किन अझै चेत्दैनन् कर्मचारी - घुस लिँदालिँदै इन्जिनियर यादव पक्राउ



भक्तपुर, वैशाख २८ गते। सडकको ग्याभिङ वाल लगाउने उपभोक्ता समितिसँग २० प्रतिशत घुस माग्ने एक इन्जिनियरलाई आज अख्तियार दुरुपयोग अनुसन्धान आयोगबाट खटिएको टोलीले घुस लिँदै गर्दा पक्राउ गरेको छ ।

जलउत्पन्न प्रकोप नियन्त्रण कार्यालय भक्तपुर जगातेका इ शुभनारायण यादवलाई मध्यपुर थिमिको क्षयरोग केन्द्र अगाडि रहेको स्टाफ भोजनालयबाट घुस बापतको रु ३५ हजार लिँदै गर्दा आयोग टोलीले नियन्त्रणमा लिएको हो ।

आयोगको टोलीका अनुसार सरकारको रु तीन लाखको बजेटमा उपभोक्ता समितिमार्फत ग्याभिङ वाल लगाउने काम गर्दा अभियुक्त यादवले कुल बजेटको ३५ प्रतिशत रकम माग गरेकामा २० प्रतिशत रकम घुस लिने सहमति गरेका थिए । आज रु ३५ हजार र बाँकी रकम काम सकिएपछि लिने सर्तअनुसार घुस रकम लिँदै गर्दा आयोगको टोलीले यादवलाई पक्राउ गरेको जनाइएको छ ।

नापी सर्वेक्षकविरुद्ध मुद्दा दायर

अर्को समाचार अनुसार  आयोगले नापी कार्यालय बाँकेका नापी सर्वेक्षक जीवछ यादवलले रु एक लाख घूस लिएको अभियोगमा आज विशेष अदालतमा मुद्दा दायर गरेको छ ।

आयोगका प्रवक्ता कृष्णहरि पुष्करका अनुसार सर्वेक्षक यादवले नेपालगन्ज नगरपालिका–७ रामनगरस्थित जग्गाको कित्ताकाट गरी लालपुर्जा बनाउने क्रममा सेवाग्राहीसँग घूस लिँदालिँदै थलोमा नै पक्राउ परेका थिए ।

आयोगले रु एक लाख बिगो कायम गरी हदैसम्मको कारबाहीको माग गर्दै मुद्दा दायर गरिएको जनाएको छ । रासस

 

थप समाचार
प्रतिकृया
नाम

ईमेल

ठेगना