आगलागीपीडित प्रहरी र स्थानीयवासीलाई राहत रकम

खोटाङ, फागुन १९ गते । जिल्ला प्रहरी कार्यालय खोटाङले दिक्तेलको रत्नपार्कमा भएको आगलागीबाट पीडित प्रहरी र स्थानीयवासीलाई राहत रकम प्रदान गरेको छ । जिल्ला प्रहरी कार्यालय र मातहतका प्रहरी एकाइमा दरबन्दी भएका प्रहरीबाट प्रतिव्यक्ति रु २०० का दरले सङ्कलन गरेर जम्मा भएको रु ७१ हजार १०० रकम आगलागीपीडित प्रहरी र स्थानीयवासीलाई प्रदान गरेको हो ।

रत्नपार्कस्थित सामुदायिक सेवा केन्द्रको कार्यालयमा मङ्गलबार कार्यक्रम गरी आगलागीपीडित प्रहरी नायब निरीक्षक विश्वेश्वर साह, प्रहरी हवल्दार बमबहादुर राय क्षत्री र उहाँकी श्रीमती प्रहरी जवान सरिता राय क्षत्री, प्रहरी हवल्दार शिवप्रसाद घिमिरे तथा स्थानीय हीरालाल पुरीलाई राहत रकम प्रदान गरिएको छ ।

गत पुस–२ गते विद्युत् प्रवाह हुँदा स्थानीय हीरालाल पुरीको घरबाट सुरु भएको आगलागीमा नगद, गरगहना, लत्ताकपडालगायत सम्पूर्ण सामग्री गुमाएका डेरावाल प्रहरीलाई राहत प्रदान गर्नका लागि जिल्ला प्रहरी कार्यालयले प्रहरीबाटै सहयोग उठाएको थियो ।

जिल्ला प्रहरी कार्यालय तथा मातहतबाट सङ्कलन भएका रकममध्ये प्रहरी हवल्दार बमबहादुर र प्रहरी जवान सरिता दम्पतीलाई रु ६४ हजार १००, प्रहरी नायब निरीक्षक साह र प्रहरी हवल्दार घिमिरेलाई तीन÷तीन हजार प्रदान गरिएको प्रहरी नायब उपरीक्षक विद्यानन्द माझीले बताउनुभयो ।

यस्तै, काठमाडौँमा स्नातकोत्तर अध्ययनरत दिक्तेल रत्नपार्ककी कुसुमलता श्रेष्ठको पहलमा सङ्कलन भएको रु छ हजार १५० रकम पनि आगलागीपीडितलाई प्रदान गरिएको छ ।

श्रेष्ठले आफू र आफ्ना २८ जना साथीबाट सङ्कलन गरेर पठाएको रकममध्ये प्रहरी हवल्दार रायक्षत्री दम्पतीलाई रु तीन हजार र स्थानीय हीरालाललाई रु तीन हजार १५० प्रदान गरिएको छ । सङ्कलित रकम अग्नीपीडित प्रहरी र स्थानीयवासीलाई राप्रपा नेपालका जिल्ला अध्यक्ष रहेका कुसुमलताका बुबा जीवन श्रेष्ठ, प्रमुख जिल्ला अधिकारी रुद्रप्रसाद खड्का, र प्रहरी नायब उपरीक्षक माझीलगायतले प्रदान गर्नुभएको छ ।

आगलागीमा दिक्तेल रत्नपार्कका पाँच घरमूली र भाडामा बसेर पेसा व्यवसाय गर्दै आएका १० परिवारसहित १५ परिवारको रु पाँच करोड २७ लाख पाँच हजार बराबरको धनमाल जलेर नष्ट भएको थियो । आगलागी पीडित परिवारलाई उद्योग वाणिज्य सङ्घ, नेपाली काँग्रेसलगायतले यसअघि नै राहत रकम प्रदान गरेका थिए ।

पूर्वाञ्चल उत्कृष्ट प्रहरीमा प्रनाउ माझी

यसैबीच, जिल्ला प्रहरी कार्यालय खोटाङका प्रहरी नायब उपरीक्षक विद्यानन्द माझी माघ महिनाको पूर्वाञ्चल उत्कृष्ट प्रहरीका रुपमा छनोट हुनुभएको छ । विभिन्न घटित अपराध र पेन्डिङ मुद्दाको अनुसन्धानमा सफल कार्य गरेको भन्दै पूर्व क्षेत्रीय प्रहरी कार्यालय विराटनगरले माझीलाई उत्कृष्ट पूर्वाञ्चल प्रहरीको रुपमा छनोट गरेको हो ।

नेपाल प्रहरीको रणनीतिक योजनामा रहेर वार्षिक रुपमा हुने हरेक कार्ययोजना तथा विशेष अभियानमा समेत माझीको भूमिका उल्लेखनीय रहेको भन्दै उत्कृष्ट प्रहरीका रुपमा छनौट गरिएको पूर्वाञ्चल क्षेत्रीय प्रहरी कार्यालय विराटनगरले जनाएको छ ।

क्षेत्रीय कार्यालयका अनुसार माझीले जनतासमक्ष नेपाल प्रहरीप्रतिको विश्वास सुदृढ बनाउँदै प्रहरी र जनताबीचको सम्बन्धलाई सुमधुर बनाउन स्थानीय भाषामा समेत सचेतना कार्यक्रम सञ्चालन गर्नुका साथै अपराध न्यूनीकरणमा नेतृत्वदायी भूमिका निर्वाह गरेकाले माझीलाई पूर्वाञ्चल उत्कृष्ट प्रहरी छनोट गरिएको हो ।

क्षेत्रीय कार्यालय विराटनगरले हरेक महिना उत्कृष्ट प्रहरी कामको मूल्याङ्कनका आधारमा छनोट गर्दै आएको छ । पूर्वाञ्चल उत्कृष्ट प्रहरीको रुपमा आफू छनोट भएकाले थप मनोबल बढेको माझीले बताउनुभयो । “यो मेरो व्यक्तिगत प्रयासले नभई सिङ्गो प्रहरी सङ्गठनको सफलता हो,” उहाँले भन्नुभयो – “यसले आगामी दिनमा शान्ति सुरक्षादेखि विभिन्न आपराधिक घटना न्यूनीकरणमा हाम्रो भूमिका महत्वपूर्ण रहनेछ ।”

माझीले गत भदौ १ गतेदेखि हालसम्म दोषी ठहर भएपनि बिसौँ वर्षदेखि भागेर बसिरहेका ८४ जना अभियुक्तलाई पक्राउ गरेर सजायका लागि अदालतसमक्ष बुझाइसक्नुभएको छ । प्रहरीको सक्रियतापछि जिल्लामा दोषी ठहर भएर फरार भएकाबाट उठ्न नसकेको लाखौँ जरिवाना रकमसमेत असुल भएको छ । रासस

थप समाचार
प्रतिकृया
नाम

ईमेल

ठेगना