अवैध रुपमा आयात हुदै साना सिलिण्डर, ग्यास भरेर ल्याउन सजिलो भएकाले उपभोक्ता आकर्षित

वीरगन्ज, माघ १८ गते । भारतीय बजारबाट ल्याएर वीरगञ्जको स्थानीय बजारमा एलपी ग्यासका साना सिलिन्डरको प्रयोग बढेको छ । साना सिलिण्डर स्थानीय बजारमा बेच्न पाइँदैन । गैरकानुनी रुपमा यस्ता सिलिण्डरको आयात हुने गरेको छ ।


बन्द, हडताल र नाकाबन्दीका कारण बजारमा सहज रुपमा ग्यास सिलिन्डर पाउन छाडेपछि साना सिलिन्डरतर्फ उपभोक्ताको आकर्षण बढेको हो । सीमावर्ती भारतीय क्षेत्रबाट साना सिलिन्डरमा ग्यास भरेर ल्याउन सजिलो भएकाले उपभोक्ता यसतर्फ आकर्षित हुन थालेका छन् । साना सिलिन्डर मापदण्ड विपरीत भारतबाट अवैधरूपमा आयात हुने गरेका छन् ।

अवैधरूपमा आयात हुने साना सिलिन्डरका कारण उपभोक्ता ठगिने गरेका छन् । यस्ता सिलिन्डर मध्य तराईका बारा, पर्सा र रौतहटमा खुलेयाम बिक्री भइरहेका छन् । स्थानीय प्रशासनले अनुगमनमा सक्रियता नदेखाएपछि सिलिन्डर ल्याउन व्यापारीको मनोबल उच्च भएको हो ।

यहाँका अधिकांश पसलमा भारतीय साना ग्यास सिलिन्डर बिक्री हुँदै आएको छ । 'सानो परिवार र विद्यार्थीले साना ग्यास सिलिन्डरको माग गर्ने गरेका छन्' एक व्यापारीले भने ।

राजस्व छलेर भित्र्याइएका र मापदण्ड विपरीतका साना सिलिन्डरको कारोबार गर्न सरकारले अनुमति दिएको छैन । बिक्रीमा रोक लगाइएको भनिए पनि कारोबार रोकिएको छैन । 'स्थानीय उपभोक्ताको माग र आवश्यकतालाई ध्यानमा राखेर भारतीय सिलिन्डर बिक्री गरेका हौं' वीरगन्जका अर्का एक व्यवसायीले भने ।

व्यवसायीले उपभोक्ताले देख्ने गरी पसल बाहिर नै साना सिलिन्डर राखेर बिक्री गर्ने गरेका छन् । साना सिलिन्डरको व्यापक चोरी तस्करी र बिक्री भए पनि सम्बन्धित निकायले बजार अनुगमन हालसम्म हुन नसकेको स्थानीय उपभोक्ता रविरञ्जन मिश्र बताउँछन् । रासस

थप समाचार
प्रतिकृया
नाम

ईमेल

ठेगना