न्यानो कपडाका लागि चार करोड बढी रकम वितरण

दमौली, फागुन २३ गते । जिल्ला प्रशासन कार्यालय तनहुँले जिल्लाका भूकम्पबाट पूर्णरुपमा घर क्षतिग्रस्त भएका घरपरिवारका लागि न्यानो कपडा खरिद गर्न रु चार करोड सात लाख ७० हजार वितरण गरेको छ । जिल्लाको शुक्लागण्डकी नगरपालिका र ३५ वटा गाविसका भूकम्प प्रभावित घरपरिवारका लागि न्यानो कपडा खरिद गर्न उक्त रकम वितरण गरिएको हो ।

भूकम्पबाट पूर्णरुपमा घर क्षतिग्रस्त भएका घरपरिवारका लागि प्रतिपरिवार रु १०÷१० हजारका दरले सो राहत रकम वितरण गरिएको जिल्ला प्रशासन कार्यालय तनहुँले जनाएको छ ।

भूकम्पले पूर्णरुपमा घर क्षतिग्रस्त भएका तनहुँका पाँच हजार ६४८ घरपरिवारमध्ये चार हजार ७७ घरपरिवारलाई रकम वितरण गरिएको र बाँकी एक हजार ५७१ जनाका लागि रकम माग भइरहेको बताइएको छ ।

सहायक प्रमुख जिल्ला अधिकारी किशोरकुमार चौधरीले भूकम्पबाट पूर्णरुपमा घर क्षति भएका ती घरपरिवारका लागि अपुग रकम माग गर्ने काम भइरहेको बताउनुभयो ।

पूर्णरुपमा घर क्षतिग्रस्त घरपरिवारलाई रकम वितरण गर्न करिब रु सात करोड लाग्ने सो कार्यालयले जनाएको छ ।

यसअघि पनि पूर्णरुपमा घर क्षतिग्रस्त भएका घरपरिवारलाई जनही रु १५ हजारका दरले राहत रकम दिने काम भइसकेको छ ।

भूकम्पले तनहुँमा पाँच हजार ५०० घर पूर्णरुपमा र ३० हजारभन्दा बढी घर आंशिक रुपमा क्षति पु¥याएको छ । तनहुँमा घर भई जागिरको सिलसिलामा अन्यत्र रहेका यहाँका १३ जनाभन्दा बढीको मृत्यु भएको थियो । रासस

थप समाचार
प्रतिकृया
नाम

ईमेल

ठेगना