समय सकियो, पुल निर्माण सुरु भएन

मनोहरा (काठमाडौँ), मङ्सिर ११ गते । उत्तरपूर्वमा रहेको कागेश्वरी मनोहरा नगरपालिकालाई भक्तपुरको चाँगुनारायण नगरपालिकासित जोड्ने पुल निर्माण सक्न सम्झौतामा तोकिएको समय सकिँदा पनि काम सुरु हुन सकेको छैन । काम सुरु गर्न लाग्दा पुल बनाउने स्थान विवाद भएर रोकिएको थियो । डिभिजन सडक कार्यालय भक्तपुरले पक्की पुलको निर्माण ६० प्रतिशत सकिसकेकोे सार्वजनिक गरेको छ । काम नै सुरु नगरी ६० प्रतिशत काम सकिएको सार्वजनिक अभिव्यक्ति दिएपछि कार्यालयले कागजमै मात्र पुल बनाउन खोजेको भन्दै स्थानीयवासीले विरोध जनाएका छन् ।

“विसं २०७० साउनमा ठेक्का सम्झौता भई २४ महिनामा सक्ने लक्ष्य राखिएको पुलको निर्माण विसं २०७२ असार मसान्तमा सर्नुपर्ने थियो, निर्माण सकिनुपर्ने समय सकिएको चार महिना बितिसक्दा पनि काम सुरु नभएकाले डिभिजन सडक कार्यालय भक्तपुरलाई सचेत गराएका छौँ”— पुल निर्माण सहयोग सरोकार समितिका अध्यक्ष नारायण पण्डितले भन्नुभयो । रु तीन करोड ५० लाखको लागतमा पुल निर्माणको सम्झौता गरिएको थियो ।

पुल बनाउने ठेक्का पाएको नागार्जुन कोसी एन्ड न्यौपाने जेभीले पक्की पुल बनाउन सुरु गर्नुअघि स्थानीयवासीले बनाएको फलामको पुल भत्काइदिएपछि वर्षामा बाढीका कारण आवतजावत गर्न नपाएको स्थानीयवासीको गुनासो छ । “यो पुल हुँदै दैनिक ७०० मानिस काठमाडौँ र भक्तपुर ओहोरदोहोर गर्ने गर्छन्, फलामको पुल पनि भत्काएपछि बादल लागेका दिनमा आवतजावत गर्न नै डराउनुपर्ने अवस्था छ”—पानी परेपछि मनोहरा खोलामा आउनसक्ने बाढीका कारण दैनिक काम काजमा हिँड्नै डराउनुपर्ने अवस्था रहेको उल्लेख गर्दै पुल निर्माण सहयोग सरोकार समितिका उपाध्यक्ष कृष्णबहादुर थापाले भन्नुभयो ।

यही पुल भएर दैनिक त्रिचन्द्र क्याम्पस आवतजावत गर्दै आउनुभएका ईश्वर श्रेष्ठ पुल भत्काएपछि वर्षात्मा खोलामा बाढी आउने चिन्ताले क्याम्पस जान नै डराउनुपर्ने अवस्था रहेको गुनासो गर्नुहुन्छ । ठेकेदार कम्पनीका लेखापाल दीपेश दाहाल डिभिजन सडक कार्यालय भक्तपुरले ठेक्का सम्झौता भएको धेरै समयपछि मात्र पुल निर्माणको नक्सा दिएको र अहिले पनि काम गर्ने वातावरण नबनाएर निर्माण सम्पन्न गर्नुपर्ने समय झुलाइदिएको जिकिर गर्नुहुन्छ । “नक्सा दिएपछि तीन वटा खाल्डो खन्ने लगायतका काम ग¥यौँ, त्यसलाई जाँचपास गर्न आउनुस् भनेर कार्यालयले अत्तो थापिरहेको छ, काम गर्ने वातावरण भने बनाएको छैन”— उहाँले गुनासो गर्नुभयो ।

डिभिजन सडक कार्यालय भक्तपुरका डिभिजनल इन्जिनियर देवेन्द्र साह सम्पर्कमा आउन चाहनु भएन । पुलको उपभोक्तासमेत रहनुभएका सांसद दीपकप्रसाद कुइँकेल परिणाममुखी भन्दा पनि प्रक्रियामुखी सरकारी तौरतरिकाले तोकिएको समयमा काम नसकिँदा स्थानीयवासीलाई समस्या हुने गरेको बताउनुहुन्छ । “सही ढङ्गबाट नापजाँच गरेर काम सुरुआत गरी समयमै सिध्याउने परिपाटी बसाउन हामी माग गरिरहेका छौँ, ठेकेदार र सडक कार्यालय समयमा काम नसकी थप समय लिने प्रक्रियामा लाग्दा जनता आवतजावत गर्न नपाउने वातावरण बन्नुहुन्न”– उहाँले भन्नुभयो । रासस

थप समाचार
प्रतिकृया
नाम

ईमेल

ठेगना