सीमाङ्कन अहिले नै टुङ्गिने सम्भावना कम

काठमाडौँ, मङ्सिर ११ गते । प्रमुख तीन दलका नेताहरूले मधेशको आन्दोलन रोकिने हो भने संसद्मा दर्ता भएको संविधान संशोधन प्रस्ताव पारित गर्न तयार रहेको बताउनुभएको छ ।

उहाँहरूले संयुक्त लोकतान्त्रिक मोर्चाले भने जस्तो सीमाङ्कन सम्भव नभएको तर हेरफेर गर्न सकिने स्पष्ट पार्नुभएको छ ।

शुक्रबार यहाँ आयोजना गरिएको एक साक्षात्कार कार्यक्रममा कृषि मन्त्री एवम् एनेकपा (माओवादी) कोषाध्यक्ष हरिबोल गजुरेलले सीमाङ्कनको विषय सामान्य विषय नभएकाले अहिले नै समाधान हुन्छ भन्ने आफूलाई नलागेको बताउनुभयो ।

मन्त्री गजुरेलले भन्नुभयो, “सीमाङ्कन अहिले नै टुङ्गिने सम्भावना देख्दिनँ, झनै झापा, मोरङ, सुनसरीको विवाद त अहिले टुङ्गिनै सक्दैन ।”

मन्त्री गजुरेलले थारुहरूलाई अन्याय परेकाले अहिलेले विवाद मिलाउन सकिने र त्यसै अनुसार पार्टीले प्रयत्न गरिरहेको भन्दै पश्चिमका पहाडी क्षेत्र ४ नम्बर प्रदेशमा राखेर थरुहटको विवाद मिलाउन सकिने बताउनुभयो ।

पूर्व उप–प्रधानमन्त्री एवं नेपाली काँग्रेसकी नेतृ सुजाता कोइरालाले भारतको समर्थनमा मधेश आन्दोलन भइरहेको दाबी गर्नुभयो ।

कोइरालाले भन्नुभयो, “काँग्रेस र नेकपा (एमाले)सहितका ठूला दलले गरेको आन्दोलन त उठ्न चार वर्ष लाग्यो, मधेशीले भन्ने बित्तिकै आन्दोलन भयो भन्ने मलाई विश्वास लाग्दैन, यसभित्र ठूलो षड्यन्त्र छ, भारतको समर्थनबिना यसरी आन्दोलन चर्किँदैन ।”

सुनसरी र मोरङ्गबासीले आफ्नो जिल्ला टुक्राए कडा आन्दोलन गर्ने दाबी गर्दै कोइरालाले भन्नुभयो, “सुनसरी, मोरङ्गबासीले हामी टुक्रिन दिँदैनौँ, दुई नम्बर प्रदेशमा जान्नौँ भनेका छन्, त्यो भए ठूलो आन्दोलन हुन्छ ।”

नेतृ कोइरालाले नेपाली काँग्रेसले दर्ता गराएको संशोधन प्रस्ताव अगाडि बढाएपछि मधेशी मोर्चाको आन्दोलन रोकिन्छ कि रोकिँदैन, नाकाबन्दी खुल्छ कि खुल्दैन भन्ने कुरा महत्वपूर्ण हुने भन्दै सरकार कडा रूपमा प्रस्तुत हुनुपर्छ भन्नुभयो ।

नेतृ कोइरालाले गिरिजाप्रसाद कोइरालाले भनेजस्तो पाँच विकास क्षेत्रलाई नै पाँच प्रदेश बनाउँदा राम्रो हुने भन्दै मधेशमा दुई प्रदेश जनताले नचाहेको दाबी गर्नुभयो ।

नेकपा (एमाले) स्थायी समिति सदस्य शङ्कर पोख्रेलले भारतले नेपालमा ‘माइक्रो म्यानेजमेण्ट’ गर्न खोजिरहेको दाबी गर्दै भन्नुभयो, “रक्सौल नाकामा रहेका ट्रक रिरुट गरेर अरु नाकाबाट ल्याउँ भन्दा भारत मान्दैन, जबकि रिरुट गरे नेपालमा कुनै मानवीय सङ्कट उत्पन्न हुँदैन, यसमा भारत सकारात्मक भए समस्या छैन ।”

नेता पोख्रेलले समस्या समाधान हुन्छ भने नेपाली काँग्रेस नेतृत्वको सरकारले दर्ता गराएको संविधान संशोधन प्रस्ताव अगाडि बढाउन तयार रहेको भन्दै संशोधन प्रस्तावमा अगाडि बढाउन आफूहरूको असहमति नभएको स्पष्ट पार्नुभयो ।

उहाँले भन्नुभयो, “कसैले मधेश स्वतन्त्र देश माग्दैमा हामीले मान्नुपर्छ भन्ने छ र ! मधेशीहरू अहिले मधेशमा आफ्नो गुमेको साख बलियो बनाउन मधेशी र पहाडीबीच विभाजन गर्न खोज्दैछन्, यस्तो गर्दै गए मधेशी मोर्चाको हातबाट आन्दोलन फुत्किन्छ, होस् गरे हुन्छ ।”

सद्भावना पार्टीका सह–अध्यक्ष लक्ष्मणलाल कर्णले विवादित जिल्लाको विवाद जनमत सङ्ग्रहबाट टुङ्ग्याउने प्रस्ताव आफूहरूलाई मान्य हुँदैन भन्नुभयो ।

उहाँले जनमत सङ्ग्रहको पोको खुले हिन्दू धर्म, राजसंस्था र बिखण्डनको माग आए के जनमत सङ्ग्रह गर्ने भनी प्रश्न गर्दै भन्नुभयो, “जनमत सङ्ग्रहको कुरा गरे देश बर्बाद हुन्छ ।”

चुरेदेखि दक्षिण र भारतको सीमादेखि उत्तर पूर्व पश्चिम आफूहरूलाई दुई प्रदेश चाहिने भन्दै अहिले चुरे भावर राष्ट्रिय एकता पार्टी नेपाललाई सरकारले आफूहरूविरुद्ध प्रयोग गरिरहेको आरोप लगाउनुभयो ।

सह–अध्यक्ष कर्णले सरकारले वार्ताको टेवलमा उपयुक्त प्रस्ताव ल्याए आफूहरू वार्ताबाट समस्या समाधानका लागि तयार रहेको स्पष्ट पार्दै सीमाङ्कन नभई आन्दोलन नछाड्ने बताउनुभयो ।

थप समाचार
प्रतिकृया
नाम

ईमेल

ठेगना