भूकम्पपछि महिला बेचबिखन बढ्यो

काठमाडौँ, मङ्सिर २२ गते । भूकम्पपीडित महिला बेचबिखनको तीव्र मारमा परेको उल्लेख गर्दै सरोकारवाला निकायका प्रतिनिधिले सरकारलाई सचेत हुन आग्रह गरेका छन् । भूकम्पका कारण उठिबास भएका बेला विवाह गर्ने र जागिर लगाइदिने प्रलोभनमा पारी महिलाको बेचबिखन भइरहेको उहाँहरूको दाबी छ । 

मानव बेचबिखन न्यूनीकरण तथा महिलामाथि हुने हिंसा न्यूनीकरणमा सञ्चारकर्मीको भूमिका विषयक अन्तक्र्रियामा सोमबार यहाँ बोल्दै सो क्षेत्रमा कार्यरत प्रतिनिधि तथा अधिकारकर्मीले महिलालाई सबैतिरबाट समस्यामा पार्ने काम गरिएको गुनासो पोख्नुभयो । समस्या परेकाबेला अनेक बहानाबाजी गरी, प्रलोभनमा पारेर भूकम्प प्रभावित जिल्लाका सयौँ महिलालाई भारत र अन्य ठाउँमा बेचबिखन गरिएको घटना सुनाउनुभयो ।
शक्ति समूहकी अध्यक्ष तथा अधिकारकर्मी सुनिता दनुवारले मौकाको फाइदा उठाउँदै दलालीले भूकम्पपीडित महिलालाई विवाह गर्ने तथा जागिर लगाइदिने प्रलोभन देखाएर बेचबिखन गरिरहेको दाबी गर्नुभयो । आफ्नो संस्थामा त्यस्तो धेरै घटना आएको बताउनुहुँदै अध्यक्ष दनुवारले सो विषयमा सञ्चारकर्मीलाई चनाखो भएर कलम चलाइदिन आग्रह गर्नुभयो । mahila bechabikhan
अध्यक्ष दनुवारले १४ जिल्लाका ७७४ भूकम्पपीडित महिला बेचबिखनको उच्च जोखिममा रहेको बताउनुहुँदै बेचिएका महिलाको आफ्नो जीवनसँगै परिवारकै समस्या बढेको जानकारी दिनुभयो । काम लगाइदिने बहानामा विदेश लगेर कैयौँ महिलाको मिर्गौला झिकेर प्लास्टिकको सर्जरी गरी स्वदेश फर्काइएको घटनासमेत आफूकहाँ पुगेको उहाँले जानकारी गराउनुभयो ।
सो संस्थाका निर्देशक तोया घिमिरेले महिला हिंसा र महिला बेचबिखनको घटना तीव्ररूपमा बढिरहेकाले सरकारलाई दबाब दिन सञ्चारकर्मी नै सक्रिय हुनुपर्ने बताउनुभयो । सञ्चारकर्मीलाई सो विषयमा कलम चलाएर सरकारी तहबाट अनुगमन र सुरक्षा व्यवस्थाका लागि दबाब दिन आग्रह गर्नुभयो । महिला बेचबिखनको घटनालाई सम्पादकीय तहमा पु¥याउन आवश्यक रहेको चर्चा गर्नुभयो ।
नेपाली चेलीको विदेशमा मात्रै बेचबिखन नभई स्वदेशमै रेस्टुरेन्टबाट अर्को रेस्टुरेन्टमा बेचबिखन भइरहेको घटनासमेत बाहिर आएको सञ्चारकर्मीले सो अवसरमा जानकारी गराए । महिला हिंसा तथा बेचबिखनको घटना रोक्न सबै नागरिकले आ–आफ्नो ठाउँबाट भूमिका खेल्नुपर्ने सुझाव दिए । पत्रकार टङ्क पन्तले महिलामाथिको हिंसा चौतर्फी बढिरहेको भए पनि सञ्चारकर्मीको सहयोगले केही हदसम्म नियन्त्रणमा आइरहेको बताउनुभयो ।

थप समाचार
प्रतिकृया
नाम

ईमेल

ठेगना