चामल ढुवानी गर्न भन्दा फोन बन्द गरेर बस्छन् ठेकेदार

जाजरकोट, फागुन २८ गते । यहाँका एक दर्जनभन्दा बढी गाविसमा चरम खाद्यान्न सङ्कट देखिएको छ । ठेकेदारको लापर्बाहीले अहिलेसम्म जाजरकोटको पश्चिममा रहेका दुईवटा डिपोमा चामल ढुवानी हुन सकेको छैन ।

पश्चिम क्षेत्रको दशेरा डिपो र पजारुको घोगी डिपोमा सम्झौता भएको लामो समय बित्दा पनि चामल नपुग्दा खाद्य सङ्कट देखिएको हो । प्रायः खाद्यान्न नपुग भइरहने जिल्लाका टाँलेगाउँ, थालारैकर, झाप्रा, दह, कोताङ, ढिमे, पैक, पजारु, दशेरा, सीमा, जुंगाथापाचौर, अर्छानी, टालगर्खाकोट, सुवानाउली, साल्मालगायतका गाविसमा खाद्य सङ्कट देखिएको हो ।

चामल ढुवानीका लागि प्रकाश शाह सप्लायर्ससँग दशेरा डिपोका लागि गत असोज २७ गते र पजारुको घोगी डिपोका लागि पुस २१ गते ठेक्का सम्झौता गरिएको खाद्य संस्थान अञ्चल कार्यालय नेपालगन्जका प्रमुख शङ्कर सापकोटाले जानकारी दिनुभयो ।

सम्झौता भएको मितिले १५ दिनभित्र चामल ढुवानी गर्न सुरु गर्नुपर्ने व्यवस्था भएपनि ठेकेदारले अहिलेसम्म कुनै चासो नदिएको उहाँले बताउनुभयो । ठेकेदारसँग धेरै पटक टेलिफोन सम्पर्क गर्दा कहिले नउठाउने तथा कहिले स्विच अफ गरी सम्पर्कविहीन हुने गरेको उहाँले जानकारी दिनुभयो ।

चामल ढुवानीको ध्यानाकर्षण गराउँदै अञ्चल कार्यालयले २ पटक र जिल्ला कार्यालयले २ पटक पत्रचार समेत गरेपछि ठेकेदारले त्यसबारे चासो नदिएको बताइएको छ । अव प्रहरी मार्फत पत्र वुझाउने र सार्वजनिक पत्रपत्रिका मार्फत सुचना निकाल्ने तयारी भएको सापकोटाले बताउनुभयो । ‘त्यसपछि पनि सम्पर्कमा नआएका सप्लायर्सलाई कालो सूचीमा राखेर ढुवानीको नयाँ व्यवस्था गरिने छ’–उहाँले भन्नुभयो ।

जिल्लामा कुल १६ हजार ६९८ हेक्टर खेतीयोग्य जमिन रहेकोमा मकै उत्पादन घटेकाले खाद्य सङ्कट बढेको हो । खाद्यान्न आपूर्ति सहज गराउने उद्देश्यले जिल्लाको पूर्वी क्षेत्रको रग्दा गाविसको चौखा, उत्तरी क्षेत्रका लागि नायकवाडा गाविसको घाट, उत्तरपश्चिमी क्षेत्रका लागि पजारु गाविसको घोगी र पश्चिम क्षेत्रका लागि दशेरा गाविसको दशेरामा नेपाल खाद्य संस्थानका चार डिपो स्थापना गरिएको हो ।

पूर्वको रग्दाको चौखा र नायकवाडाको घाट डिपोमा नियमित चामल आपूर्ति भएपनि पश्चिमका दशेरा र पजारुको घोगीमा भने ठेकेदारका लापर्बाहीका कारण चामलको आपूर्ति नभएको जिल्ला खाद्य संस्थान, जाजरकोटले जनाएको छ ।

सरकारले यसवर्ष जाजरकोटका चारवटा डिपोमा एक÷एक हजार क्विन्टलका दरले चार हजार र शाखा कार्यालयमा चार हजार गरी जम्मा आठ हजार क्विन्टल चामलको कोटा निर्धारण गरेको छ ।

पहिलेको चामल सकिएको र यस वर्षका लागि चामल ढुवानीको जिम्मा लिएको ठेकेदारले नपु¥याएपछि पश्चिमका दुईवटा खाद्य डिपो रित्तै भएका हुन् । सदरमुकाममा रहेको गोदामबाट चौखामा ७०३ केजी र नायकवाडामा ४९५ केजी चामल ढुवानी गराइएको छ ।

पश्चिम क्षेत्रमा रहेको घोगी र दशेरा डिपोमा सिधै संस्थानको अञ्चल कार्यालय नेपालगन्जबाट ढुवानी हुने व्यवस्था भएको खाद्य संस्थान जाजरकोटका निमित्त कार्यालय प्रमुख रामप्रसाद पौडेलले जानकारी दिनुभयो । रासस

थप समाचार
प्रतिकृया
नाम

ईमेल

ठेगना