नमुना परियोजनाका रूपमा आजदेखि, सिंगटीबाट पुनः निर्माण अभियान

 बाबुराम शर्मा

दोलखा फागुन ३० गते । भूकम्पबाट अति प्रभावित दोलखाको सिंगटीमा आइतबारबाट पुनः निर्माण अभियान सुरु हुने भएको छ । पुनः निर्माण कार्यको नमुना परियोजनको रूपमा सिंगटीका आसपासका लामिडाँडा र लादुक गाउँ विकास समितिबाट काम सुरु गर्न लागिएको राष्ट्रिय पुनः निर्माण प्राधिकरणका विज्ञ सदस्य डा. चन्द्रबहादुर श्रेष्ठले बताउनुभयो ।
विज्ञ सदस्य श्रेष्ठका अनुसार, त्यस स्रोत केन्द्रमा शाखा अधिकृत र नायब सुब्बा स्तरका कर्मचारी खटिइसकेका र थप चारजना जिल्लाबाट काजमा माग गरिएको छ । जिल्ला पशु सेवा र जिल्ला कृषि विकास कार्यालयबाट दुई÷दुई कर्मचारी जिल्ला प्रशासन कार्यालयले व्यवस्था मिलाइसकेको छ । सञ्चालनका लागि जिल्ला तथा स्थानीयस्तरका राजनीतिक दल, नागरिक समाज समेतको राय सल्लाह सुझाव सङ्कलन भइसकेको छ ।
उपसचिवस्तरको कर्मचारी कार्यालय प्रमुखसहित प्राधिकरणको क्षेत्रीय कार्यालय पनि चरिकोटमा स्थापना गर्ने व्यवस्था भइसकेको छ । उहाँले भन्नुभयो, ‘अहिले काजमा व्यवस्था मिलाइएको र पछि स्थायी कर्मचारी व्यवस्था हुनेछ । आइतबारदेखि ती दुई गाविसका भूकम्प पीडितको नामावली प्रकाशन हुनेछ । नामावली अनुसार उनीहरूले पाउने अनुदानका लागि नागरिकताको प्रमाणपत्र, लालपुर्जा र इन्जिनियरले दिएको निस्सा पेश गर्नुपर्ने छ ।
लामीडाँडा गाविसको एक हजार २५५ र लादुकको एक हजार ७२४ जनाको नामावली तयार भएको छ र उनीहरूलाई दिइने रकम पनि बैङ्क दाखिला भइसकेको छ । उनीहरूले पेश गरेका कागजातहरू गाविस सचिवको रोहवरमा एकिन भएपछि बैङ्कमार्फत उनीहरूले पाउने दुई लाखमध्ये पहिलो किस्ता अनुदान ५० हजार रुपियाँ दिइने उहाँले बताउनुभयो ।    nepal_earthquake
घरको जगको सतहसम्म बनेपछि प्राधिकरणका नमुना तथा प्राविधिकको प्रतिवेदन अनुसार क्रमशः ८० र ७० हजार रुपियाँ गरी दुई किस्ता गर्दै घर पूर्ण भएपछि पूर्ण रूपमा रकम प्रदान गरिने उहाँले जानकारी दिनुभयो ।
यी दुई गाविसमा भएको कामको अनुभवको आधारमा आलम्पुका ५२२, बिगुका एक हजार ३३७, चिलङ्खाका ७९२ र बाबरेका एक हजार ४२ लाई अनुदान रकम वितरण हुने तयारी भइसकेको छ । यसरी क्रमशः बाँकी गाविस/ नगरपलिकामा पनि आवास निर्माणको लागि रकम वितरण हुँदै जाने उहाँले जानकारी दिनुभयो ।

थप समाचार
प्रतिकृया
नाम

ईमेल

ठेगना