीको मूल्य नै महङ्गो पर्ने गरेको छ । लिम्बूले कारागारभित्र उत्पादन गरिएको ढाकाको टोपी प्रतिगोटा पाँच सय देखि दुई हजार पाँच सय रुपियाँसम्म पर्ने बताउनुभयो । उहाँका अनुसार कारागारभित्र निकै मिहेनत गरेर बुनेको टोपी धेरै टिक्ने भन्दै केही स्थानीयहरु मात्रै आउने गरेका र ब्यापारीहरु भने न्युन मात्रामा मात्र आउने गरेका छन् । कैदीबन्दीले टोपी विक्री नहुँदा घाटा बेहोर्नु परेको भन्दै बजार व्यवस्थापन गरिदिन माग गरेका छन् ।

यता ताप्लेजुङका प्रमुख जिल्ला अधिकारी चक्रपाणि पाण्डेले कैदीको उक्त समस्या आफूले पनि देखेको र समस्या समाधानका लागि टोपीको बजार व्यवस्था गरिदिन स्थानीय उद्योग वाणिज्य संघलाई आग्रह गरेको बताउनुभयो । जिल्लाभित्र सरकारी कार्यालयका कर्मचारी तथा व्यापारीले मात्रै कैदीहरुबाट उत्पादन गरिएका टोपी पहिलो प्राथमिकतामा राखेर खरिद गर्ने र प्रयोग गर्ने भने उनीहरुको समस्याको समाधान हुने प्रजिअ पाण्डेको भनाइ छ । अहिले बजार नपाएका कारण कारागारका कैदीबन्दीले तयार पारेका झण्डै तीन लाख रुपियाँ बढी मूल्य बराबरको ढाकाको टोपी त्यसै थन्क्याएर राखिएको बताइएको छ ।

 

 

थप समाचार
प्रतिकृया
नाम

ईमेल

ठेगना