भगवान् भरोसामा डढेलो नियन्त्रण

लक्ष्मीप्रसाद उपाध्याय

 काठमाडौँ,  वैशाख २० गते । जङ्गलमा लागेको डढेलो निभाउने प्रयास गर्दा एक महिनामा दश जनाभन्दा बढी व्यक्तिले ज्यान गुमाएका छन् । झन्डै २५ जना स्थानीय वन उपभोक्ता आगोबाट पोलिएर अस्पतालको शैयामा छटपटाइहेका छन् ।
स्थानीय व्यक्तिले रुखका स्याउला समातेर वन डढेलो नियन्त्रण गर्न खोजेको प्रयास असफल भएपछि वन डढेलोका घटना ज्यानमारा दुर्घटनाका रूपमा विकसित हुन थालेका छन् । गुल्मी, सल्यान, रामेछाप, दाङ, सुर्खेत, पाल्पा लगायतका जिल्लामा आगो निभाउने काममा खटिँदा ज्यान गुमाउनु परेको हो । गुल्मी, बर्दिया, डोटी, रसुवा, सिन्धुपाल्चोक लगायतका जिल्लामा आधा दर्जनभन्दा बढी बस्ती स्वाहा भएका छन् ।
एकै दिन देशभरका तीन सय स्थानमा आगलागी हुँदा स्थानीय बासिन्दा निकै त्रसित छन् भने सरकारी निकायहरू के र कसरी आगो नियन्त्रणमा लिने भनेर अन्योलमा छन् । आगो नियन्त्रणमा लिन सरकारी निकायसँग हेलिकप्टर पनि छैन भने लामो दुरीमा पानी फाल्न सक्ने दमकल र दक्ष जनशक्ति पनि छैनन् । सरकारी निकायले पनि स्याउला समातेर जङ्गलको आगो निभाउन दगुर्नुपर्ने परिस्थितिले केही दिनयता देशभरि नै आगलागीका घटनाले मानवीय र अन्य भौतिक क्षति पु¥याएको छ ।
वन विभागका महानिर्देशक रेशमबहादुर डाँगीले आगो निभाउन सरकारी निकाय साधन स्रोतयुक्त नभएको बताउनुभयो । दमकल पनि सबै ठाउँमा छैनन् । दमकल जङ्गलमा लैजान सकिने बाटोघाटो पनि छैन, कर्मचारी गएर पनि स्याउला समात्नेबाहेक अरु केही विकल्प छैन, उहाँले भन्नुभयो । aaglagi
शनिबार र आइतबार गरी पाँच सय स्थानमा आगलागी भएको अनुमान सरकारी अधिकारीहरूले गरेका छन् । एक महिनाको अवधिमा डढेलोबाट बहुमूल्य वनस्पति, दुर्लभ वन्यजन्तु तथा समग्र जैविक विविधतामा करोडौँ मूल्य बराबरको नोक्सानी भइसकेको छ ।
महानिर्देशक डाँगीले आफूहरूसँग आगो नियन्त्रणका लागि कुनै विकल्प बाँकी नभएको बताउनुभयो । स्थानीय एफएम, पत्रपत्रिकाबाट सचेतना जगाउनेबाहेक अरू केही गर्न नसकिने स्थिति छ, उहाँले भन्नुभयो ।
केही दिनअघिसम्म तराई क्षेत्रमा देखिएको वन डढेलो सल्कँदै चुरे क्षेत्र र चुरेभन्दा माथिको पहाडसम्म पुगेको छ । आइतबार गुल्मी, पाल्पा, डोटी, डडेल्धुरा, रामेछाप, सल्यान लगायतका पहाडी जिल्लाका दर्जनौँ स्थानमा वन डढेलो लागेको भूउपग्रहबाट खिचिएको तस्बिरमा छ ।

 

 

थप समाचार
प्रतिकृया
नाम

ईमेल

ठेगना