अन्तर्राष्ट्रिय वन्यजन्तु स्वास्थ्य कार्यशाला सम्पन्न

रत्ननगर (चितवन), माघ २७ गते । अन्तर्राष्ट्रियविज्ञसहित सहभागी भएको तीनदिने वन्यजन्तुको स्वास्थ्य सम्बन्धी कार्यशाला हालै सम्पन्न भएको छ ।

चितवनको सौराहामा यही माघ २३ गतेदेखि माघ २५ सम्म भएको तीनदिने गोष्ठीमा अमेरिका, बेलायत तथा नेपालका पशु चिकित्सक तथा विज्ञहरुको सहभागिता रहेको थियो । विज्ञले मानव स्वास्थ्यको सुरक्षाका लागि वन्यजन्तुको स्वास्थ्यमा समेत ख्याल गर्नुपर्नेमा जोड दिएका छन् ।

जङ्गली वन्यजन्तुबाटै मानव र पालुवा जनावरमा रोग सर्ने र मानव समुदायलाई नै प्रभावित पार्ने भएकाले यसतर्फ सबै देशले ध्यान दिनुपर्ने निष्कर्षसहित कार्यशाला सकिएको कार्यशालाका संयोजक तथा कृषि तथा वन विज्ञान विश्वविद्यालयका उपकुलपति डा आइपी ढकालले जाकारी दिनुभयो ।

करिब ६० जनाको सहभागितामा भएको छलफलले निकालेको निष्कर्ष वन्यजन्तुको स्वास्थ्य समस्या समाधानका लागि नीतिनिर्माण गर्न सहयोगी बन्ने उहाँले बताउनुभयो । उहाँका अनुसार आएका विषयलाई लिपिबद्ध गरी नीतिनिर्माणका लागि मन्त्रालयमा पेस गरिनेछ ।

अहिलेसम्म संरक्षणको नीति भएपनि वन्यजन्तुको स्वास्थ्यको नीति भने निर्माण हुन सकेको छैन । कृषि तथा वन विज्ञान विश्वविद्यालय, रामपुर, चितवन र अमेरिकाको युनिभर्सिटी अफ क्यालिफोर्निया डेभिजको संयुक्त आयोजनामा कार्यक्रम भएको हो ।

विज्ञबाट आएको सुझावलाई प्रतिवेदनका रुपमा तयार पारी मन्त्रालय र सम्बन्धित विभागमा निकट भविष्यमै पेस गरिने डा ढकालले बताउनुभयो । विश्व वन्यजन्तु कोषको हरियो वन कार्यक्रमको सहयोगमा भएको कार्यक्रममा विज्ञले वन्यजन्तुको विषयमा विभिन्न समूहगत छलफल गरेका थिए ।

नेपालमा संरक्षित वन्यजन्तुमा क्षयरोग र विभिन्न भाइरसको सङ्क्रमण रहेको छ । चितवन निकुञ्जमा पालिएका कतिपय हात्तीलाई समेत क्षयरोग लागेको छ । वन्यजन्तुबाट जुनोटिक रोग मानिसमा सर्ने भएकाले विज्ञको ध्यान यसतर्फ गएको हो । उक्त कार्यशालाको वनमन्त्री अग्नि सापकोटाले उद्घाटन गर्नुभएको थियो । रासस

थप समाचार
प्रतिकृया
नाम

ईमेल

ठेगना