सन् २०१८ नेपाल भ्रमण वर्ष

विश्वास रेग्मी

काठमाडौँ, वैशाख २७ गते । सरकारले सन् २०१८ लाई नेपाल भ्रमण वर्षका रूपमा मनाउने भएको छ । राष्ट्रपति विद्यादेवी भण्डारीले आइतबार व्यवस्थापिका संसद्मा प्रस्तुत गर्नुभएको सरकारको नीति तथा कार्यक्रममा १० लाख पर्यटक भित्र्याउने उद्देश्यसहित २०१८ लाई भ्रमण वर्षका रूपमा मनाउने घोषणा गर्नुभएको थियो ।
त्यस्तै, २०७३ लाई आन्तरिक भ्रमण वर्षका रूपमा अघि बढाइ आय र रोजगारी प्रवद्र्धन गर्ने लक्ष्यसमेत नीति तथा कार्यक्रममा समेटिएको छ । प्रत्येक प्रदेशमा कम्तीमा एक प्रमुख स्थानलाई केन्द्रबिन्दु मानेर पर्यटकीय क्षेत्र र गन्तव्य विकास गर्ने लक्ष्यसमेत नीति तथा कार्यक्रममा समेटिएको छ ।
पर्यटन क्षेत्रको विकासका लागि नयाँ गन्तव्यको पहिचान पूर्वाधार विकास र बजारीकरणले पनि आगामी आर्थिक वर्षमा प्राथमिकता पाएको छ । दस वर्षे रणनीतिक पर्यटन योजनाको कार्यान्वयन गर्दै छिमेकी मुलुकबाट धेरै पर्यटक भित्राउन प्रवद्र्धनात्मक कार्यक्रम ल्याउने सरकारको योजना छ । tourism
पर्यटकलाई पदयात्रा र पर्वतारोहण अनुमति दिने व्यवस्थालाई एकीकृत गर्ने तथा पर्यटकीय सेवा सुविधाको जानकारीका लागि मोबाइल सूचना प्रणालीको विकास गरेर कार्यान्वयनमा ल्याउने कार्यक्रम राखिएको छ ।
त्यस्तै, पर्वतीय पर्यटनलाई सुरक्षित बनाउन मौसमको पूर्वानुमान गर्ने पूर्व सूचना सम्पे्रषणको व्यवस्था मिलाउने तथा सगरमाथा र अन्नपूर्ण क्षेत्रमा एकीकृत उद्धार केन्द्र निर्माणसमेत सरकारको नीति तथा कार्यक्रममा परेको छ ।
एक प्रदेश, एक अन्तर्राष्ट्रिय विमानस्थल
आगामी आर्थिक वर्षको नीति तथा कार्यक्रममा हवाई क्षेत्रको पूर्वाधार विस्तार तथा सुधारको कामसमेत प्राथमिकतामा परेको छ । त्यसै अनुसार प्रत्येक प्रदेशमा एउटा प्रादेशिक अन्तर्राष्ट्रिय विमानस्थलको अवधारणा अनुसार आगामी आवमा सम्भाव्यता अध्ययन गर्ने सरकारको योजना छ ।
दुर्गम क्षेत्रका सबै नगर तथा गाविसमा हेलिप्याड निर्माणको काम अघि बढाइने योजना राखिएको छ । ग्रामीण तहसम्म विमानस्थल निर्माण गर्ने, सञ्चालनमा नरहेका विमानस्थल सञ्चालनमा ल्याइने विषयसमेत प्राथमिकतामा राखिएको छ ।
त्यस्तै, त्रिभुवन अन्तर्राष्ट्रिय विमानस्थलको स्तरोन्नति गर्ने तथा सिमरा, लुम्बिनी र पोखरामा अन्तर्राष्ट्रिय विमानस्थल निर्माणको कामलाई समयसीमाभित्रै पूरा गर्ने प्रतिबद्धता नीति तथा कार्यक्रमले लिएको छ ।

थप समाचार
प्रतिकृया
नाम

ईमेल

ठेगना