आफ्नो पेसाबाट सन्तुष्ट ‘भोजपुरे खुकुरी बाजे’

untitledलहान, माघ ११ गते । आफ्नो पुख्र्यौली पेसाबाट युवा वर्ग अन्य व्यवसायतर्फ आकर्षित भइरहेका बेला सिरहाको बडहारामालका टंकबहादुर विश्वकर्मा भने आफ्नै पुर्खौली पेसाबाट मनग्य आम्दानी गरिरहनु भएको छ ।
पुख्र्यौली पेसाबाट आफ्ना छोराछोरीलाई इन्जिनियर र स्टाफ नर्ससम्मको शिक्षा दिलाउन उहाँ सफल हुनुभएको छ ।
सिरहाको बडहरामाल–२, बन्दिपुरका विश्वकर्माले आफ्नो पुख्र्यौली पेसालाई आधुनिकीकरण र औद्योगिकीकरण गरी भोजपुरे खुकुरी बेचबिखनबाट गाउँमा तीन तल्ले पक्की घर समेत बनाइ सक्नुभएको छ । यही पेसाबाट भएको आम्दानीबाट विश्वकर्माले गाउँमा जग्गा जमिनको जोहोसमेत गर्नुभएको छ ।
मन्दिरा भोजपुरे खुकुरी उद्योगका सञ्चालक विश्वकर्मा खुकुरी व्यवसायको आम्दानीबाटै आफ्नो जेठो छोरोलाई व्यवस्थापनमा स्नातकोत्तर, कान्छो छोरोलाई इन्जिनियर र छोरीलाई स्टाफ नर्स पढाउन सफल भएको बताउनुहुन्छ ।
पुख्र्यौली घर भोजपुरबाट धरान हुँदै २०५५ सालमा सिरहाको बन्दिपुर आउनुभएका विश्वकर्माले खुकुरी निर्माण कार्यलाई व्यावसायिक रुपमा सञ्चालन गरेर ‘भोजपुरे खुकुरी बाजे’को रुपमा समेत पहिचान बनाउन सफल हुनुभएको छ ।
खुकुरी बेचेकै कमाइबाट बन्दिपुर बजारमा जेठो छोराले सुन पसल चलाइरहेको बताउने विश्वकर्मा भन्नुहुन्छ – ‘‘जेठो छोराले स्थानीय राष्ट्रिय फूलकुमारी महतो उच्च माध्यमिक विद्यालयमा लेखापालको समेत काम पनि गर्दै आइरहेको छ ।”
आफ्नो उद्योगमा भोजपुर, खोटाङ र तेह्रथुमका लगायतका जिल्लाका १२ जनाभन्दा बढी दक्ष कालिगढ ९मजदुर०ले काम गरेर मासिक ३० हजारभन्दा बढी कमाउने गरेको उहाँ बताउनुहुन्छ । ‘‘शिप र जाँगर भएकालाई विदेश भन्दा आफ्नै ठाउँमा राम्रो कमाइ हुन्छ,” उहाँले भन्नुभयो ।
मन्दिरा उद्योगमा उत्पादन हुने खुकुरीको मूल्य न्यूनतम चार सय रुपैयाँदेखि अधिकतम पाँच हजारसम्म पर्ने गरेको छ ।
उहाँ भन्नुहुन्छ – “खुकुरी बनाउन मात्रै समस्या छ, अहिलेसम्म बजारको खासै अभाव भएको छैन । हामीले बनाएको खुकुरी सेना, सशस्त्र प्रहरी क्याम्पमा एकै पटकमा चार–पाँच सय बिक्री हुने गरेको छ ।” यस बाहेक बर्दिवास, जनकपुर, सर्लाही, वीरगंज, हेटौँडाका ब्यवसायी र छिटफूट ग्राहकले पनि आफ्नो उद्योगमा निर्माण भएको खुकुरी लाने गरेको उहाँ बताउनुहुन्छ ।
मेला वा महोत्सवहरुमा पनि आफ्ना उत्पादन राम्रै बिक्ने गरेको उहाँको अनुभव छ । दुई वर्षअघि लहानमा भएको सगरमाथा महोत्सवमा दुईलाख मूल्य बराबरको खुकुरी बेचेको उहाँ सुनाउनुहुन्छ ।
अत्याधुनिक हतियारको विकास भएपनि नेपालमा खुकुरी ब्यवसायमा कुनै ¥हार नआएको विश्वकर्माको भनाइ छ ।
विश्वकर्मा भन्नुहुन्छ – ‘‘राजधानी काठमाडौँ, पोखरा, विराटनगर, नारायणघाट लगायतका स्थानबाट समेत खुकुरी खरिदका लागि आउने गरेका छन् ।” आफ्नो यो व्यवसायबाट परिवारका सबै सदस्यहरु खुसी रहेको र उनीहरुबाट साथ पाएकामा विश्वकर्मा दङ्ग हुुनुहुन्छ ।
पुख्र्यौली पेसाबाट राम्रो आम्दानी नभएको भन्दै अहिलेका युवा बढी पैसा कमाउने लोभमा विदेश गएको देख्दा उहाँलाई दुःख लाग्छ । उहाँ भन्नुहुन्छ –‘‘ राम्ररी मिहिनेत गरे आफ्नो गाउँमै राम्रो आम्दानी गर्न सकिन्छ तर अहिले सबैजसो विदेश जान खोज्छन् ।” रासस


 

थप समाचार
प्रतिकृया
नाम

ईमेल

ठेगना