वातावरण संरक्षण अभियानमा चन्द्रबहादुरको एक्लो प्रयास


ठाकुरप्रसाद आचार्य
बेनी(म्याग्दी) बैशाख २३ गते ।  म्याग्दीका एक व्यक्तिले वातावरण संरक्षणका लागि अभियान चलाउनुभएको छ । सार्वजनिक स्थलहरुमा चौतारी निर्माण र बरपिपल रोपेर अभियानको थालनी गर्नुभएको हो ।
 

सडक छेउछाउमा रोपीएका विरुवाहरुलाई पानी दिंदै चन्द्रवहादुर कार्की ।

बेनी नगरपालीका ४ खबराका चन्द्रबहादुर कार्कीले एक्लै सार्वजनिक स्थलमा चौतारी निर्माणका साथै सडक र पदमार्गको छेउछाउमा बरपिपल तथा फुलका बिरुवा रोप्ने अभियान चलाउनुभएको छ ।

५८ वर्षिय कार्कीले सार्वजनिक स्थलमा श्रमदान गरेर वरपिपल सहित एक हजार २५० बिरुवा र २३ वटा चौतारी निर्माण गर्नुभएको छ । धर्म र वातावरण संरक्षणका लागि विगत तीन वर्षदेखि सामाजिक काममा जुट्नुभएका कार्की म्याग्दीको अगुवा कृषकको रुपमा पनि चिनिनुहुन्छ  ।

व्यवसायिक तरकारी खेतीसंगै बेनपा ६ मंगलाघाटमा फलफुल तथा तरकारी पसल सञ्चालन गर्नुभएका कार्कीले बिरुवा रोप्ने, चौतारी बनाउने र बिरुवाको स्याहार सुसारका लागि दैनिक कम्तीमा दुई घण्टा समय खर्चने गरेको बताउनुभयो ।

बेनीको खुल्लामञ्च र मंगलाघाट तर्फबाट खबरा जाने उकालो बाटोका साथै बरपिपल रोपीएको ठाउँमा चौतारी बनाउनुभएको छ । स्वास्थ्य र वातावरणका लागि उपयुक्त हुने, गर्मीमा सितलता प्रदान गर्ने तथा धार्मीक कार्यमा प्रयोग हने भएकाले बरपिपलका बिरुवा रोप्ने कार्यलाई प्राथमिकता दिएको कार्कीले बताउनुभयो  ।

बेनी बजारदेखि मंगलाघाट जाने सडक, हाडेभिर, खबरा जाने बाटो र बेनीदेखि मल्लाज उक्लने पक्कि सिढी सहितको पदमार्ग, महारानीथानको छेउछाउमा बरपिपलका अतिरिक्त एक हजार वटा अम्बा, आँप, चिउरी, कल्कीफुल, धुपी, लालुपाते, गोदावरी जातका बिरुवा रोपेको कार्कीले बताउनुभयो ।

लामो खडेरी भएकाले बिरुवा बचाउन दैनिक रुपमा घर र म्याग्दी नदीबाट पानी बोकेर सिचाई गर्दै आउनुभएको छ । कार्कीले थप विरुवा रोप्ने, रोपेका बिरुवा संरक्षण, स्याहार सुसार गरेर हुर्काउने तथा बरपिपलको धार्मीक बिधी अनुसार बिवाह गराउने लक्ष्य रहेको उहाँले बताउनुभयो । कार्कीले वातावरण संरक्षणका लागि गर्नुभएको योगदान सहनीय भएको यहाँका स्थानीयवासीहरु बताउँछन्  ।


थप समाचार
प्रतिकृया
नाम

ईमेल

ठेगना