चिनियाँ लगानीलाई नेपालमा निम्तो

बेइजिङ, चैत १० गते । प्रधानमन्त्री केपी शर्मा ओलीले चीनको चामत्कारिक आर्थिक विकाससँग आफ्नो देशको अर्थतन्त्र जोडेर नेपालले यसबाट अधिकतम फाइदा लिन चाहेको बताउनुभएको छ । चीन भ्रमणमा रहनुभएका प्रधानमन्त्री ओलीले मङ्गलबार बेइजिङमा आयोजित नेपाली तथा चिनियाँ व्यापारिक समुदायलाई सम्बोधन गर्दै विश्व अर्थतन्त्र नै चिनियाँ अर्थतन्त्रसँग समाहित भएको यस घडीमा नेपाल यसबाट बाहिर रहन नसक्ने बताउनुभयो । 

उहाँले चीन आफ्नो विशाल भूगोलका कारणले नभई इतिहासमै उसले ठूलो फड्को मारेका कारणले सम्पूर्ण विश्वले चीनलाई नियालिरहेका छन् भन्नुभयो । प्रधानमन्त्री ओलीले अति गरिबीबाट माथि उठ्दै विशाल अर्थतन्त्र बनाएको चीनको सन् २०१४ मा मात्रै ११४ अर्ब बिलियन अमेरिकी डलर प्रत्यक्ष वैदेशिक लगानी रहेको उल्लेख गर्दै नेपाल चीनको अति निकट छिमेकी भएका नाताले चीनले विकासोन्मुख राष्ट्रका लागि गर्ने यस्तो लगानीमा नेपाल पनि साझेदार बन्न चाहेको बताउनुुभयो ।
उहाँले वार्षिक एक सय अर्ब अमेरिकी डलर खर्च गर्ने चिनियाँ पर्यटक आफैँमा विश्वमै विशिष्ट उत्पादन भएको भन्दै नेपालमा यस्ता पर्यटकलाई आकर्षित गर्ने थुपै्र विशेषता छन्, यसका लागि दुवै देशका व्यवसायी र लगानीकर्ताबीच सहकार्य हुनसक्ने बताउनुभयो । संयुक्त रूपमै हामी यस कार्यलाई चिनियाँँ पर्यटकको अत्यन्त विशिष्ठ पहिचानका रूपमा विकास गर्न सक्छौँ उहाँले भन्नुभयो ।
नेपाल हालै चिनियाँ लगानीमा स्थापना भएको एसियाली पूर्वाधार लगानी बैङ्कमा आबद्ध भएको प्रसङ्ग उल्लेख गर्दै प्रधानमन्त्रीले परिवर्तित सन्दर्भमा चिनियाँँ नेतृत्वमा प्राचीन रेशम मार्गको पुनरोदयका लागि रेशम मार्ग आर्थिक क्षेत्र तथा २१औँ शताब्दीको सामुद्रिक पस्मिना मार्ग प्रक्रियाको एक भाग भएको बताउनुभयो ।
उहाँँले बैङ्क, रेशम मार्ग, आर्थिक क्षेत्र तथा सडक विस्तारले विकास पूर्वाधारका लागि एसियामा अर्थ परिचालन हुने, अन्तरसम्बन्ध विस्तार हुने र व्यापार तथा लगानीमा सहजीकरण हुने विश्वास व्यक्त गर्नुभयो । नेपाल संविधान निर्माण प्रक्रिया सम्पन्न गरी आर्थिक विकास र समृद्धिको नयाँ मार्गमा प्रवेश गरेको बताउँदै प्रधानमन्त्री ओलीले नेपाली जनता आर्थिक वृद्धि, विकास र समृद्धिको माध्यमबाट राजनीतिक उपलब्धिलाई दिगो र सङ्गठित गर्न चाहन्छन् भन्नुभयो ।
नेपालले खुला आर्थिक नीति अवलम्बन गर्दै आएको बताउँदै उहाँले नेपालको संविधानले पूर्वाधार विकासमा वैदेशिक पुँजी र प्रविधिगत लगानीको परिचालनलाई प्रोत्साहित गर्न नीतिगत आधारशिला तयार गरेको उल्लेख गर्नुभयो । वैदेशिक लगानीको प्रभावकारी परिचालनले मात्रै नेपालको विकास सम्भाव्यताको उजागर हुने नेपालले महसुस गरेको उहाँँको भनाइ थियो ।
प्रधानमन्त्री ओलीले आफ्नो देशको उदार अर्थतन्त्रका विशेषताबारे जानकारी दिँदै ठूलास्तरको लगानीका लागि लगानी बोर्डको स्थापना गरेको बताउनुभयो । उहाँले थप्नुभयो– लगानीकर्ताका लागि सरल भिसा प्रक्रिया छ र नेपालमा दर्ता गरिएका विदेशी कम्पनीले जग्गा किन्न, स्वामित्वमा लिन तथा बेच्न सक्ने प्रावधान रहेको छ ।
श्रम कानुन पनि वैदेशिक लगानीमैत्री बनाउने गरी परिमार्जन गर्न लागेको प्रधानमन्त्री ओलीले जानकारी दिनुभयो । नेपालमा प्रत्येक वर्ष पाँच लाखभन्दा बढी युवा रोजगार बजारमा प्रवेश गर्ने गरेको बताउँदै उहाँँले नेपाली कडा परिश्रम गर्ने, इमानदार र यसमा चिनियाँँ जनताको समर्पण पनि जोडेर काम गर्दा अत्यन्त फाइदा हुने धारणा राख्नुभयो ।
नेपालको जलस्रोत र पर्यटन चिनियाँँ लगानीका लागि अत्यन्त महìवपूर्ण क्षेत्र भएको बताउँदै उहाँले पर्यटनका लागि मुख्य आकर्षणका केन्द्र रहेका पोखरा र लुम्बिनीमा अन्तर्राष्ट्रिय विमानस्थल बन्दैगरेका छन् भन्नुभयो ।
प्रधानमन्त्री ओलीले ठूला विकासका योजनामा चिनियाँँ लगानीले दुई देशबीचको आर्थिक सम्बन्धमा नयाँ आयाम थपिने विश्वास व्यक्त गर्दै चीन नेपालको दोस्रो ठूलो व्यापारिक साझेदार भएकाले चीनका निजी क्षेत्रलाई नेपालमा लगानी गर्न चासो देखाउन आग्रह गर्नुभयो । उहाँले नेपाल गरिबी र अविकासको दुश्चक्रबाट माथि उठ्न चाहन्छ तर सरकार आफैँमा सीमित क्षमता र स्रोतले गर्दा स्वदेशी तथा विदेशी निजी क्षेत्रलाई नेपालमा स्रोत लगानी गर्न, सेवा तथा वस्तु उत्पादन गर्न र रोजगार सिर्जना गर्न निम्तो गर्दछ, भन्नुभयो ।

 

थप समाचार
प्रतिकृया
नाम

ईमेल

ठेगना