‘वैशाखभित्र मनोनयन हुनुपर्छ’

ncकाठमाडौँ, वैशाख ४ गते । नेपाली काँग्रेसका बाँकी पदाधिकारी र केन्द्रीय सदस्यको मनोनयन वैशाखभरमा भइसक्ने अपेक्षा गरिएको छ । पार्टीको विधानमा उपसभापति, महामन्त्री, सहमहामन्त्री र १४ केन्द्रीय सदस्य सभापतिबाट मनोनयन गर्ने र त्यसलाई केन्द्रीय समितिले अनुमोदन गर्ने व्यवस्था छ । 

नेपाली काँग्रेसको १३औँ महाधिवेशनबाट सभापति, महामन्त्री र कोषाध्यक्षसहितको नयाँ नेतृत्व चयन भएको एक महिना बितेको छ । विधान अनुसार अब एक महिनाभित्र पदाधिकारी मनोनयन लगायतका कार्य गर्नुपर्ने अधिकार र जिम्मेवारी निर्वाचित सभापतिमा छ ।
महाधिवेशन सम्पन्न भएलगत्तै बसेको केन्द्रीय समितिको पहिलो बैठकले पार्टी संसदीय दलको नेता र दलको कार्यसमिति निर्वाचन गर्ने कार्यतालिका सार्वजनिक गरेको थियो । राष्ट्रिय राजनीतिबाट व्यस्तताका कारण यसतर्फ खासै छलफल हुन नसकेको सभापति देउवा निकट केन्द्रीय सदस्य बालकृष्ण खाँणले बताउनुभयो ।
देउवाले यस विषयमा छलफल प्रारम्भ गर्नुभएको मलाई जानकारी छैन तर छिट्टै उहाँले यसको प्रक्रिया अगाडि बढाउनुहुन्छ नेता खाँणले बताउनुभयो । अर्कोतर्फ सभापति देउवा पारिवारिक काममा छिट्टै नै एक साता जति भारतमा रहनुहुने भएकाले पनि तत्काल पदाधिकारी मनोनयन लगायतको काम अगाडि बढ्न कठिनाइ हुने उहाँको भनाइ छ । वैशाखभित्र पदाधिकारीको मनोनयन लगायतका कार्यले पूर्णता पाउने विश्वास नेता खाँणले व्यक्त गर्नुभयो ।
विधान अनुसार सभापति देउवाले कार्यसमितिका सदस्यमध्येबाट एक उपसभापति, एक महामन्त्री, एक सहमहामन्त्री र १४ केन्द्रीय सदस्य मनोनयन गर्न पाउने अधिकार छ । पार्टीको केन्द्रीय समिति ८५ सदस्यीय हुने प्रावधान छ । पदाधिकारी मनोनयनमा सभापतिले केन्द्रीय कार्यसमितिमा व्यक्तिको नाम प्रस्ताव गर्ने र त्यसलाई कार्यसमितिले अनुमोदन गर्ने प्रावधान पार्टीको विधानमा छ ।
पार्टीको १३औँ महाधिवेशनमा सभापति देउवा र नेता रामचन्द्र पौडेल छुट्टाछुट्टै समूह बनाई निर्वाचन लड्नुभएको र देउवालाई केन्द्रीय समितिमा स्पष्ट बहुमत प्राप्त भएकाले पनि उहाँले प्रस्ताव गर्ने नाम केन्द्रीय समितिबाट अनुमोदनका लागि गाह्रो नहुने स्थिति छ ।
कोइरालाको कार्यकालमा सहमहामन्त्रीको मनोनयन निकै ढिला गरी भएको थियो । त्यति मात्र होइन कतिपय विभागले पूर्णता नै नपाई कार्यकाल सकिएको थियो । त्यस्तो अवस्था आउन नदिन यसपटक निर्वाचित सभापति देउवा सहज हुनुपर्ने विचार अर्का केन्द्रीय सदस्य बद्री पाण्डे व्यक्त गर्नुहुन्छ ।
क्षेत्रीय र जिल्ला कार्यसमिति कुन हिसाबले सञ्चालन भएका छन् भनेर केन्द्रीय समितिले हेर्नुपर्ने भएका
कारण विधानलाई नेतृत्व र केन्द्रीय समितिले चनाखोपूर्वक कार्यान्वयन
गर्नुपर्ने उहाँको भनाइ छ ।
पार्टीलाई पद्धतिगत
हिसाबले अगाडि बढाउनुपर्छ भन्ने नै आफूहरूको मुख्य माग रहेको उहाँले बताउनुभयो । यसका साथै केन्द्रीय विभागलाई पूर्णता दिनुपर्ने प्रावधानसमेत रहेको जनाइएको छ ।

 

थप समाचार
प्रतिकृया
नाम

ईमेल

ठेगना