काँग्रेस अधिवेशन आजदेखि पुनः सुरु

Nepali Congressकाठमाडौँ, फागुन १ गते । नेपाली काँग्रेसका सभापति सुशील कोइरालाको निधनपछि स्थगित गरिएको पार्टीको जिल्ला तथा क्षेत्रीय अधिवेशनको निर्वाचन प्रक्रिया शनिबारदेखि सुरु हुँदैछ । अधिवेशनको उद्घाटन सत्र सकिएर उम्मेदवारी दर्ता र निर्वाचन गर्न बाँकी रहेका जिल्लालाई स्थानीय तहमा आवश्यक समन्वय गरी अगाडि बढ्न केन्द्रीय निर्वाचन समितिको अनुमतिपछि स्थगित अधिवेशन पुनः सुरु हुने भएको हो । 

केन्द्रीय निर्वाचन समितिका सदस्य गोपालकृष्ण घिमिरेले स्थगित जिल्ला अधिवेशन र क्षेत्रीय अधिवेशन शनिबारदेखि सुरु गर्ने जानकारी जिल्लाका निर्वाचन अधिकृतलाई दिएको बताउनुभयो ।
आगामी तीनचार दिनसम्ममा जिल्ला अधिवेशन सक्ने तयारी भइरहेको छ । भक्तपुरका जिल्ला सभापति गणेशमान चक्रधरले भक्तपुरमा क्षेत्रीय अधिवेशन सम्पन्न भइसकेको उल्लेख गर्दै जिल्ला अधिवेशन कहिले गर्ने भन्नेमा छलफल भइरहेको बताउनुभयो । एक दुई दिनभित्र अधिवेशनको मिति टुङ्गो लग्ने उहाँले जानकारी दिनुभयो ।
काठमाडौँका जिल्ला सभापति भीमसेनदास प्रधानले उद्घाटन सत्र सकिएकाले अब उम्मेदवारी दर्ता र निर्वाचनको कार्यक्रम मात्र बाँकी रहेको बताउनुभयो । फागुन २ गते उम्मेदवारी दर्ता गर्ने र सोही दिन निर्वाचन गर्ने गरी काठमाडौँ काँग्रेसले आन्तरिक तयारी गरिरहेको छ ।
हालसम्म २५ जिल्लामा सभापतिको निर्वाचन सम्पन्न भइसकेको छ । साथै ६५ जिल्लामा क्षेत्रीय अधिवेशन सम्पन्न भइसकेको जानकारी निर्वाचन समितिका सदस्य घिमिरेले दिनुभयो ।
यसैबीच काँग्रेसको १३औँ महाधिवेशनअन्तर्गत भइरहेको जिल्ला सभापतिको निर्वाचनमा विभिन्न सात जिल्लाका सभापतिको पुनःनिर्वाचन हुने भएको छ । निर्वाचनमा विजयी हुन ५० प्रतिशतभन्दा बढी मत ल्याउन नसकेपछि जिल्ला सभापतिमा पुनःनिर्वाचन गर्न लागेको हो ।
पार्टीको केन्द्रीय निर्वाचन समितिले दिएको जानकारीअनुसार चितवन, बर्दिया, प्यूठान, लमजुङ, अछाम, दैलेख र ललितपुर जिल्लामा सभापतिको पुनःनिर्वाचन हुनेछ । पुनःनिर्वाचन गर्ने जिल्लामा पनि फागुन २ र ३ गतेभित्र निर्वाचन गर्ने तयारी भइरहेको जनाइएको छ ।
पार्टीको विधानअनुसार सभापतिको निर्वाचनमा विजयी हुन खसेको मतको ५० प्रतिशतभन्दा बढी मत ल्याउनु अनिवार्य हुनेछ । पहिलो चरणको निर्वाचनमा कसैले पनि ५० प्रतिशतभन्दा बढी मत नल्याएमा सबैभन्दा बढी मत ल्याउने दुईजना उम्मेदवारबीच पुनः मतदान गरी बढी मत ल्याउने उम्मेदवार विजयी हुने प्रावधान काँग्रेसको विधानले स्पष्ट गरेको छ ।
तर, पहिलोपटक दुईजना मात्र उम्मेदवार भए बढी मत ल्याउने उम्मेदवार नै विजयी हुनेछ । सचिव र कोषाध्यक्ष पदको निर्वाचनमा भने जतिसुकै उम्मेदवार भए पनि बढी मत ल्याउने उम्मेदवार विजयी हुने प्रावधान छ ।

थप समाचार
प्रतिकृया
नाम

ईमेल

ठेगना