नेपाललाई हिन्दुराष्ट्र घोषणा गर्न सकिन्छ– देउवा

टीकाबहादुर बस्नेत, दाङ माघ ६ गते । नेपाली काङ्ग्रेसका बरिष्ठ नेता शेरबहादुर देउवाले नेपाललाई हिन्दुराष्ट्र घोषणा गर्न सकिने बताउनुभएको छ ।

नेपाल प्रेस युनियन दाङले बुधबार दाङको तुलसीपुरमा आयोजना गरेको पत्रकार सम्मेलनमा बोल्दै नेता देउवाले कांग्रेसको दुई तिहाई बहुमत नभएका कारण इच्छा नहुँदा नहुँदै पनि नेपाललाई धर्मनिरपक्ष घोषणा गर्न बाध्य भएको बताउनुभएको हो ।

कुल जनसंख्याको ८० प्रतिशत जनताको हिन्दुधर्म, कायम राख्नु पर्ने चाहना भएकाले नेपाली कांग्रेसको बहुमत भएमा हिन्दु राष्ट्र घोषणा गर्न सकिने देउवाले बताउनुभयो । तेह्रो महाधिवेशनप्रति लक्षीत गर्दै उहाँले आफू सभापति भए सुदृढ र बलियो हुने दाबी गर्नुभयो ।

आफू सभापति भए सदाका लागि पार्टीभित्रको गुटबन्दी अन्त्य हुने दाबी गर्दैै नेता देउवाले गिरिजाबाबु र आफूले दुई कांग्रेसलाई एक गराएको भन्दै गिरिजाबाबुपछि पार्टीलाई एक गराउने दायित्व र कर्तव्य आफ्नो भएको जिकिर गर्नुभयो । पूर्व प्रधानमन्त्री समेत रहनुभएका देउवाले मधेसी मोर्चाले राखेका सबै माग पुरा भइसकेको भन्दै अझै पनि सहमतिका लागि सिमाङ्कनका विषयमा आफूहरु लचिलो हुन तयार रहेको बताउनुभयो ।

सीमांकनमा देखिएको विवाद अन्त्यका लागि आयोग गठन भइसकेको भन्दै उहाँले दाङदेखि कञ्चनपुरसम्मको थारु बाहुल्य क्षेत्रलाई थारु स्वायत्त प्रदेश बनाउन सकिने बताउनुभयो । ‘थारुहरुको बाहुल्यता रहेको दाङदेखि कञ्चनपुरसम्मका जिल्लाहरुलाई थारु स्वायत्त प्रदेश बनाउन सकिन्छ ।

त्यसका लागि मधेशी मोर्चाले भनेझैं तराईलाई दुई प्रदेश बनाउन सकिदैन’, देउवाले भन्नुभयो, ‘मुलुकलाई बिखण्डनतर्र्फ लैजाने कसैका पनि माग पुरा गर्न सकिदैन ।‘ संविधान गतिशील हुने भएका कारण यो संशोधन हुँदै जाने र संशोधन प्रक्रियामै सबै असन्तुष्ट पक्षका मागहरु पुरा हुँदै जाने भन्दै देउवाले भन्नुभयो, ‘राप्ती, भेरी, सेती महाकालीलाई एउटै प्रदेशमा राखेर सिमाङ्कन गर्ने र त्यसको विशेषाधिकार दाङदेखि पश्चिम तराईका जिल्लाहरुमा दिने मेरो प्रस्ताव छ यो एक दिन पुरा हुन्छ ।’ 

थप समाचार
प्रतिकृया
नाम

ईमेल

ठेगना