धूमधामका साथ सुरु भयो १२औँ साग

प्रजित शाक्य

गुवाहाटी (भारत), माघ २३ गते । दक्षिण एसियाका आठ राष्ट्रको परिवार हो र यसका सदस्यबीचको खेलकुद मेला सुरु भएको घोषणा गर्छु– भारतका प्रधानमन्त्री नरेन्द्र मोदीले शुक्रबार साँझ गरेको यस उद्घोषसँगै तामझामसाथ उद्घाटन कार्यक्रम भारतको गुवाहाटी र सिलोङमा १२ औँ दक्षिण एसियाली खेलकुद प्रतियोगता सुरु भएको छ ।
गुवाहाटीस्थित इन्दिरा गान्धी एथलेटिक्स रङ्गशालामा भएको उद्घाटन कार्यक्रममा प्रमुख अतिथि मोदीले एघारदिने प्रतियोगिता सुरु भएलगत्तै आयोजक भारतलगायत नेपाल, अफगानिस्तान, बङ्गलादेश, भुटान, श्रीलङ्का र माल्दिभ्सका करिब तीन हजार ५०० खेलाडी आ–आफ्नो देशलाई पदक दिलाउन सक्रिय भएका छन् ।
उद्घाटन कार्यक्रममा प्रधानमन्त्री मोदीले भन्नुभयो, छिमेकका सबैलाई सुन्दर भारतमा स्वागत गर्न पाउँदा गर्व महसुस भइरहेको छ, गुवाहाटी पनि खेलप्रेमीहरूको सहर हो, अझ ब्रह्मपुत्रको यस किनारामा तपाईँहरूको उपस्थितिले मलाई उत्साहित बनाइरहेको छ । यो खेलकुद मेला आठ राष्ट्रबीचको एकताको प्रतीक पनि हो । साग अवसरको सेतु बन्छ र सार्क राष्ट्रको विकासमा यसले भूमिका खेल्छ भन्ने विश्वास छ, आऊ शान्ति, समृद्धि र भातृत्वका लागि खेलौँ ।
दक्षिण एसियाली खेलकुदको इतिहासमै पहिलोपटक दुई सहरमा यो खेलकुद मेला हुनलागेको हो । आसामको गुवाहाटी बाहेक मेघालयको सिलोङमा पनि साग खेलकुद हुनेछ । कुल २३ मध्ये आठ खेल सिलोङमा हुनेछ । सिलोङको जवाहरलाल नेहरु रङ्गशालामा पनि शुक्रबार नै उद्घाटन समारोह गरिएको छ । भारतका प्रमुख फुटबलर भाइचुङ भुटियाले साग खेलकुदको मसाल प्रज्ज्वलित गर्नुभएको थियो । १२ औँ दक्षिण एसियाली खेलकुदका लागि सुरक्षा व्यवस्था पनि कडा गरिएको छ । करिब दस हजार सुरक्षा अधिकारीका साथै दुई हजार सीसीटीभी विभिन्न ठाउँमा राखिएका छन् । यस प्रतियोगिताका लागि भारतले १.५ विलियन भारतीय रुपियाँ खर्च गरेको छ ।
उद्घाटन समारोहमा नेपाली खेलाडीले पनि उत्साहसाथ मार्चपास्ट गरे । पौडी खेलाडी श्रीदिका सिंहले नेपालको राष्ट्रिय झन्डा बोकी मार्चपास्टको नेतृत्व गर्नुभयो । नेपालका साथै आठै राष्ट्रका खेलाडी पदाधिकारीले मार्चपास्टमा भाग लिए । यसअघि, आसामको संस्वृmति झल्किने परम्परागत नृत्यको प्रस्तुति आकर्षणको रूपमा रहेको थियो । साथै स्कुले विद्यार्थी, अभिनेता, गायक गायिकाले पनि रङ्गमञ्च तताए । १२ औँ सागमा १२ रङ्गशाला, इन्डोर स्पोर्ट्स खेलस्थल प्रतियोगिता गरिएको छ । saag
प्रत्येक दुई वर्षमा आयोजना हुने साग खेलकुद करिब छ वर्षको अन्तरालपछि हुँदैछ । पछिल्लो सस्करण बङ्गलादेशको ढाकामा सन् २०१० मा भएको थियो । जसमा नेपालले आठ स्वर्ण, नौ रजत र २० काश्य पदक जितेको थियो । साग खेलकुदमा नेपालको सबभन्दा ठूलो उपलब्धि काठमाडौँमा सन् १९९९ मा सम्पन्न आठौँ साफ हो । सो संस्करणमा नेपालले स्वर्ण पदकमात्र ३१ वटा हासिल गरेको थियो । नेपालले सो समय पदक तालिकामा भारत पछाडि दोस्रो स्थानमा आफूलाई उभ्याएको थियो । तर नवौँ र दसौँ सागमा नेपालले आफ्नो प्रतिष्ठा कायम राख्न सकेन । यद्यपि एघारौँ सागमा आठ स्वर्ण, नौ रजत र २० काश्य पदक जितेर विदेशी भूमिमा नेपालले सबभन्दा सफल प्रदर्शन गरेको थियो ।  
माघ २२ देखि फागुन ४ गतेसम्म चल्ने सागमा ३८४ नेपाली खेलाडीको सहभागिता छ । हक्कीबाहेक सबै २३ खेलमा पुरुष÷महिला खेलाडीको सहभागिता रहनेछ । हक्कीमा महिला टोलीले मात्र भाग लिने छ । आयोजकका अनुसार प्रतियोगितामा एक हजार ५०५ पुरुष, एक हजार १६७ महिला, ६३५ अफिसियल र २०० अन्तर्राष्ट्रिय प्राविधिक अफिसियलहरूको सहभागिता छ ।

थप समाचार
प्रतिकृया
नाम

ईमेल

ठेगना