संस्थापन पक्षबाट सभापतिमा पौडेल र महामन्त्रीमा कोइराला

शेषकान्त पण्डित

काठमाडौँ, फागुन १५ गते । नेपाली काँग्रेसको आसन्न महाधिवेशनमा संस्थापन पक्षबाट कार्यवाहक सभापति रामचन्द्र पौडेललाई सभापति र केन्द्रीय सदस्य डा. शशाङ्क कोइरालालाई महामन्त्रीमा उम्मेदवार बनाउने करिब निश्चित भएको छ ।
बिहीबार र शुक्रबार संस्थापन पक्षका प्रभावशाली नेताको उपस्थितिमा बसेको बैठकबाट सभापतिमा पौडेल र महामन्त्रीमा बीपीपुत्र शशाङ्कलाई उम्मेदवार बनाउने निर्णय लिइएको हो । तर, सभापतिका अर्का आकाङ्क्षी महामन्त्री कृष्णप्रसाद सिटौलालगायतका केही नेताले यसमा सहमति नजनाएका कारण औपचारिक रूपमा घोषणा गरिएको छैन । पार्टीको केन्द्रीय समितिको बैठक नसकिएका कारण पनि यसलाई औपचारिकता दिइएको छैन । congress-belgium
पार्टीका केन्द्रीय सदस्य दिलेन्द्रप्रसाद बडूले औपचारिक रूपमा कुनै निर्णय नभए पनि पौडेल र कोइरालालाई क्रमशः सभापति र महामन्त्रीमा उम्मेदवार बनाउने कुरा निश्चित नै भएको जानकारी दिनुभयो । यस विषयमा निर्णय गर्न शुक्रबार पार्टीका नेता डा. रामशरण महतको निवास बाँसबारीमा संस्थापन पक्षका नेताको बैठक बसेको थियो । यसअघि नेता शशाङ्क कोइरालाको निवासमा समेत छलफल भएको जानकारी नेताहरूले दिनुभएको छ । अहिले नै सहमति भयो भन्दा पार्टीभित्रका विभिन्न पक्षसँगको वार्ता संवादको प्रक्रिया अगाडि बढाउन असहज हुने अनुमान गरी त्यसलाई सार्वजनिक गरिएको छैन । “कार्यवाहक सभापतिका हिसाबले रामचन्द्रजी सभापतिको स्वाभाविक दाबेदार हो”, केन्द्रीय सदस्य बडूले बताउनुभयो ।
कोइराला परिवारको लिगेसीका हिसाबले पनि डा. शशांकलाई नै महामन्त्रीको उम्मेदवार बनाउने निचोडमा संस्थापन पक्षका नेताहरू पुगेका छन् । यसका साथै अन्य नेताको व्यवस्थापन कसरी गर्ने भन्ने विषयको टुङ्गो लागिसकेको छैन । सहमतिका माध्यमबाट टिम बनाउनेलगायतका गृहकार्य भइरहेको जानकारी बडूले दिनुभयो । “संस्थापन पक्षबाट पदाधिकारीमा एक जनाभन्दा धेरै उम्मेदवार हुँदैनन् । यस विषयमा नेताहरूबीच छलफल र आवश्यक गृहकार्य भइरहेको छ”, पार्टीका प्रवक्ता बडूले बताउनुभयो । नेताहरूका अनुसार सभापति र महामन्त्रीमा झण्डै समझदारी भएको अवस्थामा पार्टीका दुई जना महामन्त्री प्रकाशमान सिंह र कृष्णप्रसाद सिटौलाको व्यवस्थापन कसरी गराउने भन्ने चुनौती थपिएको छ । नेताहरूको व्यवस्थापनका लागि पार्टीकै केही नेताहरू क्रियाशील रहेको जानकारी प्रवक्ता बडूले दिनुभयो । संस्थापन पक्षबाट कोषाध्यक्षमा कसलाई उम्मेदवार बनाउने भन्ने कुराको पनि टुङ्गो लागेको छैन ।
पदाधिकारीमा झण्डै सहमति कायम गरेपछि उम्मेदवार घोषणा गर्ने आन्तरिक तयारी नेताहरूले गरेका छन् । “केही दिनभित्रै संस्थापन पक्षबाट आधिकारिक उम्मेदवार घोषणा गर्छौं”, काँग्रेस नेता बडूले बताउनुभयो ।
संस्थापनको यस निर्णयमा महामन्त्री सिटौला सन्तुष्ट नरहेको जनाइएको छ । उहाँले शुक्रबार पनि आफू निकट युवा नेतासँग यस विषयमा छलफल गरिरहनुभएको छ । खासगरी युवा नेता गगन थापालगायतका नेतालाई आफ्नो साथमा लिएर अगाडि बढ्ने तयारीमा रहनुभएका सिटौलाले शनिबार पनि छलफल गर्ने कार्यक्रम तय गर्नुभएको जनाइएको छ ।
यससँगै वरिष्ठ नेता शेरबहादुर देउवाले पनि आफू निकट नेताहरूसँग कसरी अगाडि बढ्ने भन्ने विषयमा शुक्रबार छलफल तीव्र बनाउनुभएको छ । आफ्नो तर्फबाट महामन्त्रीमा अर्जुननरसिंह केसी र कोषाध्यक्षमा चित्रलेखा यादवलाई उम्मेदवार बनाउने सम्भावना रहेको देउवा निकट नेताहरूले जनाएका छन् । “सभापतिमा देउवाजीलाई जिताउन हामी जस्तोसुकै त्याग गर्न पनि तयार छौँ”, महामन्त्रीको आकाङ्क्षी बनाएर चर्चामा रहनुभएका नेता विमलेन्द्र निधिले जानकारी दिनुभयो ।
यसैबीच पार्टीको आगामी महाधिवेशनमा प्रस्तुत गरिने नीति तथा कार्यक्रमलाई अन्तिम रूप दिन छलफल भइरहेको छ । पार्टीको नीति तथा कार्यक्रम समितिमा यस विषयमा शुक्रबार छलफल भएको जानकारी नेताहरूले दिनुभएको छ । पार्टीको गत मङ्गलबार र बिहीबार केन्द्रीय सदस्यले प्रस्तुत गरेको सुझावलाई आत्मसात् गर्ने गरी नीति तथा कार्यक्रमलाई अन्तिम रूप दिने तयारी भइरहेको हो ।

 

थप समाचार
प्रतिकृया
नाम

ईमेल

ठेगना