कांग्रेसलाई बलियो बनाउन सभापतिमा उम्मेदवारी दिन्छु–कोइराला

टीकाबहादुर बस्नेत, दाङ पुस २१ गते । नेपाली कांग्रेसकी नेतृ सुजाता कोइरालाले कांग्रेसलाई बचाउन आफूले सभापतिमा उम्मेदवारी दिने बताउनुभएको छ । नेपाल प्रेस युनियन दाङले आज घोराहीमा गरेको पत्रकार सम्मेलनमा बोल्दै कोइरालाले आन्तरिक विवादले कांग्रेस समाप्त हुने दिशातर्फ उन्मुख भइरहेकाले कांग्रेसलाई बचाउन आफूले उम्मेदवारी दिने बताउनुभएको हो ।
परम्परागत सोचले पार्टी चल्न नसक्ने भन्दै नेपाल सरकारको पूर्व उपप्रधानमन्त्री समेत रहनुभएकी कोइरालाले युवाहरुको प्रतिनिधित्व गर्दै आफूले सभापतिमा उम्मेदवारी दिने बताउनुभयो । ‘परम्परागत तरिकाले अगाडि बढियो भने कांग्रेस समाप्त भएर जान्छ’, कोइरालाले भन्नुभयो, ‘कांग्रेसको विकासका लागि नयाँ सोच र विचारको आवस्यक छ । युवा नेतृत्वको आवस्यकता छ । यसै आवस्यकतालाई पूर्ती गर्न मैले नेतृत्व दाबी गरेकी हुँ ।’
वीपी कोइरालाको विचार, गणेशमान र किशुन जीको त्याग अनि गिरिजाप्रसाद कोइरालाको संगठनले कांग्रेस बलियो भएको भन्दै नेतृ कोइरालाले पछिल्लो समयमा कांग्रेसभित्र बिकृति भित्रिएकाले १३ महाधिवेशनले सम्पूर्ण विकृति समाप्त पार्ने दाबी गर्नुभयो ।
पार्टीभित्रका केही नेताहरुले गिरिजाप्रसाद कोइरालाको लाइनलाई समाप्त पार्ने ग्राइनडिजाइन रचिरहेको चर्चा गर्दै नेतृ कोइरालाले उक्त ग्राइनडिजाइन सफल हुन नदिने बताउनुभयो । लामो समयसम्म एउटै नेतृत्वले पार्टी हाँक्दा पार्टी संगठन बलियो नहुने दाबी गर्दै कोइरालाले कांग्रेसको नेतृत्व युवाहरुको हातमा आउनुपर्ने बताउनुभयो ।
अर्को प्रसंगमा बोल्दै कोइरालाले अबको केही दिनभित्रै नाकाबन्दी हट्ने बताउनुभयो । नाकाबन्दी मधेशी मोर्चाको नभई भारतले गरेको दाबी गर्दै कोइरालाले भारतबाट नाकाबन्दी खोल्ने आश्वासन आइसकेकाले नाकाबन्दी लामो समयसम्म रहननसक्ने बताउनुभयो ।

थप समाचार
प्रतिकृया
नाम

ईमेल

ठेगना